អន្តរជាតិ
ពូទីនលុបទស្សនកិច្ចទៅបារាំង៖ បារាំងធ្លាក់ក្នុងស្ថានភាព«សាច់មិនបានស៊ីយកឆ្អឹងព្យួរក»?
× ប្រធានាធិបតីរុស្ស៊ីវ្ល៉ាឌីមៀ ពូទីន បានសម្រេចចិត្តលុបចោលទស្សនកិច្ចទៅកាន់ប្រទេសបារាំង បន្ទាប់ពីក្រុងប៉ារីសផ្លាស់ប្តូររបៀបវារៈនៃទស្សនកិច្ចរបស់លោក។ រដ្ឋាភិបាលបារាំងលុបចោលកម្មវិធីបើកសម្ពោធមជ្ឈមណ្ឌវប្បធម៌និងសាសនារុស្ស៊ីនៅបារាំង ហើយរក្សាទុកតែកម្មវិធីពិភាក្សាទ្វេភាគីរវាងលោក ពូទីន និងលោក ហ្វ្រង់ស្វ័រ ហូឡង់ លើបញ្ហាស៊ីរីប៉ុណ្ណោះ។ រុស្ស៊ីក៏ទំនងជាងខឹងសម្បារនឹងបារាំងដែលប្រើប្រាស់សិទ្ធិជំទាស់ប្រឆាំងដំណោះស្រាយដែលខ្លួនស្នើឡើងនៅក្រុមប្រឹក្សាសន្តិសុខអង្គការសហប្រជាជាតិ។ ហើយបារាំងក៏មាត់ដាចព្រមានស្នើឲ្យមានការអង្កេតមួយពាក់ព័ន្ធបទឧក្រិដ្ឋសង្គ្រាមដែលរុស្ស៊ីនិងស៊ីរីប្រព្រឹត្ត នៅក្នុងប្រទេសស៊ីរីដែរ។
សូមស្ដាប់ព័ត៌មានលម្អិត៖
ទំនាក់ទំនង បារាំងនិងរុស្ស៊ីកំពុងរកាំរកូសខ្លាំង ក្រោយពេលប្រធានាធិបតីរុស្ស៊ី វ្ល៉ាឌីមៀ ពូទីនសម្រេចលុបចោលដំណើរទស្សនកិច្ចទៅកាន់ប្រទេសបារាំងនៅសប្តាហ៍ក្រោយ។ អ្នកនាំពាក្យវិមានក្រេមឡាំងលោក Dimitry Peskov បានបញ្ជាក់ថា ដំណើរទស្សនកិច្ចរបស់លោក វ្ល៉ាឌីមៀ ពូទីន ត្រូវបាន ពន្យារពេលពិតមែន តែលោកបដិសេធមិនបកស្រាយច្រើនឡើយជុំវិញការលុបចោលដំណើរទស្សនកិច្ចនេះ។ លោកបានអះអាងថា សំណួរពាក់ព័ន្ធមូលហេតុដែលបណ្តាលឲ្យមានការផ្លាស់ប្តូរពេលវេលាទស្សនកិច្ចនេះគួរតែត្រូវគេចោទសួរទៅកាន់ភាគីបារាំង ទើបត្រូវ។
បើតាមអ្នកនាំពាក្យខាងលើដែលត្រូវបានស្រង់សម្តីដោយសារព័ត៌មាន RT ដើមឡើយ លោក វ្ល៉ាឌីមៀ ពូទីន ត្រូវអញ្ជើញទៅទស្សនកិច្ចនៅបារាំងនៅសប្តាហ៍ក្រោយ ដោយលោកត្រូវចូលរួមកម្មវិធីសម្ពោធមជ្ឈមណ្ឌវប្បធម៌និងសាសនារុស្ស៊ីនៅបារាំង ក៏ដូចជាកម្មវិធីពិព័រណ៌ផ្សេងទៀតផងដែរ។ ប៉ុន្តែ រដ្ឋាភិបាលក្រុងប៉ារីសបានសម្រេចលុបចោលរបៀបវារៈទាំងនេះដោយរក្សាទុកតែជំនួបពិភាក្សាទ្វេភាគីរវាងលោក ហ្វ្រង់ស្វ័រ ហូឡង់ និងលោក វ្ល៉ាឌីមៀ ពូទីន ដោយផ្តោតលើតែបញ្ហាស៊ីរីប៉ុណ្ណោះ។
