អន្តរជាតិ
ភេរវកម្ម១១ កញ្ញា៖ អូបាម៉ា «វ៉េតូ» ច្បាប់ដែលអនុញ្ញាតឲ្យអ្នករងគ្រោះប្ដឹងអារ៉ាប៊ីសាអូឌីត
× ប្រធានាធិបតីជិតផុតអាណត្តិ បារ៉ាក់ អូបាម៉ា នៅថ្ងៃទី២៤ ខែកញ្ញា បានប្រើសិទ្ធិវ៉េតូរបស់លោកលើច្បាប់ថ្មីដែលអនុញ្ញាតឲ្យជនរងគ្រោះនៃព្រឹត្តការណ៍ភេរវកម្មថ្ងៃទី១១ ខែកញ្ញា ប្ដឹងអារ៉ាប៊ីសាអូឌីត។ ការបដិសេធច្បាប់ថ្មីនេះ នឹងធ្វើឲ្យត្រូវប្រឈមមុខនឹងសភាអាមេរិក ដែលអនុម័តច្បាប់នេះ ហើយគេរំពឹងថា សភាអាមេរិក នឹងទាត់ចោលសិទ្ធិវ៉េតូរបស់ប្រធានាធិបតីលើច្បាប់ថ្មីនេះដែរ។
លោក បារ៉ាក់ អូបាម៉ា បានសម្រេចចិត្ត «វ៉េតូ» លើច្បាប់ស្ដីពី «យុត្តិធម៌ប្រឆាំងនឹងអ្នកគាំទ្រភេរកម្ម» ដែលអនុញ្ញាតឲ្យជនរងគ្រោះ និងគ្រួសារអ្នកដែលសម្លាប់ក្នុងភេរវកម្មថ្ងៃទី១១ ខែកញ្ញា ប្ដឹងរដ្ឋាភិបាលអារ៉ាប៊ីសាអូឌីត ដែលត្រូវចោទថា នៅពីក្រោយហេតុការណ៍នោះ។ លោក អូបាម៉ា និយាយថា ច្បាប់ថ្មីនេះ នឹងប៉ះពាល់ដល់សន្តិសុខអាមេរិក ក៏ដូចជាប៉ះពាល់ដល់ទំនាក់ទំនងជាមួយសម្ព័ន្ធមិត្តដែរ។ លោកបន្តថា ច្បាប់នេះ អាចធ្វើឲ្យមន្ត្រីការទូត និងទាហានអាមេរិក ត្រូវកាត់ក្ដីនៅឯតុលាការប្រទេសផ្សេង។
យោងតាមសារព័ត៌មាន CNN ប្រធានាធិបតីអាមេរិកព្រមានថា ច្បាប់ខាងលើ ក៏នឹងប៉ះពាល់ដល់ប្រសិទ្ធភាពនៃយុទ្ធនាការប្រឆាំងភេរវកម្មរបស់រដ្ឋាភិបាល។ នេះ ក៏ព្រោះតែវាបានដកយកការសង្ស័យលើការពាកព័ន្ធរបស់បរទេស ពីដៃរបស់ក្រុមប្រឹក្សាសន្តិសុខជាតិ និងអ្នកជំនាញនយោបាយអន្តរជាតិ ហើយបែរជាទុកឲ្យតុលារការ ជាអ្នកសម្រេចក្ដីជំនួសវិញនោះ។
ការប្រើអំណាចវ៉េតូដើម្បីបដិសេធច្បាប់នេះ ធ្វើឲ្យសាធារណជន ជាពិសេសជនរងគ្រោះនៃអំពើភេរវកម្មថ្ងៃទី១១ ខែកញ្ញា មិនពេញចិត្តឡើយ។ ជាមួយគ្នានេះ សភាទាំងពីររបស់អាមេរិក ដែលបានអនុម័តច្បាប់នេះ ចាត់វិធានការឆ្លើយតបមិនខាន។ គេរំពឹងថា សភាទាំងពីរ នឹងសម្រេចទាត់ចោលអំណាចវ៉េតូរបស់ប្រធានាធិបតីអាមេរិក នៅសប្ដាហ៍ក្រោយនេះហើយ។
មិនត្រឹមតែជនរងគ្រោះទេ អ្នកនយោបាយជាច្រើន ក៏មិនពេញចិត្តនឹងការសម្រេចចិត្តរបស់លោក អូបាម៉ា ដែរ។ បេក្ខជនប្រធានាធិបតីមកពីបក្សសាធារណរដ្ឋ លោក ដូណាល់ ត្រាំ ចាត់ទុកការសម្រេចចិត្តនេះ ជារឿងគួរឲ្យអាម៉ាស់។ លោកអះអាងថា ប្រធានាធិបតី អូបាម៉ា បានទាត់ចោលឱកាសរបស់ឪពុកម្ដាយ ប្ដីប្រពន្ធ-កូននៃជនរងគ្រោះ ក្នុងការបិទទំព័រនៃការឈឺចាប់ក្នុងជីវិតរបស់ពួកគេ។
បើរាប់ទាំងលើកនេះទៀត ប្រធានាធិបតី បារ៉ាក់ អូបាម៉ា បានប្រើសិទ្ធិពិសេសវ៉េតូ ចំនួន១២ដងហើយ ចាប់តាំងពីលោកចូលកាន់តំណែងពីរអាណត្តិមកនេះ។ ការប្រើសិទ្ធិវ៉េតូទាំង១២នេះ មិនដែលត្រូវបានសភាទាត់ចោលឡើយ។ ប៉ុន្តែលើកនេះ សភាអាមេរិក ហាក់មានជំហរជំទាស់ខ្លាំងនឹងការសម្រេចចិត្តនេះ ហើយជាលើកដំបូងនោះ ពួកគេអាចនឹងបដិសេធសិទ្ធិវ៉េតូប្រធានាធិបតី ដើម្បីបើកផ្លូវឲ្យច្បាប់ខាងលើ ចូលជាធរមាន៕
Tag:
អាមេរិក
អារ៉ាប៊ីសាអូឌីត
១១ កញ្ញា
ភេរវកម្ម
© រក្សាសិទ្ធិដោយ thmeythmey.com