មន្ត្រីជាន់ខ្ពស់ទទួលបន្ទុកពលកម្មអន្តរជាតិអាមេរិកពិនិត្យមើលស្ថានភាពការងារនៅកម្ពុជា

ជាតិ

មន្ត្រីជាន់ខ្ពស់ទទួលបន្ទុកពលកម្មអន្តរជាតិអាមេរិកពិនិត្យមើលស្ថានភាពការងារនៅកម្ពុជា

04, Oct 2016 , 10:19 pm

រូបភាព

ដោយ:

អ្នកស្រី Sarah Fox តំណាងពិសេសទទួលបន្ទុកផ្នែកកិច្ចការពលកម្មអន្តរជាតិរបស់ក្រសួងការបរទេសអាមេរិក បានបំពេញទស្សកិច្ចនៅក្នុងប្រទេសកម្ពុជារយៈពេលពីថ្ងៃ ពោលគឺចាប់ពីថ្ងៃទី ទី ៣ ដល់ថ្ងៃទី ៤ តុលា។ ដំណើរមកកាន់កម្ពុជារបស់មន្ត្រីអាមេរិករូបនេះ ដើម្បីពិនិត្យស្ថានភាពលក្ខខណ្ឌការងារ និងការគោរពសិទ្ធិរបស់កម្មករនិយោជិត និងបញ្ហាប្រឈមក្នុងវិស័យការងារមួយចំនួននៅក្នុងប្រទេសកម្ពុជា។

អំឡុងពេលបំពេញទស្សនកិច្ចនៅក្នុងប្រទេសកម្ពុជារយៈពេលពីរថ្ងៃមកនេះ អ្នកស្រី Sarah Fox បានជួបជាមួយមន្ត្រីជាន់ខ្ពស់រដ្ឋាភិបាលមួយចំនួន មន្ត្រីអង្គការពលកម្មអន្តរជាតិប្រចាំនៅកម្ពុជា(ILO) អង្គការសង្គមស៊ីវិល សហជីព និងវិស័យឯកជនមួយចំនួនទៀត។ គោលដៅនៃជំនួប និងការបំពេញទស្សនកិច្ចរបស់អ្នកស្រី Sarah Fox តំណាងពិសេសទទួលបន្ទុកផ្នែកកិច្ចការពលកម្មអន្តរជាតិរបស់ក្រសួងការបរទេសអាមេរិកលើកដំបូងនេះ ដើម្បីលើកកម្ពស់សេរីភាពក្នុងការចងក្រងជាក្រុម សមាគម និងការចរចាអនុសញ្ញារួម ព្រមទាំងការជំរុញឲ្យមានលក្ខខណ្ឌការងារត្រឹមត្រូវនិងកំណើនសេដ្ឋកិច្ចសម្រាប់កម្មករនយោជិត នយោជក និងប្រទេសកម្ពុជា។

នៅក្នុងជំនួវតុមូលពិសេសជាមួយអ្នកសារព័ត៌មានជាតិ និងអន្តរជាតិនៅស្ថានទូតអាមេរិកនៅថ្ងៃអង្គារទី ៤ ខែតុលានេះ នៅស្ថានទូតអាមេរិកប្រចាំនៅកម្ពុជា អ្នកស្រី Sarah Fox បានថ្លែងថា អ្នកស្រីមិនអាចវាយតម្លៃថា ស្ថានភាពស្តង់ដាពលកម្មការងារនៅក្នុងប្រទេសកម្ពុជាស្ថិតនៅក្នុងកម្រិតណាមួយឲ្យច្បាស់នោះឡើយ។ តែអ្នកស្រីយល់ថា រដ្ឋាភិបាលកម្ពុជា បានបោះជំហានយ៉ាងមានសារៈសំខាន់ ដើម្បីដោះស្រាយបញ្ហាជួញដូរពលកម្ម ដែលជាក្តីកង្វល់របស់អង្គការក្រៅរដ្ឋាភិបាល និងរដ្ឋាភិបាលអាមេរិក។ «យើងសាទរដែលកម្ពុជាដាក់ចេញនូវជំហាននេះ។ រដ្ឋាភិបាលសហរដ្ឋអាមរិក នឹងសហការជាមួយរដ្ឋាភិបាលកម្ពុជា ដើម្បីដោះស្រាយបញ្ហានេះ»។ នេះជាការបញ្ជាក់របស់អ្នកស្រី Sarah Fox ។

តែយ៉ាងណាតំណាងពិសេសទទួលបន្ទុកផ្នែកកិច្ចការពលកម្មអន្តរជាតិរបស់ក្រសួងការបរទេសអាមេរិក ក៏ឆ្លៀតបង្ហាញក្តីកង្វល់របស់រដ្ឋាភិបាលអាមេរិកចំពោះច្បាប់ស្តីពីសហជីព ដែលទើបតែចូលជាធរមានកាលពីពេលថ្មីៗនេះ ដែលមានចំណុចខ្លះ មិនស្របតាមច្បាប់អន្តរជាតិ ។ «យើងជំរុញឲ្យរដ្ឋាភិបាល ប្រឹក្សាជាមួយ ILO អំពីច្បាប់ស្តីពីសហជីព ដែលបានចូលជាធរមាន។ យើងមានក្តីកង្វល់នូវចំណុចមួយចំនួននៃច្បាប់នេះ»។ មានប្រសាសន៍ដូច្នេះហើយអ្នកស្រី ក៏ស្នើឲ្យរដ្ឋាភិបាលជួបពិភាក្សាជាមួយនិយោជក កម្មករនិយោជិត និងអង្គការក្រៅរដ្ឋាភិបាល ដើម្បីរកដំណោះស្រាយជុំវិញក្តីកង្វល់នេះ។

សូមបញ្ជាក់ថា ក្រៅពីបំពេញទស្សនកិច្ចនៅក្នុងប្រទេសកម្ពុជា អ្នកស្រី Sarah Fox ក៏បានបំពេញទស្សនកិច្ចនៅក្នុងប្រទេសមីយ៉ាន់ម៉ាផងដែរ។ នៅមីយ៉ាន់ម៉ា អ្នកស្រី បានជួបមន្ត្រីរដ្ឋាភិបាល និងអ្នកពាក់ព័ន្ធសំខាន់ៗជាច្រើន ក្នុងគោលដៅកែទម្រង់ច្បាប់ការងារ និងការកសាងសមត្ថភាពស្ថាប័ន ដើម្បីឲ្យមានការគោរពសិទ្ធិការងារងារជាមូលដ្ឋាននៅក្នុងប្រទេសមីយ៉ាម៉ា៕