ប្រធានាធិបតីហ្វីលីពីន ព្រមានពិនិត្យឡើងវិញលើកិច្ចព្រមព្រៀងយោធាជាមួយនឹងអាមេរិក

អន្តរជាតិ

ប្រធានាធិបតីហ្វីលីពីន ព្រមានពិនិត្យឡើងវិញលើកិច្ចព្រមព្រៀងយោធាជាមួយនឹងអាមេរិក

04, Oct 2016 , 4:51 pm

រូបភាព

ប្រធានាធិបតីហ្វីលីពីនលោក Duterte

ដោយ:

ការរិះគន់របស់រដ្ឋាភិបាលក្រុងវ៉ាស៊ីនតោនលើរដ្ឋបាលថ្មីរបស់ក្រុងម៉ានីលពីចំណាត់ការនៃការបោសសម្អាតបទល្មើសគ្រឿងញៀនដែលបាននិងកំពុងតែប៉ះពាល់ខ្លាំងដល់បញ្ហាសិទ្ធិមនុស្ស បានធ្វើឲ្យលោកប្រធានាធិបតី រ៉ូឌ្រីហ្គូ ឌើទើតេ (Rodrigo Duterte) នៅមិនសុខស្រួលនោះទេ។ លោកប្រធានាធិបតីរូបនោះ បានបន្តបង្ហាញឥរិយាបថ និងគោលនយោបាយការបរទេសប្រឆាំងតបទៅនឹងអាមេរិក ដែលធា្លប់តែជាសម្ព័ន្ធមិត្តយ៉ាងជិតស្និទ្ធរបស់ខ្លួនវិញ។ លោក ថែមទាំងព្រមានពីការពិនិត្យឡើងវិញលើកិច្ចព្រមព្រៀងយោធាផ្លូវការទ្វេភាគីទៀតផង។

-

«ឥលូវ ខ្ញុំ ចង់ដាស់តឿនដល់អាមេរិក ថា កិច្ចព្រមព្រៀងពង្រឹងសហប្រតិបត្តិការយោធា(EDCA) គឺជាលិខិតូបករណ៍ផ្លូវការមែន ប៉ុន្តែ វា គ្រាន់តែត្រូវបានចុះហត្ថលេខាដោយជំនួយការម្នាក់ និងអតីតរដ្ឋមន្ត្រីការពារជាតិហ្វីលីពីនប៉ុណ្ណោះ។ វា មិនបានរួមបញ្ចូលជាមួយនឹងហត្ថលេខារបស់ប្រធានាធិបតីហ្វីលីពីននោះទេ»។ នេះគឺជាសេចក្តីថ្លែងការណ៍របស់លោកប្រធានាធិបតី Rodrigo Duterte នៅថ្ងៃទី០២ ខែតុលានាឱកាសនៃការបើកកម្មវិធីបុណ្យជាតិ MassKara ដែលបានចុះផ្សាយដោយសារព័ត៌មាន The Philippine Star។

លោក ឌើទើតេ ដែលមានរហ័សនាមថា«អ្នកដាក់ទណ្ឌកម្ម» នាឱកាសនោះ ក៏បានសង្កត់ធ្ងន់យ៉ាងដូច្នេះថា «វា(EDCA) មិនបានភ្ជាប់ហត្ថលេខារបស់អតីតប្រធានាធិបតីហ្វីលីពីនលោក Benigno Aquino នោះទេ។ វា គ្មានន័យអ្វីឡើយ។ គិតឲ្យបានពីរដងមើលឥលូវ ! ពីព្រោះខ្ញុំ អាចនឹងស្នើឲ្យអ្នក(កងទ័ព)ចាកចេញពីហ្វីលីពីនទាំងអស់តែម្តង»។

អាមេរិក មិនដាក់ទម្ងន់លើការអត្ថាធិប្បាយរបស់លោកប្រធានាធិបតីហ្វីលីពីន?
ក្រោយមួយថ្ងៃនៃការព្រមានពិនិត្យឡើងវិញលើកិច្ចព្រមព្រៀងយោធានោះ អ្នកនាំពាក្យក្រសួងការពារជាតិអាមេរិក លោក Jeff Davis ក៏បានអះអាងដែរថា ភាគីអាមេរិក ក៏បានដឹងពីការថ្លែងការណ៍នោះដែរ តែលោក មិនដាក់ទម្ងន់លើពាក្យសម្តីប្រធានាធិបតីហ្វីលីពីនប៉ុន្មាននោះទេ ដោយបញ្ជាក់ថា ពាក្យសម្តីនោះ មិនសបញ្ជាក់ដល់សកម្មភាពជាក់ស្តែងឡើយ។ នេះបើយោងតាមសារព័ត៌មាន AFP។

