ការប្រកួតកីឡាជាតិលើកទី១ (National Games) ដែលធ្វើឡើងនៅរាជធានីភ្នំពេញចាប់ពីថ្ងៃទី២៥ ខែតុលា ដល់ថ្ងៃទី៥ ខែវិច្ឆិកា មាន១៥ប្រភេទកីឡាចូលរួម។ ជាមួយគ្នានេះ ប្រភេទកីឡាបាល់ទះបានកំណត់វិញ្ញាសាប្រកួតរបស់ខ្លួនរួចរាល់ហើយ គឺកីឡាបាល់ទះឆ្នេរខ្សាច់ និងកីឡាបាល់ទះក្នុងសាល។
ក្រុមកីឡាបាល់ទះក្នុងសាល២៨ក្រុម និងបាល់ទះឆ្នេរខ្សាច់៥ក្រុម នឹងធ្វើការប្រកួតប្រជែងគ្នាក្នុងព្រឹត្តិការណ៍កីឡាជាតិលើកទី១ ដែលប្រព្រឹត្តទៅចាប់ពីចាប់ពីថ្ងៃទី២៥ ខែតុលា ដល់ថ្ងៃទី៥ ខែវិច្ឆិកា នៅរាជធានីភ្នំពេញ។ ជាមួយគ្នានេះការប្រកួតក្នុងសាលចែកចេញជាពីរផ្នែក គឺផ្នែកនារីមាន៩ក្រុម និងផ្នែកបុរសមាន១៩ក្រុម។
សម្រាប់ការប្រកួតត្រូវធ្វើការបែងចែកជាក្រុម ក្នុងនោះផ្នែកនារីចែកចេញជាពីរពូល(A&B)ដោយពូលA មាន៥ក្រុម(ខេត្តព្រះវិហារ, កណ្តាល, កោះកុង, បន្ទាយមានជ័យ និងក្រចេះ) និងពូលB មាន៤ក្រុម(ខេត្តកំពត, ពោធិ៍សាត់, ត្បូងឃ្មុំ និងតាកែវ)។
ចំណែកផ្នែកបុរសចែកចេញជា៤ពូល(A, B, C &D) ក្នុងនោះពូលAមាន៥ក្រុម(ព្រៃវែង, ព្រះសីហនុ, កំពង់ធំ, រតនគីរី និងក្រសួងមហាផ្ទៃ) ឬឯពូលB(កំពង់ចាម, មណ្ឌលគីរី, កំពត, ពោធិ៍សាត់ និងរាជធានីភ្នំពេញ) ចំណែកពូលC(កោះកុង, កែប, ត្បូងឃ្មុំ, កណ្តាល និងព្រះវិហារ) និងពូលD(បាត់ដំបង, ឧត្តរមានជ័យ, ប៉ៃលិន និងកំពង់ស្ពឺ)។
ដោយឡែក ការប្រកួតកីឡាបាល់ទះឆ្នេរខ្សាច់ដែលមាន៥ក្រុមចូលរួម(សៀមរាប, ក្រសួងការពារជាតិ, ស្ទឺងត្រែង, កំពង់ឆ្នាំង និងព្រះសីហនុ) មិនមានបែងចែកជាពូលនោះទេ ដោយក្រុមទាំងនេះធ្វើការប្រកួតវិលជុំតែម្តង។ គួរបញ្ជាក់ថា ការប្រកួតក្នុងសាលដែលធ្វើឡើងក្នុងទីលាន ពហុកីឡដ្ឋាន និងក្លិបបាល់ទះវិសាខា គ្រោងចាប់ផ្តើមពីថ្ងៃទី២៦ តុលា ដល់ថ្ងៃទី៤ វិច្ឆិកា។ ចំណែកបាល់ទះឆ្នេរខ្សាច់គ្រោងចាប់ផ្តើមពីថ្ងៃទី៣០ តុលា ដល់ថ្ងៃទី៥ វិច្ឆិកា។
គួរបញ្ជាក់ផងដែរថា កីឡាទាំង១៥ប្រភេទដែលដាក់ឲ្យចូលរួមប្រកួតក្នុងកីឡាជាតិលើកទី១រួមមាន៖ ចំបាប់, ល្បុក្កតោ, អត្តពលកម្ម, ហែលទឹក, វាយសី, វាយកូនឃ្លីលើតុ, វាយកូនបាល់, បាល់បោះ, បាល់ទាត់, បាលទះ, ប្រដាល់, តេក្វាន់ដូ WTF, កាយសម្ព័ន្ធ, ប៉េតង់ និងសូរិនហ្សិកាំប៉ូ៕