កីឡាជាតិ
ជាតិ
លោកគ្រូ Lee បន្តផ្តល់ឱកាសឲ្យកីឡាករថ្មីៗក្នុងជំនួបជាមួយក្រុមស្រីលង្កាល្ងាចនេះ
×![]()
ក្រុមជម្រើសជាតិកម្ពុជានឹងបើកទ្វារពហុកីឡដ្ឋានជាតិនាវេលាម៉ោង៦:៣០នាទីល្ងាចថ្ងៃទី៩ ខែតុលា នេះ ដើម្បីស្វាគមន៍ក្រុមភ្ញៀវមកពីប្រទេសស្រីលង្កា។ ក្នុងជំនួបមិត្តភាពអន្តរជាតិនេះ លោក Lee Tae Hoon គ្រូបង្វឹកក្រុមជម្រើសជាតិកម្ពុជានឹងបន្តផ្តល់ឱកាសដល់កីឡាករថ្មីៗចូលរួមប្រកួតដូចជំនួបមិត្តភាពជាមួយក្រុមហុងកុង។
ទោះបីមានមតិមួយចំនួនរិះគន់ចំពោះទម្រង់លេង ក៏ដូចជាការផ្លាស់ប្តូរកីឡាករថ្មីៗឲ្យចូលរួមប្រកួតរបស់លោក Lee Tae Hoon ក្នុងជំនួបមិត្តភាពអន្តរជាតិជាមួយហុងកុង ដែលកម្ពុជាបានចាញ់ក្នុងលទ្ធផល ២-០ ក៏ដោយ។ ប៉ុន្តែលោកគ្រូបង្វឹកជនជាតិកូរ៉េខាងត្បូងរូបនេះបានបញ្ជាក់ថា ក្នុងជំនួបមិត្តភាពអន្តរជាតិជាមួយក្រុមស្រីលង្កានៅពហុកីឡដ្ឋានជាតិនាវេលាម៉ោង៦:៣០នាទីល្ងាចនេះ លោក នឹងព្យាយាមផ្តល់ឱកាសដល់កីឡាករថ្មីៗឲ្យចូលរួមប្រកួតដដែល។
ការព្យាយាមផ្តល់ឱកាសដល់កីឡាករថ្មីៗនេះ ដោយសារលោកគ្រូបង្វឹករូបនេះគិតថា វាជាការប្រកួតមិត្តភាពចុងក្រោយសម្រាប់ក្រុមជម្រើសជាតិកម្ពុជា។ អាស្រ័យហេតុនេះលោកត្រូវតែព្យាយាមដាក់កីឡាករថ្មីៗ ដើម្បីមើល ក៏ដូចជាវាស់ស្ទង់កម្រិតបច្ចេកទេសរបស់កីឡាករ ដើម្បីចម្រាញ់ជ្រើសរើសកីឡាករដែលមានសមត្ថភាពសម្រាប់ត្រៀមប្រកួតវគ្គជម្រុះពានរង្វាន់ AFF Suzuki Cup 2016។
ក្នុងសន្និសីទសារព័ត៌មានមុនការប្រកួតកាលពីម្សិលមិញ លោក Lee Tae Hoon បានទទួលស្គាល់ថា ក្រុមស្រីលង្កាជាក្រុមមួយដែលមានទម្រង់លេងល្អ ខ្លាំង និងម៉ត់ចត់បំផុតតាំងពីតំបន់ការពាររហូតដល់តំបន់ប្រយុទ្ធ ដែលអាចធ្វើឲ្យមានការពិបាកសម្រាប់ក្រុមជម្រើសជាតិកម្ពុជាក្នុងការទទួលបានជ័យជម្នះ។
ទោះបីជាយ៉ាងនេះក្តី លោកនឹងព្យាយាមប្រឺងប្រែងឲ្យអស់ពីសមត្ថភាព និងសម្របសម្រួលក្រុមកម្ពុជាទៅតាមកាលៈទេស ដើម្បីបង្កើតឱកាសក្នុងការទម្លុះសំណាញ់ទីរបស់ក្រុមស្រីលង្កា។ ម្យ៉ាងទៀតលោកនឹងព្យាយាមយកជ័យជម្នះ ដើម្បីផ្តល់ជាកាដូ ក៏ដូចជាកម្លាំងចិត្តដល់អ្នកគាំទ្ររាប់ម៉ឺននាក់ដែលគាំទ្រក្រុមជម្រើសជាតិកម្ពុជា។
ជាមួយគ្នានេះ លោក Dudley Steinwall គ្រូបង្វឹកក្រុមជម្រើសជាតិស្រីលង្កាបានបញ្ជាក់ថា ក្រុមជម្រើសជាតិកម្ពុជាមានការរៀបចំបានល្អតាំងពីតំបន់ការពាររហូតដល់តំបន់ប្រយុទ្ធ ពោលគឺការរៀបចំមានទម្រង់ និងកលល្បិចក្នុងការប្រកួតបានល្អ។ ម្យ៉ាងទៀត កីឡាករពោរពេញទៅដោយសមត្ថភាព និងបច្ចេកទេសជាពិសេសកីឡាករ ប្រាក់ មុន្នីឧត្តម ដែលជាកីឡាករដែលអាចបង្កគ្រោះថ្នាក់ដល់ក្រុមរបស់លោក។
ទោះបីជាយ៉ាងណាក៏ដោយ លោករំពឹងថា សម្រាប់ការដឹកនាំប្រកួតមិត្តភាពអន្តរជាតិជាលើកដំបូងរបស់លោកនេះ កូនក្រុមរបស់លោកនឺងធ្វើបានល្អក្នុងជំនួបនៅពហុកីឡដ្ឋានជាតិនាវេលាម៉ោង៦:៣០នាទីល្ងាចនេះ៕
Tag:
បាល់ទាត់
Lee Tae Hoon
មិត្តភាពអន្តរជាតិស្រីលង្កា
© រក្សាសិទ្ធិដោយ thmeythmey.com
