ពីនេះ ពីនោះ
តើពេលណាត្រូវប្រើ«និវត្ត និង និវត្តន៍» នៅក្នុងអត្ថបទសំណេរ?
×
ភ្នំពេញ៖ ពាក្យថា «និវត្ត និង និវត្តន៍» សាធារណជនមួយចំនួន នៅមានភាពមិនច្បាស់លាស់ នៅក្នុងការសរសេរ ថាពេលណាត្រូវសរសេរ«និវត្ត និង និវត្តន៍»ឡើយ។ មូលហេតុ គឺមិនសូវបានយល់ពីក្បួន វេយ្យាករណ៍ នៃកិរិយាសព្ទ គុណសព្ទ នាមសព្ទ បាលី និងសំស្ក្រឹតនៅក្នុងភាសាខ្មែរ។ ពាក្យថា «និវត្ត និង និវត្តន៍» មានលក្ខខណ្ឌសរសេរដូចខាងក្រោម៖
នៅក្នុងការសរសេរអត្ថបទ សាធារណជនត្រូវចំណាំក្នុងក្បួនវេយ្យាករណ៍ខ្មែរថា បើសរសេរថា«និវត្ត» នោះគឺមានន័យថាពាក្យនេះជាកិរិយាសព្ទ មានន័យថា វិលវិញ, ត្រឡប់វិញ ជាដើម។ ប៉ុន្តែ ប្រើជានាមសព្ទ គឺចាំបាច់ត្រូវសរសេរ«និវត្តន៍» ដែលមានន័យថា ដំណើរវិលត្រឡប់, ការវិលមកវិញ ជាដើម។
ប៉ុន្តែក្នុងករណី សាធារណជន សរសេរពាក្យនេះ ផ្សំជាមួយពាក្យថា «ការ, ក្ដី, សេចក្ដី និងដំណើរ» គឺមិនត្រូវសរសរជាមួយពាក្យ «និវត្តន៍»ឡើយ ព្រោះការសរសេរបែបនេះ មិនត្រឹមត្រូវតាមក្បួនវេយ្យាករណ៍ខ្មែរ នោះទេ។ មូលហេតុគឺដោយសារពាក្យថា «ការ, ក្ដី, សេចក្ដី និងដំណើរ» ជានាមសព្ទ មិនអាចយកមកផ្សំជាមួយពាក្យថា «និវត្តន៍»ទេ ព្រោះជានាមសព្ទដូចគ្នា។
ដោយឡែក ចំពោះពាក្យថា «ការ, ក្ដី, សេចក្ដី និងដំណើរ»នេះ ត្រូវផ្សំជាមួយពាក្យថា «និវត្ត» ទើបត្រឹមត្រូវ។ ឧទាហរណ៍៖ «ការនិវត្ត, ក្ដីនិវត្ត, សេចក្ដីនិវត្ត និងដំណើរនិវត្ត»៕
ដកស្រង់ពីវចនានុក្រមខ្មែររបស់សម្ដេចព្រះសង្ឃរាជ ជួន ណាត
© រក្សាសិទ្ធិដោយ thmeythmey.com