កម្ពុជាត្រៀមកម្លាំងចម្រុះ ៧ពាន់នាក់ការពារសុវត្ថិភាពប្រធានាធិបតីចិន

ជាតិ

នយោបាយជាតិ

កម្ពុជាត្រៀមកម្លាំងចម្រុះ ៧ពាន់នាក់ការពារសុវត្ថិភាពប្រធានាធិបតីចិន

04, Oct 2016 , 1:03 pm

រូបភាព

សម្ដេច ហ៊ុន សែន ជួបលោក ស៊ី ជីនពីង ក្នុងទីក្រុងប៉េកាំង កាលពីឆ្នាំ២០១៤

ដោយ:

ភ្នំពេញ៖ កម្លាំងសមត្ថកិច្ចចម្រុះពី ៦ពាន់ ទៅ ៧ពាន់នាក់នឹងពង្រាយការពារសុវត្ថិភាពប្រធានាធិបតីចិន លោក ស៊ី ជីនពីង (Xi Jinping) ពេលលោកមកបំពេញទស្សនកិច្ចផ្លូវការ នៅកម្ពុជា។ នេះបើតាមលោក គៀត ច័ន្ទថារិទ្ធ អ្នកនាំពាក្យអគ្គស្នងការដ្ឋាននគរបាលជាតិ។

លោក គៀត ច័ន្ទថារិទ្ធ បានឲ្យសារព័ត៌មានថ្មីៗដឹងថា សមត្ថកិច្ចបានរៀបចំវិធានការរឹតបន្តឹងសន្តិសុខជូនប្រធានាធិបតីចិន លោក ស៊ី ជីនពីង រួចរាល់ហើយ។ អ្នកនាំពាក្យ និងជាអគ្គស្នងការរងនៃអគ្គស្នងការដ្ឋាននគរបាលជាតិផងនោះ បានប្រាប់ថា កម្លាំងចម្រុះពីជាង ៦ ទៅ៧ពាន់នាក់ ក្នុងនោះ រួមមាន កម្លាំងកងទ័ព នគរបាលជាតិ កងរាជអាវុធហត្ថ និងកម្លាំងកងអង្គរក្សជាដើម ដែលបានត្រៀមសហការគ្នា រឹតបន្តឹងការពារសន្តិសុខនាពេលខាងមុខនេះ។

នាយឧត្តមសេនីយ៍រូបនេះ បាននិយាយក្រោយកិច្ចប្រជុំនៅថ្ងៃទី៤ ខែតុលានេះយ៉ាងដូច្នេះថា៖«យើងបានត្រៀមកម្លាំងចម្រុះពី ៦ ទៅ៧ពាន់នាក់ ការពារសន្តិសុខតាមគោលដៅសំខាន់ៗ រួចរាល់ហើយ ការពារប្រធានាធិបតីចិន មកបំពេញទស្សនកិច្ច នៅកម្ពុជា ឆាប់ៗខាងមុខនេះ»។

ប្រធានាធិបតីចិន លោក ស៊ី ជីនពីង (Xi Jinping) គ្រោងបំពេញទស្សនកិច្ចជាផ្លូវការនៅកម្ពុជា ក្នុងខែតុលានេះ ដើម្បីពង្រឹងកិច្ចសហប្រតិបត្តិការ រវាងប្រទេសទាំងពីរ ឱ្យកាន់តែខ្លាំងក្លាបន្ថែមទៀត។ នេះបើតាមការចុះផ្សាយរបស់ទីភ្នាក់សារព័ត៌មានជាតិកម្ពុជា (AKP) កន្លងទៅ។

ព័ត៌មាននេះ ចេញផ្សាយក្រោយពីជំនួបរវាងសម្តេច ស ខេង រដ្ឋមន្ត្រីក្រសួងមហាផ្ទៃ និងអនុរដ្ឋមន្ត្រីក្រសួងសន្តិសុខសាធារណៈរបស់ប្រទេសចិន លោក Wang Xiaohong នារសៀលថ្ងៃទី២៧ខែកញ្ញា កន្លងមក។

ពាក់ព័ន្ធនឹងដំណើរទស្សនកិច្ចរបស់ប្រធានាធិបតីចិននេះដែរ អ្នកនាំពាក្យក្រសួងការបរទេស លោក ជុំ សុន្ទរី ពុំទាន់បញ្ជាក់កាលបរិច្ឆេទ និងរបៀបវារៈជាក់លាក់នៅឡើយទេ។ បើតាមលោក ជុំ សុន្ទរី ក្រសួងការបរទេសនឹងចេញផ្សាយព័ត៌មានស្តីពីគម្រោងទស្សនកិច្ចរបស់ លោក Xi Jinping មកកម្ពុជាជាក់លាក់ក្នុងសប្តាហ៍នេះ។

គួរបញ្ជាក់ថា លោក ស៊ី ជិនពីង ធ្លាប់អញ្ជើញមកទស្សនកិច្ចនៅកម្ពុជាម្តងដែរនៅចុងឆ្នាំ២០០៩ ក្នុងពេលលោកបំពេញការងារជាអនុប្រធានាធិបតីចិន៕