យោធា និស្សិត កម្មករ ថានឹងឆ្លៀតទៅចុះឈ្មោះបោះឆ្នោតក្នុងអំឡុងភ្ជុំបិណ្ឌ

បទយកការណ៍ / បទសម្ភាសន៍

យោធា និស្សិត កម្មករ ថានឹងឆ្លៀតទៅចុះឈ្មោះបោះឆ្នោតក្នុងអំឡុងភ្ជុំបិណ្ឌ

28, Sep 2016 , 8:39 pm

រូបភាព

ដោយ:

ភ្នំពេញ៖ យោធា កម្មករ និស្សិត បានត្រៀមខ្លួនរួចជាស្រេច ក្នុងការធ្វើដំណើរទៅជួបជុំក្រុមគ្រួសារ និងមិត្តភក្តិនៅស្រុកកំណើត ដើម្បីអបអរពិធីបុណ្យភ្ជុំបិណ្ឌ។ ក្រៅពីគម្រោងជួបជុំគ្រួសារ ពួកគេមិនបានបំភ្លេច កាតព្វកិច្ចជាពលរដ្ឋនោះឡើយ ដែលត្រូវចុះឈ្មោះបោះឆ្នោតថ្មី ដើម្បីជ្រើសរើសក្រុមប្រឹក្សាក្នុងឃុំ ឬសង្កាត់របស់ខ្លួន។ ទន្ទឹមនឺងការអះអាងថា នឹងទៅចុះឈ្មោះបោះឆ្នោតក្នុងអំឡុងភ្ជុំបិណ្ឌ ពីសំណាក់ប្រជាពលរដ្ឋ មន្ត្រីទទួលបន្ទុកការងារចុះឈ្មោះបោះឆ្នោតថ្មីវិញ ក៏បានបញ្ជាក់ពីការត្រៀមលក្ខណៈរួចជាស្រេច ក្នុងការផ្តល់សេវាជូនប្រជាពលរដ្ឋ។

លោក កែវ ឧត្តម និស្សិតមកខេត្តស្វាយរៀង គ្រោងទៅស្រុកកំណើតនៅថ្ងៃទី៣០ ខែកញ្ញា ដើម្បីជួបជុំគ្រួសារ និងទៅវត្តធ្វើបុណ្យតាមប្រពៃណីខ្មែរ។ ក្រៅពីជូនអ៊ំទៅវត្ត បុរសមាឌដំបងរូបនេះ ក៏គ្រោងទៅលេងផ្ទះមិត្តភក្តិក្នុងភូមិផងដែរ។ ជាងនេះទៀតនោះ ឧត្តម ក៏ឆ្លៀតពេលទៅចុះឈ្មោះឆ្នោតផងដែរ។ លោក កែវ ឧត្តម បញ្ជាក់យ៉ាងដូច្នេះ៖«ថ្ងៃភ្ជុំបិណ្ឌ ខ្ញុំនឹងឆ្លៀតឱកាសនេះ ទៅចុះឈ្មោះបោះឆ្នោត ពីព្រោះនេះជាពេលទំនេរពីការងារ អ៊ីចឹងកុំឲ្យខាតពេល»។

ចំណែកឯ លោក សឹង វ៉ាន់ឌី ជានាយទាហានជើងគោក នៅស្រុកភ្នំស្រួច ខេត្តកំពង់ស្ពឺ ក៏ឆ្លៀតទៅចុះឈ្មោះបោះឆ្នោត ក្នុងអំឡុងពេលសម្រាកនៃពិធីបុណ្យភ្ជុំបិណ្ឌនេះដែរ។ លោក សឹង វ៉ាន់ឌី បានថ្លែងប្រាប់សារព័ត៌មានថ្មីៗថា លោកនឹងមកជួបជុំក្រុមគ្រួសារដែលរស់នៅភ្នំពេញ នៅថ្ងៃទី២៩ ខែកញ្ញា។ វ៉ាន់ឌី លៃលកពេលវេលាទៅចុះឈ្មោះបោះឆ្នោត នៅក្រោយពិធីបុណ្យភ្ជុំបិណ្ឌ។ «ក្រោយភ្ជុំ ខ្ញុំនឹងទៅចុះឈ្មោះបោះឆ្នោត»។ នេះជាការបញ្ជាក់របស់ នាយទាហានជើងគោករូបនេះ ដែលបន្តប្រាប់ថាមានមិត្តភក្តិរបស់ខ្លួនជាច្រើននាក់ទៀតដែលហ្វឹកហាត់នៅក្នុងបន្ទាយជាមួយគ្នា ក៏គ្រោងនឹងទៅចុះឈ្មោះបោះឆ្នោត នៅក្នុងឱកាសបុណ្យភ្ជុំនេះដែរ។

