អន្តរជាតិ
អាមេរិក-ចិន រួមគ្នាថ្កោលទោសកូរ៉េខាងជើង តែខ្ទាស់គ្នារឿងគម្រោងដំឡើងខែលការពារមីស៊ីលនៅកូរ៉េខាងត្បូង
× ឆ្លៀតពេលពីកិច្ចប្រជុំកំពូលពេញអង្គលើកទី៧១ នៃមហាសន្និបាតអង្គការសហប្រជាជាតិ លោកប្រធានាធិបតីអាមេរិក បារ៉ាក់ អូបាម៉ា (Barak Obama) បានជួបជាមួយនឹងលោកនាយករដ្ឋមន្ត្រីចិន លី ឃឺឈាង (Li Keqiang) ដើម្បីជជែកពីទំនាក់ទំនងទ្វេភាគីរវាងប្រទេសទាំងពីរ ក៏ដូចជា បញ្ហាសន្តិសុខនៅក្នុងតំបន់ឧបទ្វីបកូរ៉េផងដែរ។
លោកប្រធានាធិបតី បារ៉ាក់ អូបាម៉ា នៅថ្ងៃទី១៩ ខែកញ្ញា ដែលត្រូវជាថ្ងៃដំបូងនៃកិច្ចប្រជុំកំពូលអង្គការសហប្រជាជាតិប្រចាំឆ្នាំផងដែរនោះ បានព្រមព្រៀងជាមួយនឹងលោកនាយករដ្ឋមន្ត្រី លី ឃឺឈាង ក្នុងការបន្តការប្រឹងប្រែងបង្រួមការខ្វែងគំនិតគ្នា និងពង្រីកកិច្ចសហប្រតិបត្តិការពិតប្រាកដនៅក្នុងតំបន់ និងបញ្ហាប្រឈមសកលដើម្បីធានាឲ្យបានការអភិវឌ្ឍទំនាក់ទំនងទ្វេភាគី។
នាជំនួបនោះដែរ មេដឹកនាំទាំងពីរ ក៏បានថ្កោលទោសចំពោះការបាញ់សាកល្បងអាវុធនុយក្លេអ៊ែររបស់កូរ៉េខាងជើងកាលពីថ្ងៃទី០៩ ខែកញ្ញាកន្លងទៅ ហើយ សន្យាដោះស្រាយបញ្ហាតាមរយៈការពង្រឹងកិច្ចសហការរួមគ្នា ដែលរាប់បញ្ចូលក្នុងក្របខណ្ឌរបស់ក្រុមប្រឹក្សាសន្តិសុខអង្គការសហប្រជាជាតិ និងជំរុញការអនុវត្តឲ្យបានខ្ជាប់ខ្ជួននូវបទបញ្ញតិដែលទាក់ទងនឹងកូរ៉េខាងជើង។ ទាំងចិន និងអាមេរិក គឺជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិដែលមានទាំងអំណាច និងសិទ្ធិជំទាស់ក្នុងការអនុម័តលើសេចក្តីសម្រេចដែលពាក់ព័ន្ធវិធានការរបស់ស្ថាប័នឆ្លើយតប និងប្រឆាំងនឹងការគំរាមកំហែងសន្តិសុខ និងសន្តិភាពគ្រប់ទម្រង់ និងរូបភាពលើពិភពលោក។
បើទោះបីជាជំនួបទ្វេភាគី ដែលអាចជាជំនួបចុងក្រោយផ្លូវការនៃមេដឹកនាំទាំងពីរផងដែរនោះ សម្រេចបានទាំងកិច្ចព្រមព្រៀងសេដ្ឋកិច្ចនិងឆន្ទៈនយោបាយរួមគ្នាក៏ដោយ ភាគីទាំងពីរ នៅតែមានចំណុចខ្ទាស់គ្នាលើបញ្ហាធំមួយនៅក្នុងឧបទ្វីបកូរ៉េផងដែរ។ ហើយនោះគឺ លោកនាយករដ្ឋមន្ត្រី លី បានប្រាប់លោកប្រធានាធិបតី អូបាម៉ា ត្រង់ៗថា ចិន មិនយល់ស្របចំពោះផែនការដំឡើងប្រព័ន្ធការពារមីស៊ីលរបស់អាមេរិកដើម្បីប្រឆាំងកូរ៉េខាងជើង នៅកូរ៉េខាងត្បូងនោះទេ។
សូមជម្រាបផងដែរថា រដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងសេអ៊ូល នៅថ្ងៃទី០៨ ខែកក្កដាកន្លងទៅ បានព្រមព្រៀងជាផ្លូវការក្នុងការដំឡើងប្រព័ន្ធការពារមីស៊ីល(THAAD)របស់អាមេរិកនៅក្នុងទីកដីកូរ៉េខាងត្បូង។ ផែនការនេះ គឺជាផ្នែកមួយនៃការត្រៀមខ្លួន និងការឆ្លើយតបទៅនឹងការបន្តសាកល្បងបាញ់មីស៊ីល និងនុយក្លេអ៊ែររបស់កូរ៉េខាងជើង។
កន្លងមក ចិន ក៏ធ្លាប់ទទូចឲ្យអាមេរិក និងកូរ៉េខាងត្បូង បញ្ឈប់ដំណើរការនៃប្រព័ន្ធការពារនេះជាបន្ទាន់ ហើយ ចៀសវាងសកម្មភាពបង្កភាពស្មុគស្មាញក្នុងតំបន់ ឬបំផ្លាញផលប្រយោជន៍យុទ្ធសាស្ត្រសន្តិសុខរបស់ចិនទៀតផង។ ក្រុងប៉េកាំង ចាត់ទុកថាសកម្មភាពនេះ មិនជួយដល់ទិសដៅនៃការកាត់បន្ថយអាវុធនុយក្លេអ៊ែរនៅក្នុងឧបទ្វីបកូរ៉េនោះទេ តែវា ប្រឆាំងទៅនឹងការប្រឹងប្រែងដោយភាគីពាក់ព័ន្ធតាមរយៈការចរចា និងពិគ្រោះយោបល់ទៅវិញនោះទេ៕
Tag:
អាមេរិក
ចិន
កូរ៉េខាងជើង
កូរ៉េខាងត្បូង
© រក្សាសិទ្ធិដោយ thmeythmey.com