លោក ហ្វ្រង់ស្វ័រ ហូឡង់ បានថ្លែងប្រាប់មេដឹកនាំអឺរ៉ុបនៅក្នុងកិច្ចប្រជុំក្រុមប្រឹក្សាអឺរ៉ុបផងដែរថា លោកនឹងជួបសន្ទនាជាមួយលោក ពូទីន នៅគ្រប់ពេលវេលា ឲ្យតែកិច្ចពិភាក្សាផ្តោតលើការកសាងសន្តិភាពនិងបញ្ចប់បញ្ហានៅស៊ីរី។ បារាំងបច្ចុប្បន្នកំពុងព្យាយាមដើរតួនាទីជាអ្នកបញ្ចប់ជម្លោះនិងកសាងសន្តិភាពនៅស៊ីរី បន្ទាប់ពីក្រុងវ៉ាស៊ីនតោន។ ប៉ុន្តែការលូកដៃរបស់បារាំងចូលក្នុងបញ្ហាជម្លោះស៊ីរី ត្រឹមតែធ្វើឲ្យភាពតានតឹងខ្លាំងជាមុនរវាងលោកខាងលិច និងរុស្ស៊ីប៉ុណ្ណោះ ហើយវាបង្ហាញឲ្យឃើញកាន់តែច្បាស់ថា សង្គ្រាមស៊ីរីជាសង្គ្រាមរវាងលោកខាងលិច និងរុស្ស៊ី ប៉ុណ្ណោះ។
១.រុស្ស៊ីខឹងសម្បារនឹងឥរិយាបទបារាំងក្នុងបញ្ហាស៊ីរី
ថ្វីបើគ្មានការបកស្រាយឲ្យច្បាស់ពីមូលហេតុនៃការលុបចោលដំណើរទស្សនកិច្ចនេះក្តី គេដឹងច្បាស់ថា រុស្ស៊ីខឹងសម្បារនឹងឥរិយាបទរបស់ក្រុងប៉ារីសកន្លងមកពាក់ព័ន្ធការដោះស្រាយបញ្ហាស៊ីរី។ កាលពីសប្តាហ៍មុន បារាំងបានចេញមុខព្រាងដំណោះស្រាយស្តីពីបញ្ហាស៊ីរី។ យោងតាមទីភា្នក់ងារព័ត៌មាន AFP ដំណោះស្រាយនេះទាមទារឲ្យរុស្ស៊ីនិងស៊ីរីបញ្ឈប់ការវាយប្រហារតាមផ្លូវអាកាស និងទាមទារឲ្យមានការដាក់ទោសទណ្ឌលើអ្នកណាប្រព្រឹត្តបទឧក្រិដ្ឋសង្គ្រាមនិងបទឧក្រិដ្ឋប្រឆាំងមនុស្សជាតិដែរ។ ក្រៅពីនេះដំណោះស្រាយនេះស្នើឲ្យមានការគោរពបទឈប់បាញ់ឡើងវិញ និងគោរពច្បាប់មនុស្សធម៌អន្តរជាតិជាដើម។ ប៉ុន្តែរុស្ស៊ីប្រើសិទ្ធិជំទាស់នៅក្រុមប្រឹក្សាសន្តិសុខអង្គការសហប្រជាជាតិទាត់ចោលដំណោះស្រាយនេះកាលពីចុងសប្តាហ៍មុនក្នុងការជជែកដេញដោលគ្នា។
ពេលបោះឆ្នោតជំទាស់ រុស្ស៊ីបានអះអាងថា ដំណោះស្រាយរបស់បារាំងដាក់គំនៀបលើរុស្ស៊ី និងស៊ីរី តែបើកផ្លូវឲ្យក្រុមប្រដាប់អាវុធរួមទាំងក្រុមភេរវជនដូចជាក្រុម Al Nusra ផងដែរ។ តាំងពីដើមមករុស្ស៊ីខឹងអាមេរិកដែលរារែកមិនព្រមចាត់វិធានការប្រឆាំងក្រុមភេរវជននៅស៊ីរីឡើយ។ គោលដៅរបស់ក្រុងវ៉ាស៊ីនតោននិងលោកខាងលិចគឺទម្លាក់លោក អាសាដ ពីតំណែងប៉ុណ្ណោះ។
យ៉ាងណាក៏ដោយចុះ គេនៅឆ្ងល់ថា ហេតុអ្វីបារាំងត្រូវចេញមុខជួយដោះស្រាយបញ្ហានៅស៊ីរីដើម្បីប្រឈមមុខជាមួយរុស្ស៊ីនៅពេលនេះ? ព្រោះជាធម្មតាបន្ទាប់ពីអាមេរិក អង់គ្លេសតែងតែប្រកួតជាមួយបារាំងដើម្បីដណ្តើមយកមុខមាត់នៅក្រុមប្រឹក្សាសន្តិសុខ។ ហើយអង់គ្លេសតែងរិះគន់រុស្ស៊ីមិនសំចៃមាត់។ ប៉ុន្តែលើកនេះអង់គ្លេសហាក់បីដូចជានៅស្ងៀម ហើយបារាំងចេញមុខវិញម្តង។ ប្រហែលជាអង់គ្លេសកំពុងជាប់ដៃដោះស្រាយបញ្ហាក្នុងស្រុក និងរៀបចំចាកចេញពីសហភាពអឺរ៉ុប ហើយទុកឲ្យបារាំងចេញមុខម្តងព្រោះស៊ីរីធ្លាប់«ស្ថិតក្រោមអាណានិគមបារាំង» ផង។
