ជាតិ
អង្គការភ្លែន ចាប់ផ្ដើមដំណើរការអនុវត្តផែនការយុទ្ធសាស្ត្រប្រចាំប្រទេស៥ឆ្នាំ
× ភ្នំពេញ៖ អង្គការភ្លែនអន្តរជាតិកម្ពុជា បានរៀបចំពិធីដាក់ឲ្យមានការដំណើរការអនុវត្តផែនការយុទ្ធសាស្ត្រប្រចាំប្រទេសឆ្នាំ២០១៦-២០២១ រយៈពេល៥ឆ្នាំ នៅសណ្ឋាគារហ៊ីម៉ាវ៉ារី កាលពីថ្ងៃទី ១១ តុលាកន្លងមកនេះ ក្រោមអធិបតីភាពលោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក Jan Jaap Kleinrensink នាយកប្រចាំប្រទេសរបស់អង្គការភ្លែនអន្តរជាតិកម្ពុជា។
ថ្លែងក្នុងពិធីដាក់ឲ្យមានការចាប់ផ្ដើមអនុវត្តផែនការយុទ្ធសាស្ត្រប្រចាំប្រទេសឆ្នាំ២០១៦-២០២១ លោក Jan Jaap Kleinrensink (យេន យេប ក្លែនរេនស៊ីក) នាយកប្រចាំប្រទេសរបស់អង្គការភ្លែនអន្តរជាតិកម្ពុជា បានមានប្រសាសន៍ថា ផែនការយុទ្ធសាស្ត្រប្រចាំប្រទេសរយៈពេល ៥ឆ្នាំ ដែលអង្គការភ្លែនអន្តរជាតិកម្ពុជាបានចាប់ផ្ដើមអនុវត្តនៅថ្ងៃនេះ ជាផែនការទីបីហើយចាប់តាំងពីអង្គការនេះ បានចាប់ផ្ដើមប្រតិបត្តិការនៅកម្ពុជា តាំងពីឆ្នាំ២០០២មក។
លោក Jan Jaap Kleinrensink បានលើកឡើងថា៖ «ការរួមបញ្ជូលក្មេងស្រី និងស្ត្រីដែលមិនបានទទួលការយកចិត្តទុកដាក់» ដោយប្រើប្រាស់ទិន្នន័យដើម្បីផ្លាស់ប្ដូរជីវិតរបស់ក្មេងស្រី និងស្ត្រីត្រឹមឆ្នាំ២០៣០ គឺជាប្រធានបទតស៊ូមតិជាសកលរបស់អង្គការភ្លែនអន្តរជាតិសម្រាប់ឆ្នាំ២០១៦។ ប្រធានបទនេះស៊ីសង្វាក់គ្នាបំផុតទៅនឹងគោលបំណងរបស់អង្គការ ព្យាយាមសម្រេចបាននូវពិភពលោកមួយប្រកបដោយភាពយុត្តិធម៌ ដែលលើកកម្ពស់សិទ្ធិកុមារ និងសមភាពសម្រាប់ក្មេងស្រី។
ប្រធានអង្គការខាងលើនេះ បានបន្តទៀតថា អង្គការភ្លែន បានជំរុញឲ្យប្រជាជន និងដៃគូរបស់អង្គការភ្លែនចូលរួមក្នុងការបង្កើនសិទ្ធិអំណាចរបស់កុមារ យុវជន និងសហគមន៍ដើម្បីជំរុញឲ្យមានការផ្លាស់ប្ដូរសំខាន់ៗដែលដោះស្រាយឬសគល់នៃការរើសអើងក្មេងស្រី ការផាត់ចេញ និងភាពងាយរងគ្រោះ។ ការធ្វើការជាមូយកុមារ និងសហគមន៍គឺដើម្បីត្រៀមខ្លួន និងឆ្លើយតបនឹងវិបត្តិ និងជម្នះការលំបាកនានា។ ជួយកុមារឲ្យទទួលបានការអភិវឌ្ឍប្រកបដោយសុវត្ថិភាព និងជោគជ័យ ចាប់ពីពេលកើតរហូតដល់ពេញវ័យ។
លោកស្រី សុទ្ធ សាកាន អ្នកឯកទេសគាំពារ និងអភិវឌ្ឍន៍កុមារតូចនៃអង្គការភ្លែនអន្តរជាតិកម្ពុជា បានលើកឡើងថា ការអភិវឌ្ឍន៍សហគមន៍ដោយផ្ដោតការយកចិត្តទុកដាក់លើកុមារ គឺជាយុទ្ធសាស្ត្ររបស់អង្គការភ្លែនក្នុងការអនុវត្តកម្មវិធីចំនួន៥។ កម្មវិធីទាំង៥ស្ដីពី ការធ្វើការជាមូយកុមារ និងសហគមន៍ ការដោះស្រាយវិសមភាពយ៉េនឌ័រ និងអ្នកដែលគេមិនបានរាប់បញ្ជូលនៅក្នុងសង្គម ការចូលរូមជាមួយអង្គការសង្គមស៊ីវិល ការធ្វើការជាមួយរដ្ឋាភិបាល និងការពង្រឹងគណនេយ្យភាពរបស់អង្គការភ្លែន។
អ្នកឯកទេសគាំពារ និងអភិវឌ្ឍន៍កុមារតូចនៃអង្គការភ្លែនអន្តរជាតិកម្ពុជារូបនេះ បានបន្ថែមថា ការប្រឈមរបស់កុមារី នៅក្នុងតំបន់ដាច់ស្រយាល គឺការរៀបការនៅវ័យក្មេង ដោយសារតែស្ថានភាពគ្រួសារជួបការលំបាក ការកង្វះកម្លាំងពលកម្ម ការពិបាកក្នុងការធ្វើដំណើរទៅសិក្សារបស់ក្មេងស្រី និង ការប្រកាន់ទំនៀមទម្លាប់ប្រពៃណីតាមតំបន់ បានបង្ខំឲ្យកុមារីមានស្វាមីនៅវ័យក្មេង។
សូមបញ្ជាក់ថា ផែនការ៥ឆ្នាំនេះ ផ្ដោតទៅលើកម្មវិធីចំនួន៥រួមមាន កម្មវិធីគាំពារ និងអភិវឌ្ឍន៍កុមារតូច, កម្មវិធីទឹកស្អាត និងអនាម័យ, កម្មវិធីអាហារូបត្ថម្ភ, កម្មវិធីកិច្ចការពារកុមារ និងកម្មវិធីអប់រំថ្នាក់បឋមសិក្សា និងការបណ្ដុះបណ្ដាលបច្ចេកទេស និងវិជ្ជាជីវៈ ឆ្នាំ២០១៦-២០២១។ ទាក់ទិនគ្នានេះ អង្គការភ្លែនអន្តរជាតិកម្ពុជា បានចាប់ផ្ដើមប្រតិបត្តិការរបស់ខ្លួននៅកម្ពុជាតាំងពីឆ្នាំ២០០២។ អង្គការភ្លែន បានយកចិត្តទុកដាក់លើផលប្រយោជន៍របស់កុមារ ហើយការអន្តរាគមន៍របស់អង្គការមួយនេះ ចំនួន១៧ខេត្ត បានផ្ដល់អត្ថប្រយោជន៍ផ្ទាល់ដល់កុមារជាង ៦សែននាក់ និងប្រជាជនជិត ៨ម៉ឺនគ្រួសារនៅកម្ពុជា៕
© រក្សាសិទ្ធិដោយ thmeythmey.com