លោក រស់ សារៀង ក៏ជាពលរដ្ឋម្នាក់ដែលមិនបំភ្លេចពីកាតព្វកិច្ចរបស់ខ្លួនដែរ។ ការចុះឈ្មោះបោះឆ្នោត ជាគម្រោងមួយ ក្នុងចំណោមគម្រោងបីដែលលោក នឹងធ្វើនៅក្នុងអំឡុងពេលនៃពិធីបុណ្យភ្ជុំបិណ្ឌ។ ជាកម្មកររោងចក្រ នៅសង្កាត់ទួលសង្កែ ខណ្ឌឬស្សីកែវ លោក រស់ សារៀង បានរៀបរាប់ពីគម្រោងទាំងបីរបស់ខ្លួនយ៉ាងដូច្នេះថា៖«ខ្ញុំមានគម្រោងបី ទីមួយជួបជុំគ្នាជាមួយគ្រួសារ ទីពីរ គឺជួបជុំពួកម៉ាកនៅស្រុក និងទីបី គឺខ្ញុំទៅចុះឈ្មោះបោះឆ្នោតដើម្បីរើសមេឃុំ»។ ការចុះឈ្មោះបោះឆ្នោត គឺដើម្បីរើសមនុស្សល្អ សម្រាប់ដឹកនាំភូមិឃុំឲ្យរីកចម្រើន និងឈានទៅបោះឆ្នោតរើសតំណាងរាស្ត្រនៅឆ្នាំ២០១៨ ។ នេះជាការបញ្ជាក់បន្ថែមរបស់យុវជនវ័យ ដែលធ្លាប់បានបោះឆ្នោតជ្រើសរើសតំណាងរាស្ត្រកាលពីឆ្នាំ២០១៣ ម្តងរួចហើយនោះ។ មានវ័័យ២៤ឆ្នាំ សារៀង បានបន្តថា៖«វាជាកាតព្វកិច្ច និងតួនាទីក្នុងនាម យើងជាពលរដ្ឋខ្មែរ ដែលត្រូវខិតខំជ្រើសរើសមនុស្សល្អៗ ឲ្យក្លាយជាដឹកនាំ ព្រោះនេះជាសិទ្ធិនយោបាយ»។

ទន្ទឹមនឹងការបញ្ជាក់ពីគម្រោងទៅចុះឈ្មោះបោះឆ្នោតរបស់ពលរដ្ឋនៅថ្ងៃភ្ជុំបិណ្ឌ មន្ត្រីទទួលបន្ទុកការងារចុះឈ្មោះបោះឆ្នោត ក៏បានអះអាងពីការត្រៀមខ្លួនផ្តល់សេវាកម្មជូនពលរដ្ឋនៅក្នុងអំឡុងបុណ្យភ្ជុំបិណ្ឌដែរ។ កញ្ញា ងួន មួយគាង មន្ត្រីផ្នែកការីកុំព្យូទ័រ នៅឃុំមហាភ្ញូង ស្រុកកោះសុទិន ខេត្តកំពង់ចាម បានប្រាប់សារព័ត៌មានថ្មីៗយ៉ាងដូច្នេះថា៖«ខ្ញុំរំពឹងថា ពលរដ្ឋនឹងមកចុះឈ្មោះបោះឆ្នោតកាន់តែច្រើន នៅអំឡុងពេលបុណ្យភ្ជុំបិណ្ឌនេះ ដោយក្រុមការងាររបស់ខ្ញុំ បានត្រៀមខ្លួនរួចរាល់ហើយ ដើម្បីបម្រើពលរដ្ឋ»។ ប៉ុន្តែនេះមិនមែនមានន័យថា កញ្ញា ងួន មួយគាង មិនបានឈប់សម្រាកសោះនៅក្នុងអំឡុងបុណ្យនេះឡើយ។ បើតាម មន្ត្រីរូបនេះ គណៈកម្មាធិការជាតិរៀបចំការបោះឆ្នោត(គ.ជ.ប) បានអនុញ្ញាតឲ្យមន្ត្រីផ្លាស់ប្តូរវេនគ្នាឈប់សម្រាកក្នុងម្នាក់ៗ ចំនួនពីរថ្ងៃ។ សម្រាប់ កញ្ញា ងួន មួយគាង នាងសម្រេចរើសយកថ្ងៃឈប់ នៅថ្ងៃមុនភ្ជុំមួយថ្ងៃ និងថ្ងៃភ្ជុំធំមួយថ្ងៃ។

មួយរយៈចុងក្រោយនេះ ក្នុងមួយថ្ងៃ មានអ្នកមកចុះឈ្នោះបោះឆ្នោតប្រមាណ១០០នាក់។ នេះជាការបញ្ជាក់របស់ កញ្ញា មួយគាង មុននឹងនិយាយពីការរំពឹងទុករបស់ខ្លួនថា នៅថ្ងៃសម្រាកខាងមុខនេះ ពលរដ្ឋនឹងសម្រុកមកចុះឈ្មោះបោះឆ្នោតច្រើន។ បើទោះជាយ៉ាងនេះក្តី មួយគាង មិនបានបញ្ចេញអាកប្បកិរិយាធុញទ្រាន់ ចំពោះការងារដែលគ្មានថ្ងៃឈប់សម្រាក នេះឡើយ ផ្ទុយទៅវិញ មួយគាង ពេញចិត្ត នឹងការងាររបស់ខ្លួន ព្រោះឃើញពលរដ្ឋបានបំពេញតួនាទីរបស់ខ្លួន។

សូមបញ្ជាក់ថា ការចុះឈ្មោះបោះឆ្នោត មានរយៈពេល៣ខែ គឺចាប់ពីថ្ងៃ១ ខែកញ្ញា ដល់ថ្ងៃទី២៩ ខែវិច្ឆិកា ឆ្នាំ២០១៦ ដោយមិនមានការឈប់សម្រាកក្នុងថ្ងៃសៅរ៍ និងថ្ងៃអាទិត្យ ឡើយ។ លើសពីនេះទៀត គ.ជ.ប បានសម្រេចចុះឈ្មោះបោះឆ្នោត នៅថ្ងៃទី២ ខែតុលា ឆ្នាំ២០១៦ ដែលជាថ្ងៃឈប់សម្រាកក្នុងពិធីបុណ្យភ្ជុំបិណ្ឌផងដែរ៕