ការប្រកួតពានរង្វាន់ក្របខ័ណ្ឌលីកលំដាប់ទី២របស់កម្ពុជាក្រោយសម្រាកអស់រយៈពេល២សប្តាហ៍កន្លងមកបានចាប់ផ្តើមបើកយុទ្ធនាការប្រជែងវិញហើយ ដោយសប្ដាហ៍ទី២នេះមានការប្រកួតចំនួន៤គូ ដែលធ្វើឡើងនៅលើ៤ទីលានផ្សេងៗគ្នានារសៀលថ្ងៃទី៩ ខែតុលា នេះ។
ក្រោយពីឈប់សម្រាកអស់រយៈពេល២សប្តាហ៍កន្លងមកនេះការប្រកួតពានរង្វាន់លីកលំដាប់ទី២កម្ពុជាបានចាប់ផ្តើមប្រជែងក្នុងសប្តាហ៍ទី២ ដោយនាវេលម៉ោង១៥:៣០នាទីរសៀលថ្ងៃទី៩ ខែតុលានេះ មានការប្រកួតដែលធ្វើឡើងនៅតាមទីលានចំនួន៤ផ្សេងៗគ្នា។
ក្នុងនោះក្រុមខេត្តកំពង់ស្ពឺក្រោយពីរងការលត់របស់ក្រុមសៀមរាបអង្គរ ៦-០ ក្នុងជុំទី១ត្រូវស្វាគមន៍ក្រុមសាលាបាល់ទាត់ជាតិបាទី នៅកីឡដ្ឋានខេត្តកំពង់ស្ពឺ។ ឬឯក្រុមកំពង់ផែស្វយ័តខេត្តព្រះសីហនុក្រោយយកឈ្នះក្រុមសាលាបាល់ទាត់ជាតិបាទី ១-០ ត្រូវជួបជាមួយក្រុមខេត្តកំពង់ឆ្នាំង នៅទីលានសាកលវិទ្យាល័យឡាយហ្វ។
ចំណែកក្រុមអគ្គិសនីកម្ពុជាក្រោយយកឈ្នះខេត្តកំពង់ឆ្នាំ ៣-២ នៅជុំទី១ នឹងប្រើកីឡដ្ឋានខេត្តព្រៃវែង ដើម្បីតទល់ជាមួយក្រុមខេត្តស្វាយរៀង ខណៈក្រុមម្ចាស់ផ្ទះគីរីវង់សុខសែនជ័យក្រោយយកឈ្នះខេត្តស្វាយរៀង ៦-២ ត្រូវស្វាគមន៍ក្រុមភ្ញៀវមជ្ឈមណ្ឌលហ្វឹកហ្វឺនកីឡា ខ.ភ.ម។
គួរបញ្ជាក់ថា ក្រុមគិរីវង់សុខសែនជ័យ អគ្គិសនីកម្ពុជា កំពង់ផែស្វយ័តខេត្តព្រះសីហនុ និងក្រុមសៀមរាបអង្គរ សុទ្ធតែទទួលបាន ៣ ពិន្ទុដូចគ្នាសម្រាប់ការប្រកួតជុំទី ១ នៃក្របខ័ណ្ឌខេមបូឌានលីក២ កាលពីថ្ងៃទី២៥ ខែកញ្ញា កន្លងទៅនេះ៕
*កម្មវិធីប្រកួតលីកលំដាប់ទី២ថ្ងៃទី៩ ខែតុលា នេះ៖
- ម៉ោង១៥:៣០នាទី៖ ខេត្តកំពង់ស្ពឺ ជួប សាលាបាល់ទាត់បាទី នៅកីឡដ្ឋានខេត្តកំពង់ស្ពឺ
- ម៉ោង១៥:៣០នាទី៖ កំពង់ផែស្វយ័តខេត្តព្រះសីហនុ ជួប ខេត្តកំពង់ឆ្នាំង នៅទីលានសាកលវិទ្យាល័យឡាយហ្វ
- ម៉ោង១៥:៣០នាទី៖ អគ្គិសនីកម្ពុជា ជួប ខេត្តស្វាយរៀង នៅកីឡដ្ឋានខេត្តព្រៃវែង
- ម៉ោង១៥:៣០នាទី៖ គីរីវង់សុខសែនជ័យ ជួប មជ្ឈមណ្ឌលហ្វឹកហ្វឺនកីឡា ខ.ភ.ម នៅកីឡដ្ឋានគីរីវង់សុខសែនជ័យ