កីឡាជាតិ
ជាតិ
ប្រាក់ មុន្នីឧត្តម ជាកីឡាករគ្រោះថ្នាក់ក្នុងក្រសែភ្នែករបស់គ្រូបង្វឹកក្រុមស្រីលង្កា Prak Muny Udom (រូបភាពហ្វេសប៊ុក៖ FFC)
×
ទោះបីខ្សែប្រយុទ្ធ ប្រាក់ មុន្នីឧត្តម មិនអាចរកគ្រាប់បាល់ជូនក្រុមជម្រើសជាតិកម្ពុជាក្នុងជំនួបមិត្តភាពអន្តរជាតិជាមួយក្រុមហុងកុងនៅពហុកីឡដ្ឋានជាតិ កាលពីយប់ថ្ងៃទី៦ ខែតុលា ក៏ដោយ។ ប៉ុន្តែគ្រូបង្វឹកក្រុមជម្រើសជាតិស្រីលង្កា ដែលបានទស្សនាការប្រកួតនោះបានចាត់ទុកខ្សែប្រយុទ្ធរូបនេះជាកីឡាករអាចបង្កគ្រោះថ្នាក់ដល់ក្រុមលោកក្នុងជំនួបមិត្តភាពអន្តរជាតិនៅពហុកីឡដ្ឋានជាតិនាល្ងាចថ្ងៃទី៩ ខែតុលា ស្អែកនេះ។
ខ្សែប្រយុទ្ធដ៏ឆ្នើមរបស់ក្លិបព្រះខ័នរាជស្វាយរៀង ប្រាក់ មុន្នីឧត្តម បានក្លាយជាកីឡាករឧបសគ្គដ៏ធំម្នាក់ក្នុងក្រសែភ្នែករបស់គ្រូបង្វឹកក្រុមជម្រើសជាតិស្រីលង្កាក្នុងជំនួបមិត្តភាពអន្តរជាតិជាមួយក្រុមជម្រើសកម្ពុជានៅពហុកីដ្ឋានជាតិ នាវេលាម៉ោង៦:៣០នាទីល្ងាច ថ្ងៃទី៩ ខែតុលា ស្អែកនេះ។
ទោះបីខ្សែប្រយុទ្ធ ប្រាក់ មុន្នីឧត្តម មិនអាចរកគ្រាប់ក្នុងជំនួបមិត្តភាពអន្តរជាតិជាមួយក្រុមហុងកុង កាលពីយប់ថ្ងៃទី៦ ខែតុលា ជូនកម្ពុជាក៏ដោយ។ ប៉ុន្តែ លោក Dudley Steinwall គ្រូបង្វឹកក្រុមជម្រើសជាតិស្រីលង្កាដែលបានទស្សនាការប្រកួតបានចាត់ទុកថា ប្រាក់ មុន្នីឧត្តម ជាកីឡាករម្នាក់ដែលមានសមត្ថភាព និងបច្ចេកទេសខ្ពស់ក្នុងការប្រកួត ជាពិសេសរូបគេនឹងក្លាយជាកីឡាករម្នាក់ដែលអាចបង្ករគ្រោះថ្នាក់ដល់ក្រុមរបស់លោកនាការប្រកួតនៅថ្ងៃស្អែកនេះ។
ក្នុងសន្និសីទសារព័ត៌មាននៅវិមានពហុកីឡដ្ឋានជាតិកាលពីព្រឹកមិញ លោក Dubley Steinwall បានបញ្ជាក់យ៉ាងដូច្នេះថា៖«ខ្ញុំសង្កេតឃើញថា ការរៀបចំតាំងពីតំបន់ការពាររហូតដល់តំបន់ប្រយុទ្ធរបស់កម្ពុជា គឺរៀបចំមានទម្រង់ កលល្បិច និងបច្ចេកទេសល្អ។ ហើយសម្រាប់កីឡាករដែលខ្ញុំគិតថា គ្រោះថ្នាក់ និងគួរតែត្រូវប្រយ័ត្នប្រយែងនោះ គឺកីឡាករពាក់អាវលេខ៧ ព្រោះគាត់ជាកីឡាករដែលមានបច្ចេកទេស និងជំនាញក្នុងការប្រកួត»៕
Tag:
បាល់ទាត់
ប្រាក់ មុន្នីឧត្តម
Dudley Steinwall
© រក្សាសិទ្ធិដោយ thmeythmey.com