លោកព្រឹទ្ធាចារ្យកីឡា សេង ប៊ុនសុង បង្ហាញបច្ចេកទេសកីឡាហាប់គីដូដល់កីឡាករជិត៨០នាក់

កីឡាជាតិ

ជាតិ

លោកព្រឹទ្ធាចារ្យកីឡា សេង ប៊ុនសុង បង្ហាញបច្ចេកទេសកីឡាហាប់គីដូដល់កីឡាករជិត៨០នាក់

13, Oct 2016 , 8:19 am

រូបភាព

ដោយ:

ព្រឹទ្ធាចារ្យកីឡា សេង ប៊ុនសុង អ្នកសិក្សាស្រាវជ្រាវក្បាច់គុន និងជាអតីតកីឡាករប្រដាល់ប្រចាំទល់ដែនដ៏ល្បីល្បាញនៅទស្សវត្សរ៍១៩៨០ បានបង្ហាញបច្ចេកទេសក្បាច់គុនកីឡាហាប់គីដូដល់កីឡាករកីឡាការិនីប្រមាណជាជាង៧០នាក់។ ការបង្ហាញនេះធ្វើឡើងនៅទីស្នាក់ការនៃគណៈកម្មាធិការជាតិអូឡាំពិកកម្ពុជាក្នុងសិក្ខាសាលា«ការបង្ហាញបច្ចេកទេសកីឡាហាប់គីដូ» កាលពីព្រឹកថ្ងៃទី១២ ខែតុលា។

កីឡាករកីឡាការិនីហាប់គីដូប្រមាណជាជាង៧០នាក់មកពីក្លិបចំនួន៥នៅរាជធានីភ្នំពេញ និងខេត្តបាត់ដំបងទទួលបានបទពិសោធន៍ និងបច្ចេកទេសប្រយុទ្ធកីឡាហាប់គីដូល្អៗ ពីលោកព្រឹទ្ធាចារ្យ សេង ប៊ុនសុង អ្នកសិក្សាស្រាវជ្រាវក្បាច់គុន និងអតីតកីឡាករប្រដាល់សេរីប្រចាំទល់ដែន(កម្ពុជា-ថៃ)ដ៏ល្បីល្បាញនៅទស្សវត្សរ៍១៩៨០។

ការទទួលបានបទពិសោធន៍ និងបច្ចេកទេសល្អៗរបស់កីឡាករកីឡាការិនីហាប់គីដូនេះ ធ្វើឡើងនៅក្នុងសិក្ខាសាលាបង្ហាញបច្ចេកទេសក្បាច់គុនកីឡាហាប់គីដូនៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC) កាលពីព្រឹកថ្ងៃទី១២ ខែតុលា។ កីឡាករទាំងនេះមិនត្រឹមតែទទួលបានបទពិសោធន៍តាមរយៈការបង្ហាញរបស់លោក សេង ប៊ុនសុង ប៉ុណ្ណោះទេ លើសពីនេះទទួលបានការអនុវត្តនៅលើទីលានផ្ទាល់ថែមទៀតផង។

ទោះបីជាលាឈប់ពីតំណែងជាប្រធានសហព័ន្ធខ្មែរកីឡាហាប់គីដូក៏ដោយ ប៉ុន្តែលោកព្រឹទ្ធាចារ្យ សេង ប៊ុនសុង សន្យាថា នឹងបន្តជួយអភិវឌ្ឍន៍វិស័យកីឡាហាប់គីដូកម្ពុជាឲ្យកាន់តែរីកចម្រើនថែម។ មិនត្រឹមតែជួយអភិវឌ្ឍន៍កីឡាហាប់គីដូប៉ុណ្ណោះទេ លោកសន្យាថា នឹងជួយអភិវឌ្ឍន៍វិស័យកីឡាផ្សេងៗទៀត។

លើសពីនេះ ព្រឹទ្ធាចារ្យកីឡារូបនេះ នឹងមកកាន់ប្រទេសកម្ពុជាជាអចិន្ត្រៃយ៍វិញក្នុងរយៈពេល២ឆ្នាំខាងមុខ។ ក្នុងរយៈពេលនោះដែរ លោកនឹងយកពិសោធន៍ដែលទទួលបានពីការសិក្សាស្រាវជ្រាវ និងអនុវត្តន៍ផ្ទាល់ មកជួយសម្របសម្រួល និងកែលម្អរាល់ចំណុចខ្វះខាតមួយចំនួនក្នុងវិស័យកីឡាកម្ពុជាឲ្យមានភាពល្អប្រសើរ។

លោក គង់ ចានធីណា អគ្គលេខាធិការសហព័ន្ធខ្មែរកីឡាហាប់គីដូបានរៀបរាប់ថា សិក្ខាសាលាបង្ហាញបច្ចេកទេសក្បាច់គុនកីឡាហាប់គីដូនេះ មានសារៈសំខាន់ណាស់សម្រាប់កីឡាករកីឡាការិនីក្នុងការទទួលបានបទពិសោធន៍ល្អៗ ដើម្បីអភិវឌ្ឍសមត្ថភាព និងបច្ចេកទេសឲ្យកាន់តែរីកចម្រើន។

លោកបានបន្តថា ក្លិបទាំង៥ដែលចូលរួមសិក្ខាសាលានាថ្ងៃនេះមកពីខេត្តបាត់ដំបងមួយ និងរាជធានីភ្នំពេញ៤ ក្នុងនោះរួមមានក្លិបកីឡាហាប់គីដូមកពីខេត្តបាត់ដំបង, ក្លិប Master Song, ក្លិបប្រ៊ីដតុន បឹងត្របែក, ប្រ៊ីដតុន ស្ទឹងមានជ័យ, និង ក្លិបឥន្ទ្រីយ៍។ ក្នុងសិក្ខាសាលានេះដែរ មានការចែកវិញ្ញាបនប័ត្រ និងបំពាក់ខ្សែក្រវ៉ាត់ខ្មៅ១ដាន់ដល់កីឡាករផងដែរ៕