អន្តរជាតិ
កូរ៉េខាងជើងប្រាប់ UN ថា អាមេរិកជាអ្នកធ្វើឲ្យឧបទ្វីបកូរ៉េក្លាយជាចំណុចគ្រោះថ្នាក់ រដ្ឋមន្ត្រីការបរទេសកូរ៉េខាងជើង Ri Yong Ho (រូបភាព UN)
× កូរ៉េខាងជើង បានប្រើវេទិកាមហាសន្និបាតអង្គការសហប្រជាជាតិលើកទី៧១ ដើម្បីវាយប្រហារលើគូសត្រូវអាមេរិក ដោយកូរ៉េខាងជើងអះអាងថា ស្ថានភាពតានតឹងប្រកបដោយការគ្រោះថ្នាក់នៅឧបទ្វីបកូរ៉េ គឺដោយសារតែគោលនយោបាយរបស់អាមេរិក។ ហើយកូរ៉េខាងជើង ក៏ប្រកាសប្រាប់គេឯងថា ខ្លួននឹងបន្តកម្មវិធីនុយក្លេអ៊ែរទៅមុខទៀត ដើម្បីទប់ទល់អាមេរិក និងសម្ព័ន្ធមិត្តកូរ៉េខាងត្បូង។
រដ្ឋមន្ត្រីការបរទេសកូរ៉េខាងជើង លោក Ri Yong Ho បានរិះគន់ខ្លាំងលើអាមេរិក ដែលនៅពីក្រោយស្ថានភាពអាក្រក់កំពុងកើតឡើងនៅឧបទ្វីបកូរ៉េ។ លោក Ri Yong Ho និយាយថា នៅពេលនេះ ឧបទ្វីបកូរ៉េ ក្លាយជាតំបន់ដែលគ្រោះថ្នាក់ជាងគេលើលោក ហើយថែមទាំងអាចផ្ទុះទៅជាសង្គ្រាមនុយក្លេអ៊ែរទៀតផង ហើយដើមហេតុនៃស្ថានការណ៍បែបនេះ គឺគោលនយោបាយបង្កហេតុរបស់អាមេរិក ចំពោះកូរ៉េខាងជើងតែម្ដង។
រដ្ឋមន្ត្រីការបរទេសកូរ៉េខាងជើង ក៏បានរិះគន់សមយុទ្ធយោធារួមគ្នារវាងអាមេរិក និងកូរ៉េខាងត្បូង ដែលរួមបញ្ចូលទាំងការវាយប្រហារនុយក្លេអ៊ែរ សំដៅលើមេដឹកនាំកូរ៉េខាងជើង និងការដណ្ដើមគ្រប់គ្រងរដ្ឋធានីព្យុងយ៉ាង។ លោក Ri Yong Ho និយាយដែរថា កូរ៉េខាងជើងមិនដែលគំរាមវាយប្រហារយោធា និងធ្វើសកម្មភាពគ្រោះថ្នាក់បែបនេះ នៅក្បែរសត្រូវរបស់ខ្លួនយ៉ាងនេះឡើយ។
ជាមួយគ្នានោះ ប្រមុខការទូតកូរ៉េខាងជើង បានប្រាប់អង្គប្រជុំមហាសន្និបាតទៀតថា សង្គ្រាមកូរ៉េមិនទាន់ចប់នៅឡើយទេ ហើយឧបទ្វីបកូរ៉េ ក៏មិនមានយន្តការដោះស្រាយជម្លោះត្រឹមត្រូវដែរ។ ដោយសាររឿងនេះ សកម្មភាពបង្កហេតុដូចជាសមយុទ្ធយោធា ងាយនឹងធ្វើឲ្យភាគីម្ខាងទៀតខឹងសម្បារណាស់ ដែលពេលខ្លះការឆ្លើយតបណាមួយនោះ អាចនឹងក្លាយជាសង្គ្រាមទៀតផង។
លោក Ri Yong Ho ក៏បន្តលើកឡើងថា កូរ៉េខាងជើងតែងតែព្យាយាមគ្រប់បែបយ៉ាង ដើម្បីចៀសវាងជម្លោះប្រដាប់អាវុធ ព្រមគ្នានឹងការចាត់វិធានការចាំបាច់នានាដើម្បីឆ្លើយតបនឹងសកម្មភាពបង្កហេតុនៃសមយុទ្ធរួមគ្នារបស់អាមេរិក និងកូរ៉េខាងត្បូង។ ក្រុងព្យុងយ៉ាង ក៏តែងស្នើឲ្យក្រុមប្រឹក្សាសន្តិសុខកោះប្រជុំបន្ទាន់ នៅពេលដែលមានសមយុទ្ធម្ដងៗ ប៉ុន្តែសំណើនោះ តែងត្រូវបានទាត់ចោលជានិច្ច។
ទន្ទឹមនឹងការរិះគន់ និងការទម្លាក់កំហុសលើអាមេរិកនោះ កូរ៉េខាងជើង ក៏មិនភ្លេចប្រាប់គេឯងពីជំហរបន្តកម្មវិធីនុយក្លេអ៊ែរ ដើម្បីការពារខ្លួននោះ បើទោះជាកន្លងមក សហគមន៍អន្តរជាតិ នាំគ្នាដាក់ទណ្ឌកម្មក៏ដោយ។ រដ្ឋមន្ត្រីការបរទេសកូរ៉េខាងជើង លោក Ri Yong Ho ប្រាប់មហាសន្និបាតថា ក្រុងព្យុងយ៉ាង នឹងពង្រឹងកងកម្លាំងនុយក្លេអ៊ែររបស់ខ្លួន ដើម្បីការពារសេចក្ដីថ្លៃថ្នូរ សិទ្ធិជាប្រទេសមួយ ក៏ដូចជាការពារសន្តិភាព ប្រឆាំងនឹងការគំរាមនុយក្លេអ៊ែររបស់អាមេរិកដែរ៕
Tag:
កូរ៉េខាងជើង
UN
អាមេរិក
នុយក្លេអ៊ែរ
© រក្សាសិទ្ធិដោយ thmeythmey.com