រឿងមួយទៀតដែលរុស្ស៊ីខឹងសម្បារបារាំង គឺ ក្រៅពីស្នើដំណោះស្រាយនៅក្រុមប្រឹក្សាសន្តិសុខ ក្រុងប៉ារីសក៏ស្នើឲ្យ តុលាការព្រហ្មទណ្ឌអន្តរជាតិ (ICC) ស៊ើបអង្កេតបទឧក្រិដ្ឋសង្គ្រាមដែលរុស្ស៊ីនិងរបបដឹកនាំស៊ីរីប្រព្រឹត្ត នៅក្នុងប្រទេសស៊ីរីផងដែរ។ មុនបារាំង ស្នើនេះ លោក ចន ឃែរី ក៏បានលើកឡើងស្រដៀងគ្នាដែរ ដោយអះអាងថា ការទម្លាក់គ្រាប់បែករបស់ រុស្ស៊ីនិងស៊ីរី វាល្មមនឹងអាចឲ្យគេបង្កើតការស៊ើបអង្កេតបទឧក្រិដ្ឋសង្គ្រាមដែលប្រព្រឹត្តដោយភាគីទាំងពីរ។
២.បារាំង៖ សាច់មិនបានស៊ី យកឆ្អឹងព្យួរក?
ថ្វីបើការសម្រេចចិត្តប្រឈមមុខជាមួយរុស្ស៊ីនេះធ្វើឡើងដោយរដ្ឋាភិបាលបារាំងក៏ដោយ មិនមែនមានន័យថា អ្នកនយោបាយបារាំងគាំទ្រនិងចង់ឃើញទំនាក់ទំនងបារាំងនិងរុស្ស៊ីធ្លាក់ចុះខ្លាំងបែបនេះទេ។ អ្នកនយោបាយបារាំងមួយចំនួនចាប់ផ្តើមចេញមុខរិះគន់រដ្ឋបាលរបស់លោក ហ្វ្រង់ស្វ័រ ហូឡង់ ក្រោយលោក ពូទីន សម្រេចចិត្តលុបចោលដំណើរទស្សនកិច្ចនេះ។
អតីតប្រធានាធិបតី និងជាបេក្ខជនប្រធានាធិបតីបារាំងសម្រាប់ការបោះឆ្នោតឆ្នាំក្រោយ លោក នីកូឡា សាកូហ្ស៊ី បានចេញមុខរិះគន់លោក ហ្វ្រង់ស្វ័រ ហូឡង់ ផងដែរ។ លោកបានអះអាងថា លោក ហូឡង់ កំពុងនាំទំនាក់ទំនងរវាងបារាំងនិងសហភាពអឺរ៉ុបទាំងមូលជាមួយរុស្ស៊ីឲ្យធ្លាក់ក្នុងស្ថានភាពគ្រោះថ្នាក់។ លោកពន្យល់ថា ៖ «ខ្ញុំមិនយល់ពីនយោបាយរបស់រដ្ឋាភិបាលបារាំងចំពោះរុស្ស៊ីទេ។ ខ្ញុំមិនឯកភាពជាមួយលោកពូទីន ដែរ ប៉ុន្តែចាំថា វាជាទំនួលខុសត្រូវរបស់បារាំងនិងអឺរ៉ុប ហើយវាជាផលប្រយោជន៍របស់យើងក្នុងការពិភាក្សានិងសន្ទនាជាមួយរុស្ស៊ី»។
ក្រៅពីនេះបេក្ខជនប្រធានាធិបតីបារាំងរូបនេះ បានលើកឡើងថា វាជាកង្វះការទទួលខុសត្រូវមួយ ព្រោះគេមិនអាចផ្លាស់ប្តូរស្ថានភាពឲ្យប្រសើរឡើងឡើយ បើសិនជាគេបន្តជជែកគ្នាតាមខ្យល់និងចេញសេចក្តីថ្លែងការណ៍រៀងខ្លួនដោយវាយប្រហារគ្នា។លោកចោទសួរថា តើគេកំពុងប្រឹងប្រែងទាញសង្គ្រាមត្រជាក់ត្រឡប់មកវិញឬ?
