សម្តេច ហ៊ុន សែន យកចិត្តទុកដាក់បាល់ទាត់ តែមិនភ្លេចប្រដាល់ និងកីឡាផ្សេងទៀតឡើយ

កីឡាជាតិ

ជាតិ

សម្តេច ហ៊ុន សែន យកចិត្តទុកដាក់បាល់ទាត់ តែមិនភ្លេចប្រដាល់ និងកីឡាផ្សេងទៀតឡើយ

10, Oct 2016 , 9:19 pm

រូបភាព

សម្តេចហ៊ុន សែន នាការប្រកួតកីឡាបាល់ទាត់ពង្រឹងចំណងមិត្តភាពកម្ពុជា-ថៃ

ដោយ: ថ្មីៗ

ឆ្លើយតបទៅនឹងការបញ្ចេញមតិមួយនៅក្នុងហ្វេសប៊ុក សម្តេចនាយករដ្ឋមន្ត្រី ហ៊ុន សែន បានសរសេរក្រោយក្រុមកីឡាបាល់ទាត់ជម្រើសជាតិកម្ពុជា ឈ្នះស្រីលង្កា ៤-០ នាជំនួបមិត្តភាពកាលពីថ្ងៃទី៩ ខែតុលា ថា សម្តេចមិនដែលមានភាពលំអៀងទៅលើតែបាល់ទាត់នោះឡើយ ពោលគឺសម្រេចយកចិត្តទុកដាក់លើប្រភេទកីឡាទាំងអស់ រួមទាំងប្រដាល់ជាដើម ដោយលើកលែងតែការប្រកួតស្ងាត់ៗ ហើយក្រៅក្របខណ្ឌ។

ពីទីក្រុងបាងកក ប្រទេសថៃ សម្តេចនាយករដ្ឋមន្ត្រី ហ៊ុន សែន រៀបរាប់តាមរយៈហ្វេសប៊ុករបស់ខ្លួនថា សម្តេច ក៏ដូចជារដ្ឋភិបាល បានយកចិត្តទុកដាក់លើគ្រប់ប្រភេទកីឡាដោយគ្មានការរើសអើង។ សម្តេចបានឆ្លើយតបទៅនឹងការបញ្ចេញមតិមួយក្រោយក្រុមជម្រើសជាតិកម្ពុជាឈ្នះស្រីលង្កា ៤-០ ថា៖ «ល្មមដល់ពេលដែលខ្ញុំចេញមកពន្យល់អំពីការលើកឡើងថាយកចិត្តទុកដាក់លើបាល់ទាត់ ខ្វះការយកចិត្តទុកដាក់លើកីឡាប្រដាល់និងកីឡាផ្សេងទៀត។ ប្រសិនលោកអ្នកទៅសួរទូរទស្សន៍បុស្ត៍លេខ៥ CTN បាយ័នដែលបានចាត់តាំង ប្រកួតកីឡាប្រដាល់ខ្មែរ និងបរទេស ខ្ញុំតែងឧបត្ថម្ភជានិច្ចម្នាក់១០០០ដុល្លាទោះចាញ់ក្តីឈ្នះក្តី»។

សម្តេច ហ៊ុន សែន បានគូសបញ្ជាក់ថា រដ្ឋាភិបាលបានដាក់ចេញនូវអនុក្រិត្យកំណត់ក្របខណ្ឌប្រកួតថ្នាក់តំបន់ និងអន្តរជាតិដើម្បីទទួលបានការលើកទឹកចិត្តរហូតមានម៉ូតូអមដំណើរទៀតផង។ សម្តេចលើកឡើងថា៖ «យើងបានកំណត់គ្រប់ប្រភេទកីឡាទាំងអស់ដោយគ្មានការរើសអើង។ អ្វីដែលបងប្អូនត្រូវគិតបើប្រដាល់វាយឈ្នះតែ១នាក់នៅក្រុមហ៊ុនទូរទស្សន៍១ និងមានការឧបត្ថម្ភដោយក្រុមហ៊ុន តើត្រូវលើកទិកចិត្តបែបណា?បើខ្សែក្រវាត់ឬពានរង្វាន់នៃក្រុមហ៊ុនឯកជន គឺក្រុមហ៊ុនឯកជនទទួលខុសត្រូវ។ខ្ញុំធ្វើចលនាជាមួយក្រុមហ៊ុនឯកជនច្រើនណាស់ទើបមានចលនាបែបនេកើតឡើង»។

ជាមួយគ្នានេះផងដែរ សម្តេចនាយករដ្ឋមន្ត្រី បានសម្តែងការអាក់អន់ចំពោះមនុស្សចំនួនដែលមិនយល់ពីលក្ខខណ្ឌដែលត្រូវទទួលបាននូវការលើកទឹកចិត្ត ដូចជាការលើកឡើងថា កីឡាករឈ្នះខ្សែក្រវាត់ពិភពលោក តែមិនទទួលរង្វាន់អ្វីសោះ។ សម្តេចចោទសួរថា៖ « ឯណាខ្សែក្រវាត់ ឬពានវង្វាន់ពិភពលោក? មិនទាន់មានទេ បើប្រដាល់សូម្បីតែ SEA GAME ក៏មិនទាន់មានមេដាយមាសមួយផង។ខ្លួនខ្ញុំផ្ទាល់ធ្លាប់បានទទួលនិងបំពាក់មេដាយជូន ស៊ន សៀវម៉ី សែនរ៉ាឌី និងកែ ឡេង ដែលទាំង៣នាក់សុទ្ធ តែទៅប្រកួតដោយមានការចាត់តាំងនិងប្រកួតក្នុងក្របខណ្ឌដែលអន្តរជាតិទទួលស្គាល់ ហើយត្រូវប្រកួតជម្រុះរហូតដល់ជ័យជម្នះចុងក្រោយ»។

ប្រមុខរដ្ឋាភិបាល បានសំណូមពរដល់កីឡាករកីឡាការនីគ្រប់ប្រភេទកីឡា ឲ្យប្រឹងប្រែង និងប្រកួតឲ្យបានត្រឹមត្រូវតាមក្របខណ្ឌកំណត់កុំទៅប្រកួតស្ងាត់ៗ អត់ក្របខណ្ឌ ហើយឲ្យមនុស្សមិនយល់ប្រកាសថាជាខ្សែក្រវាត់ពិភពលោករហូតទិទៀនថារាជរដ្ឋាភិបាលលំអៀងទៅរកតែបាល់ទាត់។

សូមបញ្ជាក់ថា សម្តេចនាយករដ្ឋមន្ត្រី ហ៊ុន សែន បានចាត់ទុកជ័យជម្នះ ៤-០ របស់កម្ពុជាលើស្រីលង្កាក្នុងជំនួបមិត្តភាពអន្តរជាតិកាលពីយប់ថ្ងៃទី៩ ខែតុលា ថាវាជាការឆ្លុះបញ្ចាំងពីសមត្ថភាព និងការរីកចម្រើននៃវិស័យកីឡានៅកម្ពុជា។ លើសពីនេះ សម្តេចបានផ្តល់ប្រាក់រង្វាន់លើកទឹកចិត្តម្នាក់១ពាន់ដុល្លារដល់ក្រុមកីឡាករ និងគ្រូបង្វឹកថែមទៀតផង៕