អ្នកនាំពាក្យរូបនោះ ក៏បានបន្ថែមដែរថា សម្ព័ន្ធមេត្រីភាពរវាងអាមេរិក និងហ្វីលីពីន នៅតែស្អិតល្មួត និងស្ថិរភាពតាមមាគ៌ារបស់ខ្លួន ហើយ អាមេរិក នៅតែបន្តសហប្រតិបត្តិការលើការធ្វើលំហាត់យោធា និងជំនួយយោធានៅក្នុងប្រទេសហ្វីលីពីនទៀតផង។ អ្វីគួរកត់សម្គាល់នោះ រដ្ឋមន្ត្រីការពារជាតិអាមេរិក នៅសប្តាហ៍មុននាឱកាសនៃកិច្ចប្រជុំរដ្ឋមន្ត្រីការពារជាតិអាមេរិក-អាស៊ានក្រៅផ្លូវការនៅរដ្ឋហាវ៉ៃនៃសហរដ្ឋអាមរិក ក៏បានអះអាងដែរថា លោក បានមានកិច្ចពិភាក្សាដ៏ល្អ និងផ្លែផ្កាជាមួយនឹងសម្ព័ន្ធមិត្តអាស៊ីអាគ្នេយ៍ដែលរាប់បញ្ចូលទាំងរដ្ឋមន្ត្រីការពារជាតិហ្វីលីពីនផងដែរនោះ។ លោក ចង់សំដៅថា ទំនាក់ទំនងយោធាអាមេរិក និងហ្វីលីពីន នៅក្នុងស្ថានភាពធម្មតានោះទេ បើទោះជា លោក ឌើទើតេ បានព្រមានពិនិត្យឡើងវិញក៏ដោយ។

យ៉ាងណាក៏ដោយ អាមេរិក ក៏មិនអាចមើលស្រាលពីសុន្ទរកថាចុងក្រោយរបស់លោកប្រធានាធិបតីហ្វីលីពីនរូបនោះដែរ។ ហើយនោះ ក៏ព្រោះតែ គិតចាប់ពីការឡើងកាន់អំណាចជាផ្លូវការជាប្រធានាធិបតីហ្វីលីពីននៅថ្ងៃទី៣០ ខែមិថុនាលោក Duterte មិនដែលនិយាយសរសើរពីអាមេរិកម្តងណាឡើយ ពោលគឺ មានតែការរិះគន់ និងផែនការងាកចេញពីសហប្រតិបត្តិការជាមួយនឹងអាមេរិកប៉ុណ្ណោះ។ ជាងនេះទៅទៀតនោះ ទន្ទឹមនឹងអវត្តមាននៃការទទួលស្គាល់ពីទំនាក់ទំនងល្អជាមួយនឹងអាមរិក លោក Duterte បានប្រកាសម្តងហើយម្តងទៀតថា លោក ចង់មានទំនាក់ទំនងល្អជាមួយនឹងរុស្ស៊ី និងចិន ដែលជាដៃគូប្រជែងក្នុងឆាកអន្តរជាតិរបស់អាមេរិកទៅវិញ។

តើអ្វីជាកិច្ចព្រមព្រៀង EDCA ?
ងាកមកចាប់អារម្មណ៍កិច្ចព្រមព្រៀងយោធាហ្វីលីពីន និងអាមេរិកវិញម្តង! កិច្ចព្រមព្រៀងកិច្ចសហប្រតិបត្តិការពង្រឹងវិស័យការពារ (EDCA) គឺជាកិច្ចព្រមព្រៀងរវាងអាមេរិក និងហ្វីលីពីន ដែលបានចុះហត្ថលេខានៅឆ្នាំ២០១៤ ក្រោមរដ្ឋបាលរបស់លោកអតីតប្រធានាធិបតីហ្វីលីពីន ប៊ែរនីណូ អាហ្គីណូ ។ វា បានចូលជាធរមាននៅដើមឆ្នាំ២០១៦ បន្ទាប់ពីតុលាការកំពូលហ្វីលីពីន បានប្រកាសពីធម្មនុញ្ញភាពនៃកិច្ចព្រមព្រៀងនោះ។

កិច្ចព្រមព្រៀងកិច្ចសហប្រតិបត្តិការពង្រឹងវិស័យការពារ ផ្តល់លទ្ធភាពឲ្យកងទ័ពអាមេរិកអាចបំពាក់សព្វាវុធ និងបញ្ជូនកងទ័ពរបស់ខ្លួនមកកាន់ទឹកដីហ្វីលីពីនបានដោយស្របច្បាប់។ បន្ថែមពីនេះ កិច្ចព្រមព្រៀងនេះ ក៏ផ្តល់អត្ថប្រយោជន៍សម្រាប់កងទ័ពហ្វីលីពីន ក្នុងការទទួលបាន ការហ្វឹកហ្វឺនបន្ថែមពីអាមេរិក ការការពារសន្តិសុខដែនសមុទ្រ និងប្រតិបត្តិការមនុស្សធម៌ និងមហន្តរាយផ្សេងៗទៀតផង។

អ្វីគួរកត់សម្គាល់នោះ តាមរយៈកិច្ចព្រមព្រៀងនោះដែរ អាមេរិក នៅខែមីនា ឆ្នាំ២០១៦ ក៏ទទួលបានទីតាំងប្រាំកន្លែងសម្រាប់ដាក់មូលដ្ឋានយោធាកងទ័ពអាកាសដោយស្របច្បាប់នៅក្នុងទឹកដីហ្វីលីពីនទៀតផង៕