គ្រូបង្វឹកកម្ពុជា ឡាវ ព្រុយណេ និងទីម័រខាងកើត ថា ក្រុមទាំង៤ មានសមត្ថភាពមិនលើសគ្នាទេ

កីឡាជាតិ

គ្រូបង្វឹកកម្ពុជា ឡាវ ព្រុយណេ និងទីម័រខាងកើត ថា ក្រុមទាំង៤ មានសមត្ថភាពមិនលើសគ្នាទេ

15, Oct 2016 , 1:42 pm

រូបភាព

គ្រូបង្វឹកឡាវ (អាវខៀវ) កម្ពុជា(អាវខ្មៅ) ទីម័រចាងកើត (អាវសលាយទឹកក្រូច) ព្រុយណេ(អាវលឿង)

ដោយ:

គ្រូបង្វឹកក្រុមជម្រើសជាតិកម្ពុជា ឡាវ ព្រុយណេ និងទីម័រខាងកើត សុទ្ធតែទទួលស្គាល់ពីភាពខ្លាំងរបស់គូប្រជែងរៀងៗខ្លួន ។ ពួកគេប្តេជា្ញថា នឹងដឹកនាំក្រុមឲ្យបានល្អក្នុងវគ្គជម្រុះពានរង្វាន់ AFF Suzuki Cup 2016 នាល្ងាចនេះនៅពហុកីឡដ្ឋានជាតិ។ ក្រុមជម្រើសជាតិកម្ពុជាត្រូវស្វាគមន៍ក្រុមឡាវ ខណៈក្រុមព្រុយណេត្រូវតទល់ជាមួយក្រុមទីម័រខាងកើត។

លោក Lee Tae Hoon គ្រូបង្វឹកក្រុមជម្រើសជាតិកម្ពុជាបានបញ្ជាក់ថា ក្រុមរបស់លោកបានត្រៀមខ្លួនរួចជាស្រេចសម្រាប់ជំនួបដ៏សំខាន់ជាមួយឡាវនាល្ងាចនេះ។ លោកទទួលស្គាល់ថា ក្រុមឡាវជាក្រុមដែលមានសមត្ថភាពប្រហាក់ប្រហែលនឹងក្រុមកម្ពុជា ជាពិសេសក្រុមនេះមានកីឡាករពោរពេញទៅដោយបច្ចេក និងកោសល្យក្នុងការប្រកួតច្រើន។

ជាមួយគា្ននេះ លោក Valakone Phomphady គ្រូបង្វឹកក្រុមជម្រើសជាតិឡាវបានរៀបរាប់ថា លោកទទួលស្គាល់ក្រុមទាំង៤សុទ្ធសឹងមានសមត្ថភាពប្រហាក់ប្រហែលគ្នា និងមានគោលដៅទៅកាន់វគ្គបន្តដូចគ្នា។ ដូច្នេះសម្រាប់ការប្រកួតនៅថ្ងៃនេះសុទ្ធសឹងត្រូវការឈ្នះរៀងៗខ្លួន។ អាស្រ័យហេតុនេះលោកមិនអាចទាយទុកចំពោះលទ្ធផលយ៉ាងណានោះទេ ដោយត្រូវរង់ចាំមើលលទ្ធផលនៃការប្រកួតចប់។ លោកទទួលស្គាល់ថា ក្រុមកម្ពុជាមានចំណុចវិជ្ជមានច្រើន ព្រោះកាលពីពេលថ្មីៗលោកបានទស្សនាការប្រកួតមិត្តភាពអន្តរជាតិជាមួយក្រុមស្រីលង្កា និងហុងកុង។

ទន្ទឹមនឹងនេះ លោក Fernando Rogério de Alcântara គ្រូបង្វឹកក្រុមជម្រើសជាតិទីម័រខាងកើតក៏មិនខុសពីគ្រូបង្វឹកក្រុមជម្រើសជាតិឡាវនោះដែរ ដោយបានចាត់ទុកក្រុមទាំង៤មានកម្រិតសមត្ថភាពមិនលើសគ្នានោះទេ ហើយលោកបានត្រៀមខ្លួនរួចរាល់ហើយក្នុងការតទល់ជាមួយព្រុយណេនារសៀលនេះ។

លោក Mike Wong Mun Heng គ្រូបង្វឹកក្រុមជម្រើសជាតិប្រ៊ុយណេបាននិយាយថា លោកមានអារម្មណ៍សប្បាយរីករាយដែលបានមកកាន់កម្ពុជា ហើយលោកសង្ឃឹមថា កូនក្រុមរបស់លោកនឹងរីករាយក្នុងការប្រកួត ជាពិសេសក្រុមលោកក៏ត្រៀមខ្លួនរួចរាល់ហើយដែរ។ ទោះបីក្រុមលោកមានសមាជិកមកពីលីគកំពូលអង់គ្លេស ប៉ុន្តែលោកមិនផ្តោតសំខាន់លើបុគ្គលម្នាក់ៗនោះទេ គឺលោកផ្តោតសំខាន់លើក្រុមទាំងមូល។

ក្នុងជំនួបវគ្គជម្រុះជុំដំបូងនៃពានរង្វាន់ AFF Suzuki Cup 2016 នៅពហុកីឡាដ្ឋានជាតិនាល្ងាចថ្ងៃទី១៥ ខែតុលា នេះ ក្រុមម្ចាស់ផ្ទះកម្ពុជាត្រូវស្វាគមន៍ក្រុមជម្រើសជាតិឡាវនាវេលាម៉ោង៦:៣០នាទីល្ងាច។ ចំណែកក្រុមជម្រើសព្រុយណេ ត្រូវតទល់ជាមួយក្រុមជម្រើសជាតិទីម័រខាងកើតនាវេលាម៉ោង៣:៣០នាទីរសៀល។

គួរបញ្ជាក់ថា សម្រាប់ការប្រកួតវគ្គជម្រុះពានរង្វាន់ AFF Suzuki Cup 2016 ដែលកម្ពុជាធ្វើជាម្ចាស់ផ្ទះនេះ ប្រសិនបើក្រុមណាក្នុងចំណោមក្រុមទាំង៤ ដែលមានពិន្ទុខ្ពស់ជាងគេនឹងឡើងទៅកាន់វគ្គបន្តនៃពានរង្វាន់នេះ។ ដូច្នេះសម្រាប់ជំនួបនាល្ងាចនេះជាការប្រកួតមួយដ៏សំខាន់ក្នុងស្វែងរក៣ពិន្ទុរៀងៗខ្លួន៕