ជាតិ
រដ្ឋមន្ត្រីបរិស្ថាន ប្រាប់«ឧកញ៉ារកស៊ីឈើ»ឲ្យបញ្ឈប់…
× រដ្ឋមន្ត្រីក្រសួងបរិស្ថាន លោក សាយ សំអាល់ បានថ្លែងប្រាប់អ្នកកាសែតអំពីផែនការសកម្មភាពច្រើនដំណាក់កាលដែលលោកបាន និងកំពុងអនុវត្តដើម្បីបញ្ចប់ការកាប់ឈើ និងការជួញដូរឈើខុសច្បាប់នៅកម្ពុជា។
នៅក្នុងវេទិកានិពន្ធនាយកសារព័ត៌មានស្តីពីបញ្ហាបរិស្ថាន ដែលត្រូវបានរៀបចំឡើងកាលពីថ្ងៃទី៦ខែតុលា លោករដ្ឋមន្ត្រីបរិស្ថានបានប្រាប់ឲ្យដឹងថា លោកបានជួបជជែកគ្នាជាមួយក្រុមអ្នក «រកស៊ីឈើ»កម្រិតខ្ពស់ និងបានប្រាប់ពួកគេឲ្យបញ្ឈប់ជំនួញនេះ។ បើគេស្តាប់ឮការរៀបរាប់របស់លោករដ្ឋមន្ត្រី នេះគឺជាវិធានការមួយនៅក្នុងយុទ្ធនាការលុបបំបាត់ការកាប់បំផ្លាញព្រៃឈើខុសច្បាប់នៅកម្ពុជា។
«អ្នកខ្លះបានដូរមុខរបរ។ អ្នកខ្លះទៀតមិនទាន់ច្បាស់។ យើងបានបង្កើតគណៈកម្មការបង្ក្រាបតែម្តង។ អ្នកសម្រេចចិត្តថយចេញ គឺល្អ តែអ្នកមិនទាន់សម្រេចចិត្តថយទេ ត្រូវបានបង្ក្រាប។ ហើយជាយុទ្ធសាស្ត្រ គឺយើងបានបិទព្រំដែនតែម្តង»។ នេះជាការរៀបរាប់របស់លោក សាយ សំអាល់នៅក្នុងវេទិកានិពន្ធនាយកសារព័ត៌មាន ដែលរៀបចំដោយក្លិបអ្នកកាសែតកម្ពុជា ក្រោមជំនួយឧបត្ថម្ភរបស់គម្រោងភាពជាដៃគូអភិវឌ្ឍន៍តំបនទន្លេមេគង្គដើម្បីបរិស្ថាន។
នៅក្រោយវេទិកានិពន្ធនាយកនោះ អ្នកកាសែតបានតាមសួរលោករដ្ឋមន្ត្រីអំពីអត្តសញ្ញាណនៃក្រុមអ្នករកស៊ីឈើកម្រិតខ្ពស់ ដែលលោកបានជួបជជែកគ្នា។ ឆ្លើយទាំងរារែកបន្តិច លោករដ្ឋមន្ត្រីវ័យក្មេងបានរៀបរាប់ឈ្មោះអ្នកទាំងនោះ៖«យើងបាននិយាយជាមួយឧកញ៉ាខ្នា, ទ្រីភាព, អុល, និង ថៃផងដែរ»។ លោករដ្ឋមន្ត្រីបានបញ្ជាក់បន្ថែមថា ពួកគេបាន «ដូរមុខរបរ»។
បើតាមការអះអាងរបស់លោក សាយ សំអាល់ បន្ទាប់ពីចាត់វិធានការប្រឆាំងនឹងក្រុមអ្នករកស៊ីឈើកម្រិតខ្ពស់ លោកក៏កំពុងតែមានចំណាត់ការទល់នឹងក្រុមឈ្មួញថ្នាក់មធ្យម និងតូច ដែលអាចកំពុងជ្រកក្រោមស្លាក ដេប៉ូឈើ។ ត្រង់នេះដែលលោករដ្ឋមន្ត្រីក៏អំពាវនាវដល់អ្នកសារព័ត៌មានឲ្យជួយផ្តល់ព័ត៌មានជាក់លាក់ដល់លោកផងដែរ ដើម្បីបង្ក្រាបឈ្មួញ«រកស៊ីឈើខុសច្បាប់»៕
Tag:
សាយ សំអាល់
ព្រៃឈើ
© រក្សាសិទ្ធិដោយ thmeythmey.com