អន្តរជាតិ
គោលដៅអភិវឌ្ឍន៍ប្រកបដោយនិរន្តរភាពរបស់UN មានអ្វីខ្លះ?
× គោលដៅអភិវឌ្ឍប្រកបដោយនិរន្តរភាព ឬហៅថាកាត់ SDGs (Sustainable Development Goals) គឺជាគោលដៅអភិវឌ្ឍន៍របស់អង្គការសហប្រជាជាតិសម្រាប់អនុវត្តរយៈពេល១៥ឆ្នាំ គឺពីឆ្នាំ២០១៥ដល់២០៣០ ដែលត្រូវបានអនុម័តនៅចុងឆ្នាំ២០១៥កន្លងទៅ។ គោលដៅអភិវឌ្ឍន៍នេះ ត្រូវបានចូលមកជំនួសគោលដៅអភិវឌ្ឍន៍សហសវត្សរ៍របស់អង្គការសហប្រជាជាតិដែលអនុវត្តសម្រាប់រយៈពេល១៥ឆ្នាំមុន គឺឆ្នាំ២០០០ ដល់ឆ្នាំ២០១៥។
បើទោះបីជា SDGs ត្រូវបានអនុម័ត និងដាក់ឲ្យអនុម័តជិតមួយឆ្នាំហើយនោះ បញ្ហានេះ នៅតែបន្តលើកឡើងជាបញ្ហានៅឡើយនោះទេនៅក្នុងអង្គការសហប្រជាជាតិ។ ជាពិសេសនោះ នាសម័យប្រជុំពេញអង្គនៃមហាសន្និបាតអង្គសហប្រជាជាតិលើកទី៧១ ដែលទើបតែបញ្ចប់កាលពីសប្តាហ៍មុននោះ មេដឹកនាំពិភពលោក បានបង្ហាញក្តីបារម្ភពីបញ្ហាដូចជាអសមភាពនៃការអភិវឌ្ឍន៍ បញ្ហាសន្តិសុខ និងអស្ថិរជាដើម។
ខាងក្រោមនេះ គឺជាគោលការណ៍អភិវឌ្ឍន៍ប្រកបដោយនិរន្តរភាពទាំង១៧ ដែលមេដឹកនាំពិភពលោក បានប្តេជ្ញាក្នុងការសម្រេចឲ្យបានត្រឹមឆ្នាំ២០៣០។
១. បញ្ចប់ភាពក្រីក្រគ្រប់ទម្រង់នៅគ្រប់ទីកន្លែង
២. បញ្ចប់ភាពអត់ឃា្លន សម្រេចឲ្យបានសន្តិសុខស្បៀង និង អាហារូបត្ថម្ភប្រសើរជាងមុន និង លើកកម្ពស់កសិកម្មមាននិរន្តរភាព
៣. ធានាឲ្យមានជីវភាពប្រកបដោយសុខភាពល្អ និង លើកកម្ពស់សុខុមាលភាពសម្រាប់ មនុស្សគ្រប់រូបនៅគ្រប់វ័យ
៤. ធានាឲ្យមានការអប់រំប្រកបដោយគុណភាពជាបរិយាប័ន្ន(គ្រប់គ្នា ឬទាំងមូល) និង ដោយសមធម៌ ព្រមទាំងលើកកម្ពស់ឳកាសរៀនសូត្រពេញមួយជិវិតសម្រាប់មនុស្សគ្រប់រូប
៥. សម្រេចឲ្យបាននូវសមភាពយេនឌ័រ និងពង្រឹងភាពអង់អាចនៃស្ត្រី និងកុមារីគ្រប់រូប
៦. ធានាវត្តមានទឹក និងការគ្រប់គ្រងទឹក និង អនាម័យដោយនិរន្តភាពសម្រាប់មនុស្សគ្រប់រូប
៧. ធានាឲ្យមានការទទួលបានថាមពលក្នុងតម្លៃដែលអាចជាវបាន ទុកចិត្តបាន មាននិរន្តរភាព និងទំនើប សម្រាប់មនុស្សគ្រប់រូប
៨. លើកកម្ពស់កំណើនសេដ្ឋកិច្ចប្រកបដោយបរិយាបន្ន័ និងចីរភាព មុខរបរពេញលេញ និង ដែលផ្តល់ផល និង ការងារសមរម្យសម្រាប់មនុស្សគ្រប់រូប
៩.កសាងហេដ្ឋារចនាសម្ពន្ធ័ ដែលធន់នឹងអាកាសធាតុ លើកកម្ពស់ឧស្សាហូនីយកម្មជា បរិយាបន្ន័ និង ដែលមាននិរន្តរភាព និង លើកស្ទួយនវានុវន្តន៍
១០. កាត់បន្ថយវិសមភាពនៅក្នុង និង រវាងប្រទេសនានា
១១. ធ្វើឲ្យទីក្រុង និងកន្លែងតាំងលំនៅស្ថានរបស់មនុស្សមានលក្ខណៈបរិយាបន្ន័ សុវត្ថិភាព ធន់ និង មាននិរន្តរភាព
១២. ធានាឲ្យមានការប្រើប្រាស់ និង ផលិតកម្មតាមទម្រង់ដែលមាននិរន្តរភាព
១៣. ចាត់វិធានការជាបន្ទាន់ដើម្បីទប់ស្កាត់នឹងការប្រែប្រួលអាកាសធាតុ និង ការជះឥទ្ធិពល របស់វា
១៤. អភិរក្ស និង ប្រើប្រាស់មហាសមុទ្រ សមុទ្រ ជានិរន្តរភាព និង ធនធនាសមុទ្រសម្រាប់ ការអភិវឌ្ឍន៍ជានិរន្តរភាព
១៥. ការពារ ធ្វើឲ្យមានឡើងវិញ និង លើកកម្ពស់នូវការប្រើប្រាស់ប្រពន្ធ័អេកូឡូស៊ីដែនគោកជានិរន្តភាព គ្រប់គ្រងព្រៃឈើ ទប់ស្កាត់ការកែប្រែទៅជាតំបន់វាលខ្សាច់ និង បញ្ឈប់ និង ប្រឆាំងនឹងការកែប្រែស្ថានភាពដីឲ្យកាន់តែអាក្រក់ និង បញ្ឈប់នូវការធ្វើឲ្យមានការបាត់បង់ ជីវៈចម្រុះ
១៦. លើកកម្ពស់សន្តិភាព និង សង្គមជាបរិយាប័ន្ន សម្រាប់ការអភិវឌ្ឍន៍ជានិរន្តរភាព ផ្តល់នូវ យុត្តធម៌សម្រាប់រាល់គ្នា និង ធ្វើឲ្យវាកាន់តែមានប្រសិទ្ធភាព ស្ថានប័នប្រកបដោយការទទួលខុសត្រូវ និង បរិយាប័ន្នគ្រប់លំដាប់ថ្នាក់
១៧. រឹតបន្តឹង រាល់មធ្យោបាយក្នុងការអនុវត្ត និង ពង្រឹងភាពជាដៃគូជាសកលសម្រាប់ការអភិវឌ្ឍន៍ ជានិរន្តរភាព៕
© រក្សាសិទ្ធិដោយ thmeythmey.com