កីឡាជាតិ
ជាតិ
លោក Lee Tae Hoon ថា កម្ពុជាធ្វើបានល្អ តែចាញ់កម្ពស់ មាឌ និងបច្ចេកទេសរបស់ហុងកុង រួបថតពីសហព័ន្ធបាល់ទាត់កម្ពុជា
×
ក្រុមជម្រើសជាតិកម្ពុជាបានបរាជ័យ ២-០ នៅមុខអ្នកគាំទ្រប្រមាណជាជាង៤ម៉ឺននាក់ក្នុងជំនួបមិត្តភាពអន្តរជាតិជាមួយក្រុមហុងកុងនៅលើទឹកដីរបស់ខ្លួនកាលពីយប់ថ្ងៃទី៦ ខែតុលា។ ការបរាជ័យនេះលោកគ្រូបង្វឹកក្រុមជម្រើសជាតិកម្ពុជាបានបកស្រាយថា ដោយសារកីឡាករហុងកុងមានមាឌធំ និងកម្ពស់ខ្ពស់ជាងកម្ពុជា ជាពិសេសកម្រិតបច្ចេកទេស។ ទោះបីចាញ់ក៏ដោយ ប៉ុន្តែលោកបញ្ជាក់ថា កម្ពុជាធ្វើបានល្អក្នុងជំនួបមួយនេះ។
អ្នកគាំទ្រប្រមាណជាជាង៤ម៉ឺននាក់នៅក្នុងពហុកីឡដ្ឋានជាតិបានធ្វើទឹកមុខក្រៀមក្រំ ក្រោយក្រុមជម្រើសជាតិកម្ពុជារងការបរាជ័យ ២-០ ក្រោមថ្វីជើងរបស់ក្រុមជម្រើសជាតិហុងកុងដែលមានមាឌធំ ខ្ពស់ និងកីឡាករស្បែកខ្មៅចូលសញ្ជាតិហុងកុង។ នេះជាលើកទី២សម្រាប់កម្ពុជាដែលចាញ់ក្រុមហុងកុងនាជំនួបមិត្តភាពអន្តរជាតិក្នុងឆ្នាំ២០១៦នេះ ដោយលើកមុននៅដើមខែកញ្ញា កម្ពុជាបានចាញ់ក្នុងលទ្ធផល ៤-២ នៅលើទឹកដីហុងកុង។
ក្នុងសន្និសីទសារព័ត៌មានក្រោយចប់ការប្រកួតកាលពីយប់ថ្ងៃទី៦ ខែតុលា លោក Lee Tae Hoon គ្រូបង្វឹកក្រុមជម្រើសជាតិកម្ពុជាបានបញ្ជាក់ប្រាប់អ្នកសារព័ត៌មានយ៉ាងដូច្នេះថា៖«ខ្ញុំទទួលស្គាល់ក្រុមហុងកុងមានកម្រិតបច្ចេកទេសខ្ពស់ជាងក្រុមជម្រើសជាតិកម្ពុជា។ ម្យ៉ាងទៀតកីឡាកររបស់ហុងកុងមានមាឌធំ និងកម្ពស់ខ្ពស់ជាងកម្ពុជា ហើយពួកគេលែងបាល់លើដែលជាហេតុបង្ករការលំបាកសម្រាប់កម្ពុជាក្នុងការដណ្តើមបាល់»។
ទោះបីជាក្រុមកម្ពុជារងការបរាជ័យ និងមានមតិមួយចំនួនរិះគន់ពីទម្រង់លេងរបស់កម្ពុជាថាមិនសូវល្អយ៉ាងណាក៏ដោយ ប៉ុន្តែលោកគ្រូបង្វឹកជនជាតិកូរ៉េខាងត្បូងរូបនេះបានអះអាងថា កូនក្រុមរបស់លោកធ្វើបានល្អក្នុងជំនួបមិត្តភាពអន្តរជាតិជាមួយក្រុមហុងកុងនៅលើកនេះ។
យ៉ាងណាមិញ លោកទទួលស្គាល់ថា កម្ពុជានូវមានភាពខ្វះខាតខាងផ្នែកគ្រប់គ្រងបាល់ជាក្រុម ហើយលោកនឹងកែលម្អចំណុចខ្វះខាតទាំងនេះ ដើម្បីត្រៀមជួបប្រកួតមិត្តភាពអន្តរជាតិជាមួយក្រុមជម្រើសជាតិរបស់ប្រទេសស្រីលង្កា នៅពហុកីឡដ្ឋានជាតិ នាថ្ងៃទី៩ ខែតុលា ស្អែកនេះ។ ជាពិសេសដើម្បីត្រៀមធ្វើជាម្ចាស់ផ្ទះនៃការប្រកួតវគ្គជម្រុះពានរង្វាន់ AFF Suzuki Cup ប្រចាំឆ្នាំ២០១៦៕
Tag:
បាល់ទាត់
Lee Tae Hoon
© រក្សាសិទ្ធិដោយ thmeythmey.com