កីឡាជាតិ
លោក Lee Tae Hoon មិនចង់ឲ្យផ្សាយការប្រកួតទាំងស្រុងរបស់ក្រុមជម្រើសជាតិកម្ពុជាទៅកាន់ពិភពលោក
× ដោយសារមិនចង់ឲ្យក្លិបបាល់ទាត់នៅតំបន់អាស៊ី ក៏ដូចជាពិភពលោកងាយស្រួលសិក្សាពីតិចនិក និងបច្ចេកទេសការប្រកួតរបស់ក្រុមជម្រើសជាតិកម្ពុជា។ លោក Lee Tae Hoon គ្រូបង្វឹកក្រុមជម្រើសជាតិកម្ពុជាបានប្រាប់ដល់បណ្តាប្រព័ន្ធផ្សព្វផ្សាយទាំងអស់មិនគួរផ្សព្វផ្សាយពីសកម្មភាពប្រកួតទាំងស្រុងរបស់ក្រុមជម្រើសជាតិកម្ពុជាទៅកាន់ពិភពលោកនោះទេ។
ស្របពេលវិស័យកីឡាបាល់ទាត់នៅកម្ពុជាមានការរីកចម្រើនជាមួយគ្នានោះប្រព័ន្ធផ្សព្វផ្សាយទៅលើវិស័យកីឡាមួយនេះក៏មានភាពរីកចម្រើន និងទូលំទូលាយផងដែរ។ វាជាហេតុបង្កឲ្យមានភាពងាយស្រួលដល់បណ្តាប្រទេសនៅក្នុងតំបន់អាស៊ី និងពិភពលោកងាយស្រួលសិក្សាស្វែងយល់ពីបច្ចេកទេស និងតិចនិកនៃការប្រកួតរបស់ក្រុមបាល់ទាត់ជម្រើសជាតិកម្ពុជា ជាពិសេសប្រទេសដែលជាគូប្រជែងរបស់កម្ពុជា។ លោក Lee Tae Hoon គ្រូបង្វឹកក្រុមជម្រើសជាតិកម្ពុជាប្រាប់ដល់បណ្តាប្រព័ន្ធផ្សព្វផ្សាយទាំងនោះ គួរជៀសវាងការផ្សព្វផ្សាយពីសកម្មភាពទាំងមូលនៃការប្រកួតរបស់ក្រុមជម្រើសជាតិកម្ពុជា។
ក្នុងសន្និសីទសារព័ត៌មានមុនការប្រកួតមិត្តភាពអន្តរជាតិជាមួយក្រុមស្រីលង្កានៅវិមានពហុកីឡដ្ឋានជាតិកាលពីថ្ងៃទី៨ ខែតុលា លោក Lee Tae Hoon គ្រូបង្វឹកក្រុមជម្រើសជាតិកម្ពុជាបានបញ្ជាក់យ៉ាងនេះថា៖«ខ្ញុំមានរឿងមួយដែលលាក់ទុកក្នុងចិត្តយូរមកហើយចង់ប្រាប់ គឺខ្ញុំចង់បានការយោគយល់ពីបណ្តាញសារព័ត៌មានទាំងអស់ សូមមេត្តាកុំផ្សព្វផ្សាយពទម្រង់លេងរបស់ក្រុមជម្រើសជាតិកម្ពុជាឲ្យពិភពលោកបានដឹងអី គ្រាន់តែចាក់សារឡើងវិញ៤ទៅ៥នាទីត្រង់ចំណុចសំខាន់ៗបានហើយ»។
ការលើកឡើងរបស់លោកគ្រូបង្វឹកជនជាតិកូរ៉េខាងត្បូងនេះ បន្ទាប់ពីលោកត្រឡប់មកពីថតវីដេអូពីសកម្មភាពប្រកួតរបស់ក្រុមជម្រើសជាតិព្រុយណេនៅប្រទេសសិង្ហបុរីកាលពីល្ងាចថ្ងៃសុក្រ ទី៧ ខែតុលា ម្សិលមិញ ដើម្បីចង់ដឹងពីទម្រង់នៃការប្រកួតរបស់ក្រុមមួយនេះ មុនជួបក្នុងវគ្គជម្រុះពានរង្វាន់ AFF Suzuki Cup 2016 ដែលកម្ពុជាធ្វើជាម្ចាស់ផ្ទះ។
គួរបញ្ជាក់ថា ក្រុមជម្រើសជាតិកម្ពុជាត្រូវជួបប្រកួតមិត្តភាពអន្តរជាតិជាមួយក្រុមជម្រើសជាតិស្រីលង្កានាវេលាម៉ោង៦:៣០នាទីល្ងាច ថ្ងៃទី៩ ខែតុលា នៅពហុកីឡដ្ឋានជាតិ មុនត្រៀមធ្វើជាម្ចាស់ផ្ទះនៃការប្រកួតវគ្គជម្រុះពានរង្វាន់ AFF Suzuki Cup 2016 ដែលចាប់ផ្តើមនៅថ្ងៃទី១៥ ខែតុលា ខាងមុខនេះ៕
Tag:
បាល់ទាត់
Lee Tae Hoon
មិត្តភាពអន្តរជាតិស្រីលង្កា
© រក្សាសិទ្ធិដោយ thmeythmey.com