ជាតិ
អ្នកនាំពាក្យព្រឹទ្ធសភាបញ្ជាក់ថា សម្ដេច សាយ ឈុំ មិនពាក់ព័ន្ធនឹងការទិញអង្ករពីក្រមហ៊ុនABC
×![]()
ភ្នំពេញ៖ អ្នកនាំពាក្យព្រឹទ្ធសភា បានចេញសេចក្ដីថ្លែងការណ៍មួយបញ្ជាក់ថា ការទិញអង្ករចំនួន ៥០ តោន ពីក្រុមហ៊ុន ABC មិនជាប់ពាក់ព័ន្ធជាមួយនឹងសម្ដេច សាយ ឈុំ ឡើយ។ សេចក្ដីថ្លែងការនេះ បានធ្វើឡើងនៅថ្ងៃទី២៩ ខែកញ្ញានេះ បន្ទាប់ពីមានអ្នកប្រើប្រាស់បណ្ដាញសង្គមមួយចំនួនបានផ្សព្វផ្សាយថា សម្តេច សាយ ឈុំ ទិញអង្ករពីក្រុមហ៊ុននេះ ដែលព្រឹទ្ធសភាចាត់ទុកថា ជាការផ្សព្វផ្សាយព័ត៌មានមិនពិត ដែលនាំឲ្យប៉ះពាល់កិត្តិយសថ្នាក់ដឹកនាំព្រឹទ្ធសភា និងព្រឹទ្ធសភា។
កាលពីពេលថ្មីៗនេះ អគ្គលេខាធិការដ្ឋានព្រឹទ្ធសភាបានទិញអង្ករចំនួន ៥០តោន ពីក្រុមហ៊ុន ABC របស់លោក សេង ប៊ុនវេង ហៅអាចារ្យអេ ។ លោក អ៊ុំ សារឹទ្ធ អគ្គលេខាធិការព្រឹទ្ធសភា បញ្ជាក់នៅក្នុងសេចក្តីថ្លែងការណ៍របស់ខ្លួនថា ការផ្សព្វផ្សាយថា សម្តេច សាយ ឈុំ ទិញអង្ករពីក្រុមហ៊ុន ABC នោះ គឺជារឿងបំផ្លើស ដែលធ្វើឲ្យប៉ះពាល់ដល់ថ្នាក់ដឹកនាំព្រឹទ្ធសភា និងស្ថាប័នព្រឹទ្ធសភាទាំងមូល។ ក្នុងបទសម្ភាសន៍ជាមួយកាសែតThe Cambodia Daily លោក អ៊ុំ សារឹទ្ធ អះអាងថា ការទិញអង្ករពីក្រុមហ៊ុន ABC គ្រាន់តែជាទំនាក់ទំនងធម្មតា រវាងអ្នកទិញ និងអ្នកលក់ប៉ុណ្ណោះ។ ករណីនេះ គឺពុំជាប់ពាក់ព័ន្ធជាមួយនឹងសម្ដេច សាយ ឈុំ ដែលជាប្រធានព្រឹទ្ធសភាឡើយ។
សេចក្ដីថ្លែងការណ៍របស់អ្នកនាំពាក្យព្រឹទ្ធសភា នៅថ្ងៃទី ២៩ នេះ ក៏បានបញ្ជាក់ផងដែរថា ចំណាត់ការលើការទិញអង្ករ គឺជាភារកិច្ចរបស់អគ្គលេខាធិការដ្ឋានព្រឹទ្ធសភាទាំងស្រុង។ ចំណាត់ការទិញអង្ករនេះ គឺគោលបំណងជួយសម្រាលទុក្ខលំបាករបស់ប្រជាពលរដ្ឋ និងលើកទឹកចិត្តប្រជាកសិករ ដែលកំពុងប្រឈមនឹងការធ្លាក់ចុះតម្លៃកសិផល ជាពិសេសស្រូវ និង អង្ករ។
ពាក់ព័ន្ធទៅនឹងជម្លោះរវាងក្រុមហ៊ុន ABC ជាមួយភាគីណាមួយនោះ ព្រឹទ្ធសភាបានចាត់ទុកថា ជាបញ្ហាបុគ្គល ហើយការដែលអគ្គលេខាធិការដ្ឋានព្រឹទ្ធសភា ទិញអង្ករពីក្រុមហ៊ុន ABC គឺមិនមែនមានន័យថា ព្រឹទ្ធសភាបង្ហាញជំហរគាំទ្រភាគីក្រុមហ៊ុនABC នោះដែរ៕
Tag:
អ៊ុំ សារឹទ្ធ
សេង ប៊ុនវេង
ព្រឹទ្ធសភាព
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
6 ម៉ោង
