ជាតិ
បទយកការណ៍ / បទសម្ភាសន៍
សេដ្ឋកិច្ច
អចលនទ្រព្យសៀមរាបឡើងយឺតដោយសារហេដ្ឋារចនាសម្ព័ន្ធមិនទាន់ល្អ លោក តឹម ដារឿន ប្រធានសាលាខេត្តសៀមរាបរបស់ក្រុមហ៊ុន ប៊ុណ្ណា រៀលធី គ្រុប
× សៀមរាប៖ ទីផ្សារអចលនទ្រព្យខេត្តសៀមរាប ត្រូវបានអ្នកជំនាញមើលឃើញថា អាចនឹងឡើងទៀត។ យ៉ាងណា កំណើនវិស័យអចលនទ្រព្យខេត្តសៀមរាប អាចនឹងឡើងបន្តិចបន្តួចតែប៉ុណោះ ដោយហេតុថា ខេត្តទេសចរណ៍មួយនេះ នៅមានភាពខ្វះខាតលើប្រព័ន្ធហេដ្ឋារចនាសម្ព័ន្ធ ទាំងផ្លូវថ្នល់ និងប្រព័ន្ធលូជាដើម។
លោក តឹម ដារឿន អ្នកជំនាញអចលនទ្រព្យរបស់ក្រុមហ៊ុន ប៊ុណ្ណា រៀលធី គ្រុប បានមើលឃើញតិចតួចលើកំណើនទីផ្សារអចលនទ្រព្យក្នុងខេត្តសៀមរាប។ តាមលោក ដារឿន ខេត្តសៀមរាបនៅមានចំណុចខ្វះខាត ឫចំណុចខ្សោយជាច្រើនដែលត្រូវដោះស្រាយ ដូចជាប្រព័ន្ធផ្លូវថ្នល់ លូ ទឹក ភ្លើង ដែលបច្ចុប្បន្ន ខេត្តមួយនេះមានទឹកស្អាតប្រើប្រាស់តែប្រមាណ ៣០ទៅ៤០%តែប៉ុណ្ណោះ។
បញ្ហាមួយទៀត ដែលជះឥទ្ធិពលមិនល្អដល់វិស័យអចលនទ្រព្យដែរនោះ គឺការអនុវត្តច្បាប់សង់សំណង់អាគារ ក្រោម១៤ម៉ែត្រ។ លោក ដារឿន បន្ថែមទៀតថា អាគារទាំងអស់តម្រូវឲ្យសង់មិនឲ្យលើស១៤ម៉ែត្រ ឫស្មើនឹងអាគារ៤ជាន់ ទៅ៥ជាន់តែប៉ុណ្ណោះ។ ក្រៅពីនេះ ក៏មានបញ្ហាលើការធ្វើប្លង់រឹងផងដែរ។ លោក ដារឿន មានសុទិដ្ឋិនិយមថា តម្លៃអចលនទ្រព្យក្នុងខេត្តសៀមរាប អាចមានតម្លៃថ្លៃ ប្រសិនបើអាចសង់សំណង់ខ្ពស់ៗបាន។
យ៉ាងណាក៏ដោយ ក្នុងស្ថានភាពបច្ចុប្បន្ន ប្រធានសាខាខេត្តសៀមរាប របស់ក្រុមហ៊ុន ប៊ុណ្ណា រៀលធី គ្រុប មិនអាចប៉ាន់ស្មានបានទេថា តើតម្លៃអចលនទ្រព្យក្នុងខេត្តទាំងមូលអាចនឹងឡើងថ្លៃវិញនៅពេលណានោះ។ រឿងហេដ្ឋារចនាសម្ព័ន្ធជារឿងមួយ តែរឿងមួយទៀត ដែលធ្វើឲ្យទីផ្សារអចលនទ្រព្យល្អនោះ គឺសេ្ថរភាពនយោបាយក្នុងប្រទេស។ នេះជាការបញ្ជាក់របស់លោក ដារឿន។ លោកបញ្ជាក់ថា ខេត្តសៀមរាប ក៏មិនគួរពឹងទាំងស្រុងលើវិស័យទេសចរណ៍តែមួយមុខនោះដែរ។ ត្រឹមរីស៊ត សណ្ឋាគារ ភោជនីយដ្ឋាន មិនទាន់គ្រប់គ្រាន់សម្រាប់ខេត្តសៀមរាបនោះដែរ៕
សូមស្តាប់បទសម្ភាសរវាងលោក តឹម ដារឿន និងសារព័ត៌មានថ្មីៗ ជុំវិញបញ្ហាទាំងនេះដូចតទៅ
© រក្សាសិទ្ធិដោយ thmeythmey.com