អន្តរជាតិ
អាមេរិក រីករាយក្នុងការចូលរួមផ្សព្វផ្សាយ និងពង្រីកទីផ្សារកម្ពុជាទៅកាន់អន្តរជាតិ លោកអគ្គរដ្ឋទូតអាមេរិកប្រចាំកម្ពុជា William Heidt ក្នុងកិច្ចពិភាក្សាតុមូលជាមួយនឹងអ្នកកាសែត នៅថ្ងៃទី២០ ខែកញ្ញា
× អគ្គរដ្ឋទូតអាមេរិកប្រចាំកម្ពុជា លោក William Heidt បានសម្តែងការរីករាយ ដែលបានចូលរួមផ្សព្វផ្សាយពីកាលានុវត្តភាព និងទីផ្សារកម្ពុជាទៅកាន់ទីផ្សារអន្តរជាតិ ជាពិសេសនោះអ្នកវិនិយោគហុងកុងដើម្បីទាក់ទាញឲ្យពួកគេមកវិនិយោគកម្ពុជាដែលទើបតែទទួលបានការលើកលែងពន្ធលើ«ទំនិញសម្រាប់ការធ្វើដំណើរពីអាមេរិក»។ លោកអគ្គរដ្ឋទូត ក៏បញ្ជាក់ដែរថា តាមរយៈការផ្សព្វផ្សាយ ក៏មានក្រុមហ៊ុន និងអ្នកវិនិយោគមួយចំនួនកំពុងពិចារណាដើម្បីមកវិនិយោគក្នុងទីផ្សារកម្ពុជាផងដែរ។
«ខ្ញុំ បាននិយាយជាមួយនឹងក្រុមហ៊ុនបីផ្សេងៗគ្នាដោយពួកគេ អះអាងថាកំពុងតែរៀបចំក្នុងការមកវិនិយោគមកកាន់កម្ពុជា និងប្រាំផ្សេងទៀត កំពុងតែពិចារណាយ៉ាងយកចិត្តទុកក្នុងការមកកម្ពុជាផងដែរ។ ... ខ្ញុំគិតថាប្រសិនបើរដ្ឋាភិបាល បន្តយកចិត្តទុកដាក់លើដំណើរការនេះ រដ្ឋាភិបាលនឹងទទួលបានផលប្រយោជន៍សេដ្ឋកិច្ចសម្រាប់កម្ពុជា។» នេះគឺសេចក្តីថ្លែងការណ៍របស់លោកអគ្គរដ្ឋទូត William Heidt នាកិច្ចពិភាក្សាតុមូលជាមួយនឹងអ្នកសារព័ត៌មាននៅថ្ងៃទី២០ ខែកញ្ញា ពាក់ព័ន្ធទៅនឹងលទ្ធផលនៃការផ្សព្វផ្សាយទីផ្សារកម្ពុជាទៅកាន់អ្នកវិនិយោគនៅហុងកុង។
សូមជម្រាបផងដែរថា នៅថ្ងៃទី១៩ ខែកញ្ញាកន្លងទៅ លោកអគ្គរដ្ឋទូត William Heidt បានរួមដំណើរជាមួយនឹងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លោក សុខ ចិន្តាសោភា រដ្ឋមន្ត្រី ប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា និងមន្ត្រីពាក់ព័ន្ធផ្សេងទៀតដើម្បីចូលរួមធ្វើបឋកថាស្តីពីកាលានុវត្តភាពវិនិយោគក្នុងវិស័យផលិតសម្ភារធ្វើដំណើរទៅកាន់សមាគមអ្នកវិនិយោគដែលមានមូលដ្ឋាននៅទីក្រុងហុងកុង។
តាមការបញ្ជាក់របស់លោកអគ្គរដ្ឋទូត គោលបំណងនៃការធ្វើបទបង្ហាញនៅហុងកុងគឺដើម្បីផ្សព្វផ្សាយទៅកាន់វិនិយោគិននៅហុងកុងប្រមាណជាង២០ក្រុមហ៊ុន ដែលជាមូលដ្ឋានដ៏សំខាន់នៃទីផ្សារពិភពលោក អំពីការទទួលបានការលើកលែងពន្ធតាមប្រពន្ធ័អនុគ្រោះទូទៅ(GSP)ចំពោះទំនិញសម្រាប់ការធ្វើដំណើរដូចការបូបជាដើមដែលផលិតនៅកម្ពុជា ដែលទើបតែផ្តល់ដោយរដ្ឋបាលលោកប្រធានាធិបតីសហរដ្ឋអាមេរិក បារ៉ាក់ អូបាម៉ា កាលពីពាក់កណ្តាលឆ្នាំ២០១៦នេះ។
លោកអគ្គរដ្ឋទូត ថ្លែងថាលោក ពិតជារីករាយដែលបានចូលរួមផ្សព្វផ្សាយ និងពង្រីកទីផ្សារកម្ពុជាទៅកាន់ឆាកអន្តរជាតិ។ លោក បានបញ្ជាក់យ៉ាងដូច្នេះថា «យើងពិតជារីករាយដែលឃើញរដ្ឋាភិបាលកម្ពុជាបន្តយកទុកចិត្តយ៉ាងសកម្មលើការសម្រេចចិត្តបន្ថយពន្ធរបស់អាមេរិក តាមរយៈការរៀបចំគណៈប្រតិភូ ការអញ្ជើញទូតអាមេរិកដើម្បីចូលរួមដំណើរផ្សព្វផ្សាយជាមួយនោះ។ វា ក៏បានបង្ហាញដែរថា រដ្ឋាភិបាលពិតជាយកចិត្តទុកដាក់ក្នុងការទទួលយកផលប្រយោជន៍សម្រាប់កម្ពុជា ....ដែលខ្ញុំគិតថានេះ គឺជាសម្រេចចិត្តមួយដ៏ត្រឹមត្រូវរបស់រដ្ឋាភិបាល។»
ជាងនេះទៅទៀតនោះ លោកអគ្គរដ្ឋទូត ដែលអះអាងថាលោកធ្លាប់បានធ្វើការលើផ្នែកសេដ្ឋកិច្ចជាងបីទសវត្សរ៍ហើយនោះ ក៏បានបង្ហាញការជឿជាក់ដែរថា កំណើននៃការនាំចេញរបស់កម្ពុជាទៅកាន់អាមេរិក នឹងកើនឡើងគួរកត់សម្គាល់នៅឆ្នាំក្រោយ ហើយ កម្មករកម្ពុជាក៏នឹងទទួលការងារកាន់តែច្រើនផងដែរ។
បើយោងការចុះផ្សាយក្នុងគណនីហ្វេសប៊ុកក្រសួងពាណិជ្ជកម្មកម្ពុជា ក្រោមប្រព័ន្ធអនុគ្រោះពន្ធទូទៅ (GSP) របស់សហរដ្ឋអាមេរិក មានផលិតផលចំនួនប្រហែល ៥០០០មុខ មកពីប្រទេសកំពុងអភិវឌ្ឍន៍ចំនួន ១២២ និងប្រទេសមានការអភិវឌ្ឍន៍តិចជាងគេចំនួន ៤៣ប្រទេស ទទួលបានការលើកលែងពន្ធ សម្រាប់ការនាំចូលទៅកាន់សហរដ្ឋអាមេរិក។ ក្នុងនោះទំនិញជាង១៥០០ ពីប្រទេសកំពុងអភិវឌ្ឍន៍តិចតួច រួមទាំងកម្ពុជាក៏អាចនាំចេញដោយឥតបង់ពន្ធផងដែរ៕
© រក្សាសិទ្ធិដោយ thmeythmey.com