កីឡាជាតិ
ជាតិ
លោក Lee ថា កម្ពុជាត្រូវប្ដូរទម្រង់លេង ព្រោះឡាវ ព្រុយណេ និងទីម័រខាងកើត ដឹងពីចំណុចខ្សោយ លោក Lee Tae Hoon គ្រូបង្វឹកក្រុមជម្រើសជាតិកម្ពុជា។ រូបថត Masayori Ishikawa KPT studio
×
ភ្នំពេញ៖ គ្រូបង្វឹកក្រុមជម្រើសជាតិកម្ពុជា លោក Lee Tea Hoon មើលឃើញថា កីឡាករកម្ពុជាភាគច្រើននៅមានចំណុចខ្វះខាត ដែលត្រូវពង្រឹងស្ទីលលេងបន្ថែមទៀត ដើម្បីទប់ទល់ជាមួយ ឡាវ ព្រុយណេ និងទីម័រខាងកើត នៅក្នុងវគ្គជម្រុះ AFF Suzuki Cup ។ សម្រាប់លោក Lee ព្រឹត្តិការណ៍ AFF Suzuki Cup ឆ្នាំនេះ មិនមែនជារឿងងាយស្រួលដល់កម្ពុជានោះទេ ព្រោះគូប្រកួតខ្លួនទាំងបីក្រុមនេះ សុទ្ធតែដឹងពីចំណុចខ្សោយ និងទម្រង់លេងរបស់កម្ពុជា។
បើទោះកម្ពុជា យកឈ្នះក្រុមស្រីលង្កាដោយលទ្ធផល៤ ទល់ ០ ក្នុងការប្រកួតមិត្តភាពអន្តរជាតិក្តី ក៏វាមិនទាន់ជាលទ្ធផលគាប់ចិត្តសម្រាប់លោក Lee Tea Hoon គ្រូបង្វឹកក្រុមជម្រើសជាតិកម្ពុជាដែរ ។ មិនទាន់គាប់ចិត្តដោយសារតែកីឡាករកម្ពុជាភាគច្រើន ធ្វេសប្រហែសក្នុងការគ្រប់គ្រងបាល់ និងមិនទាន់អាចផ្លាស់ប្ដូរល្បឿនវាយសម្រុក និងការពារនៅពេលប្រកួត។ សម្រាប់លោក Lee Tea Hoon បានមើលឃើញថា ចំណុចខ្វះខាតរបស់កីឡាករកម្ពុជាទាំងនេះ គឺជាបញ្ហាដែលពួកគេត្រូវយកចិត្តទុកដាក់ និងពង្រឹងស្ទីលលេង ដើម្បីទប់ទល់ជាមួយ ក្រុមឡាវ ព្រុយណេ និងទីម័រខាងកើត នៅក្នុងវគ្គជម្រុះ AFF Suzuki Cup ខាងមុខនេះ ព្រោះក្រុមទាំងបីនេះសុទ្ធតែដឹងពីចំណុចខ្សោយរបស់កម្ពុជា។
ថ្លែងនៅក្នុងសន្និសីទកាសែត ក្រោយប្រកួតមិត្តភាពអន្តរជាតិជាមួយស្រីលង្កា គ្រូបង្វឹកកម្ពុជារូបនេះ បានបញ្ជាក់ដូច្នេះថា៖«យើងត្រូវការបន្ថែមល្បឿន និងគុណភាពក្នុងការគ្រប់គ្រងបាល់ ព្រោះកីឡាកររបស់យើងភាគច្រើន គឺការផ្លាស់ប្ដូរល្បឿននៅពេលគ្រប់គ្រងខាងក្រៅ ភាគច្រើនមិនទាន់បានល្អ ដោយភាគច្រើនគ្រប់គ្រងចូលទៅដល់ជើងរបស់គូប្រកួតដែលធ្វើឲ្យយើងបាត់បង់បាល់ច្រើន។ សម្រាប់រឿងនេះខ្ញុំគិតថា ឡាវ ទីម័រខាងកើត និងព្រុយណេ ដឹងពីចំណុចខ្សោយ ដឹងពីរបៀបលេងរបស់យើង។ ពួកគេនឹងយកចំណុចខ្សោយយើង ដើម្បីរារាំងជាឧបសគ្គសម្រាប់ពួកយើង ហើយពួកគេនឹងវាយសម្រុកចំណុចខ្សោយយើង។ ដូច្នេះពួកយើងត្រូវតែបង្កើនគុណភាពនូវការផ្លាស់ប្ដូរល្បឿនឲ្យបានលឿនជាមុន និងការគ្រប់គ្រងបាល់ឲ្យមានគុណភាពជាងមុន»។
ទោះជាកីឡាករមានចំណុចខ្វះខាតក្តី តែលោក Lee ក៏មើលឃើញថា ពួកគេបានសហការគ្នា ដោយបង្កើនទម្រង់លេងកាន់តែរីកចម្រើនជាលំដាប់ពីមួយប្រកួតទៅមួយប្រកួត។
នៅថ្ងៃទី១៥ ខែតុលា ខាងមុខ កម្ពុជានឹងស្វាគមន៍ឡាវ សម្រាប់ជំនួបវគ្គជម្រុះ AFF Suzuki Cup មុនប៉ះជាបន្តបន្ទាប់ជាមួយព្រុយណេ និងទីម័រខាងកើត។ ក្រុមដែលមានពិន្ទុខ្ពស់ជាងគេនឹងឈានទៅកាន់វគ្គបន្ត៕
Tag:
កម្ពុជា
ឡាវ
ព្រុយណេ
ទីម័រខាងកើត
AFF
© រក្សាសិទ្ធិដោយ thmeythmey.com