ជាតិ
នយោបាយជាតិ
សម្ដេច ហ៊ុន សែន ទូលព្រះមហាក្សត្រថា ករណីមេដឹកនាំបក្សប្រឆាំង ជាការពង្រឹងនីតិរដ្ឋ
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានទូលថ្វាយព្រះមហាក្សត្រថា ករណីឯកឧត្តម សម រង្ស៊ី និង ឯកឧត្តម កឹម សុខា គឺជារឿងអនុវត្តច្បាប់ តាមការសម្រេចរបស់តុលាការ។ ការបញ្ជាក់របស់សម្ដេច ហ៊ុន សែន បែបនេះធ្វើឡើងក្រោយពីព្រះមហាក្សត្រ ព្រះបរមនាថ នរោត្តម សីហមុនី បានបញ្ជូនសារលិខិតសុំលើកលែងទោសរបស់មេដឹកនាំបក្សប្រឆាំងទាំងពីររូបនេះ ទៅសម្ដេចត្រួតពិនិត្យ។
ក្រោយទទួលបានលិខិតពីព្រះមហាក្សត្រ ដែលមានការស្នើសុំលើកលែងទោសរបស់ឯកឧត្តម សម រង្ស៊ី និងឯកឧត្តម កឹម សុខា នោះ សម្ដេច ហ៊ុន សែន បានទូលទៅព្រះមហាក្សត្រវិញ ករណីមេដឹកនាំបក្សប្រឆាំងទាំងនេះ គឺជារឿងអនុវត្តច្បាប់សុទ្ធសាធ និងជាកិច្ចការរបស់តុលាការ។ សម្ដេច ហ៊ុន សែន បានលើកទឡ្ហីករណ៍ច្បាប់ត្រង់មាត្រា ១២៨ថ្មី និងមាត្រា១៣០ថ្មីថា៖«អំណាចតុលាការ ជាអំណាចឯករាជ្យហើយគ្មានបុគ្គលណាមួយ នៃនីតិប្បញ្ញត្តិ ឬនីតិប្រតិបត្តិ អាចទទួលអំណាចតុលាការបានឡើយ។ អ្នកប្រព្រឹត្តិខុសច្បាប់ត្រូវទទួលខុសត្រូវចំពោះមុខច្បាប់ ដែលនេះគឺជារឿងធម្មតានៅក្នុងសង្គមនីតិរដ្ឋ»។
សម្តេច ហ៊ុន សែន បានបកស្រាយទូលថ្វាយព្រះករុណាយ៉ាងដូច្នេះ បន្ទាប់ពីសម្តេចបានរំឮកសារបាននៃក្តីក្តាំរបស់មេដឹកនាំគណបក្សប្រឆាំងទាំងពីររូប ដែលកំពុងជំពាក់ទោសទណ្ឌនៅតុលាការ។
លិខិតសម្ដេច ហ៊ុន សែន បានទូលព្រះមហាក្សត្រ បន្ថែមថា ក្នុងនាមជាប្រមុខរាជរដ្ឋាភិបាល សម្ដេច ជឿជាក់មុតមាំ ក្នុងការពង្រឹងនិងការលើកកម្ពស់នីតិរដ្ឋ តាមរយៈការអនុវត្តច្បាប់ឲ្យបានត្រឹមត្រូវម៉ឹងម៉ាត់ និងមានប្រសិទ្ធិភាព ដើម្បីជួយឲ្យប្រទេសជាតិមានរបៀបរៀបរយ ស្ថិរភាព និងសន្តិភាព ក្នុងដំណើរការលទ្ធិប្រជាធិបតេយ្យសេរីពហុបក្សប្រកបដោយចីរភាព។
ការបញ្ជាក់របស់សម្ដេច ហ៊ុន សែន បែបនេះ ក្រោយពីប្រធានគណបក្សសង្គ្រោះជាតិឯកឧត្តម សម រង្ស៊ី និងអនុប្រធានបក្សឯកឧត្តម កឹម សុខា បានដាក់លិខិតស្នើសុំលើកលែងទោសពីព្រះមហាក្សត្រ នរោត្តម សីហមុនី។ លិខិតមេដឹកនាំគណបក្សង្គ្រោះជាតិ បានស្នើព្រះមហាក្សត្រសុំលើកលែងទោស និងទម្លាក់ចោលបទចោទប្រកាន់ចំពោះសកម្មជននយោបាយ ដីធ្លី សិទ្ធិមនុស្ស និងបរិស្ថាន រួមទាំងអគ្គលេខាធិការរង គជប និងមន្ត្រីគណបក្ស ដែលកំពុងជាប់ឃុំ និងរងបទចោទប្រកាន់ពីសំណាក់តុលាការ។ មេដឹកនាំគណបក្សសង្គ្រោះជាតិ លើកឡើងថា ការលើកលែងទោសពួកគេឲ្យមានសេរីភាពវិញ គឺដើម្បីឆ្ពោះទៅរកការបង្រួបបង្រួម ផ្សះផ្សាជាតិ និងឯកភាពជាតិ។
គួរបញ្ជាក់ថា ប្រធានគណបក្សសង្គ្រោះជាតិឯកឧត្តម សម រង្ស៊ី ដែលកំពុងគេចខ្លួននៅក្រៅប្រទេស ជាប់ក្តីក្ដាំពីបទ«បរិហាកេរ្តិ៍» អតីតរដ្ឋមន្ត្រីក្រសួងការបរទេសលោក ហោ ណាំហុង ដែលត្រូវបានតុលាការកាត់ទោសជាប់ពន្ធនាគារ២ឆ្នាំ និងពិន័យជាប្រាក់៨លានរៀល តាមអំណាចសាលក្រមព្រហ្មទណ្ឌ កាលថ្ងៃទី១៣ តុលា ឆ្នាំ២០១១ របស់សាលាដំបូងរាជធានីភ្នំពេញ និងអំណាចសាលដីកា កាលពីថ្ងៃទី ១២ មិនា ឆ្នាំ២០១៣ របស់សាលាឧទ្ធរណ៍។ ក្រៅពីករណីនេះឯកឧត្តម សម រង្ស៊ី ក៏មានជាប់ពាក់ព័ន្ធរឿងក្តីក្ដាំព្រហ្មទណ្ឌមួយចំនួនទៀត ដែលកំពុងស្ថិតនៅក្នុងដៃរបស់តុលាការផងដែរ។
ចំណែកឯកឧត្តម កឹម សុខា អនុប្រធានគណបក្សវិញ ត្រូវបានតុលាការកាត់ទោសឲ្យជាប់ពន្ធនាគារ៦ ខែ និងពិន័យប្រាក់៨ សែនរៀល ពីបទ«បដិសេធក្នុងការចូលខ្លួន»ក្នុងនាមសាក្សីក្នុងសំណុំរឿងសញ្ចារកម្ម តាមមាត្រា៥៣៨ នៃក្រមព្រហ្មទណ្ឌ។ ក្រុមមេធាវីលោក បានដាក់ពាក្យប្ដឹងទៅឧទ្ធរណ៍ ដើម្បីជំទាស់នឹងការសម្រេចរបស់តុលាការក្រុងភ្នំពេញនេះ៕
Tag:
ហ៊ុន សែន
សម រង្ស៊ី
កឹម សុខា
ព្រះមហាក្សត្រ
© រក្សាសិទ្ធិដោយ thmeythmey.com