ក្រៅពីនីកូឡា សាកូហ្ស៊ី អ្នកនយោបាយបារាំងផ្សេងទៀតក៏ព្រួតគ្នាទិតៀនលោក ហ្វ្រង់ស្វ័រ ហូឡង់ផដែរ។ ខ្លះបានពន្យល់ថា ការសម្រេចចិត្តរបស់លោក ហ្វ្រង់ស្វ័រ ហូឡង់ បង្ហាញឲ្យឃើញពីភាពខ្សោយរបស់លោកក្នុងការអនុវត្តនយោបាយការបរទេស ហើយក៏កំពុងធ្វើឲ្យគ្រោះថ្នាក់កើនឡើងកាន់តែច្រើននៅមជ្ឈិមបូព៌ាដែរ។
អនុប្រធានសភាបារាំងលោក Jean-Frederic Poisson ជឿជាក់ថា ប្រធានាធិបតីដែលជាអ្នកសង្គមនិយម លោក ហ្វ្រង់ស្វ័រហូឡង់ មិនទាន់យល់ច្បាស់ពីស្ថានការណ៍នៅមជ្ឈិមបូព៌ាជាពិសេសនៅក្នុងប្រទេសស៊ីរីឡើយ។ ការជជែកពិភាក្សាជាមួយរុស្ស៊ីជារឿងចាំបាច់បំផុតសម្រាប់បញ្ចៀសបញ្ហានិងដោះស្រាយវិបត្តិ។ ហើយបើសិនជាការប្រឈមមុខដាក់គ្នារវាងភាគីទាំងពីរកាន់តែខ្លាំង បញ្ហានៅក្នុងតំបន់នេះក៏កាន់តែអាក្រក់និងគ្រោះថ្នាក់ដូចគ្នាដែរ។
ហើយខ្លះទៀតបានអះអាងថា ក្រុងប៉ារីសមិនមាននយោបាយការបរទេសឯករាជ្យច្បាស់លាស់ឡើយពោលគឺធ្វើតាមក្រុងវ៉ាស៊ីនតោនព្រោះតែរងសម្ពាធខ្លាំង។ មេដឹកនាំគណបក្សឆ្វេងនិយមនិងជាប្រធានគណៈកម្មាធិការការពារជាតិនៅសភាបារាំង លោក Djordje Kuzmanovic បានអធិប្បាយថា ប្រធានាធិបតីបារាំងបច្ចុប្បន្នខ្សោយ និងមិនសូវយល់ពីបញ្ហានៅមជ្ឈិមបូព៌ាឡើយ។ ហើយមិនត្រឹមតែប៉ុណ្ណោះ លោក ក៏ជឿជាក់ថា សេណារីយ៉ូដែលជំរុញឲ្យលោក ពូទីន បង្ខំចិត្តលុបចោលទស្សនកិច្ចទៅបារាំងនេះ ជាអ្វីដែលក្រុងវ៉ាស៊ីនតោនបានណែនាំ និងបញ្ជាឲ្យបារាំងធ្វើតាមតែប៉ុណ្ណោះ។ អាមេរិកឯណោះទេ ដែលចាំទទួលយកផល ឯបារាំងត្រឹមតែរងគ្រោះនិងខាតបង់ព្រោះទំនាក់ទំនងជាមួយរុស្ស៊ីល្អក់ករកខ្លាំង៕
© រក្សាសិទ្ធិដោយ thmeythmey.com