កីឡាជាតិ
អង្គភាពកីឡាក្រសួងមហាផ្ទៃនឹងបញ្ជូនកីឡាករ៩ប្រភេទកីឡាឲ្យចូលរួមប្រកួតកីឡាជាតិលើកទី១
× អង្គភាពកីឡារបស់ក្រសួងមហាផ្ទៃនឹងបញ្ជូនកីឡាករកីឡាការិនី៩ប្រភេទកីឡាឲ្យចូលរួមប្រកួតក្នុងព្រឹត្តិការណ៍កីឡាលើកទី១ ប្រចាំឆ្នាំ២០១៦ ដែលនឹងប្រព្រឹត្តទៅចាប់ពីថ្ងៃទី២៥ តុលា ដល់ថ្ងៃទី៥ វិច្ឆិកា នៅរាជធានីភ្នំពេញ។ ក្នុងចំណោមប្រភេទកីឡាទាំង៩ កីឡាហែលទឹកជាកី្តរំពឹងខ្ពស់ទីមួយក្នុងការដណ្តើមបានមេដាយ។
អង្គភាពកីឡាក្រសួងមហាផ្ទៃនឹងបញ្ជូនកីឡាករកីឡាករ៩ប្រភេទកីឡាដែលមានអត្តពលិកសរុបចំនួន១៤៤នាក់ ឲ្យចូលរួមប្រកួតកីឡាជាតិលើកទី១ដែលជាផែនការមេដំបូងដើម្បីពង្រឹងសមត្ថភាព និងបច្ចេកទេសរបស់កីឡាករនិងចៅក្រម អាជ្ញាកណ្តាលសម្រាប់ត្រៀមការប្រកួតស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
បើយោងតាម លោក ជា ប៊ុនហេង ប្រធានអង្គភាពកីឡាក្រសួងមហាផ្ទៃបានបញ្ជាក់ថា កីឡាទាំង៩ប្រភេទដែលគ្រោងនឹងបញ្ជូនឲ្យចូលរួមកីឡាជាតិលើកទី១រួមមាន ហែលទឹក, អត្តពលកម្ម, ល្បុក្កតោ, ប្រដាល់, ប៉េតង់, វាយកូនបាល់, បាល់ទាត់, បាល់ទះ និងបាល់បោះ(បុរស-នារី)។
ក្នុងចំណោមកីឡាទាំង៩ប្រភេទនេះ លោកប្រធានអង្គភាពកីឡាក្រសួងមហាផ្ទៃរំពឹងថា នឹងអាចដណ្តើមបានមេដាយលើគ្រប់ប្រភេទកីឡាពីព្រឹត្តិការណ៍នេះ។ ប៉ុន្តែលោកចាត់ទុកប្រភេទកីឡាហែលទឹកជាក្តីរំពឹងខ្ពស់ជាងគេក្នុងការដណ្តើមមេដាយមាស ខណៈកីឡាអត្តពលកម្មជាក្តីរំពឹងទី២។ ហើយលោករំពឹងថា អង្គភាពកីឡាក្រសួងមហាផ្ទៃនឺងដណ្តើមបានមេដាយច្រើនជាងគេក្នុងចំណោម២៥ខេត្តក្រុង និងក្រសួងការពារជាតិ។
កីឡាហែលទឹកដែលជាប្រភេទកីឡាក្តីរំពឹងក្នុងដណ្តើមមេដាយ អង្គភាពក្រសួងមហាផ្ទៃនឹងបញ្ជូនកីឡាករកីឡាការិនីចំនួន១០នាក់ឲ្យចូលរួម។ លោក ជា ប៊ុនហេង បានបញ្ជាក់ថា កីឡាករទាំង១០នាក់នេះសុទ្ធសឹងជាកីឡាករដែលមានសមត្ថភាពខ្ពស់ និងមានកំណត់ត្រាល្អ។ ម្យ៉ាងទៀតពួកគេទាំងនេះជាកីឡាករដែលមានបទពិសោធន៍ និងលេងឲ្យក្រសួងមហាផ្ទៃអស់រយៈពេលជាច្រើនឆ្នាំមកហើយ។
ការប្រកួតដែលរៀបចំដោយក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា(NOCC)នេះ នឹងប្រព្រឹត្តទៅចាប់ពីថ្ងៃទី២៥ ខែតុលា ដល់ថ្ងៃទី៥ ខែវិច្ឆិកា នៅក្នុងរាជធានីភ្នំពេញ។ ប៉ុន្តែការបើកកម្មវិធីប្រកួតដែលថ្នាក់ដឹកនាំកីឡាអះអាងថា លក្ខណៈដូចការបើកកីឡាអូឡាំពិក នឹងប្រព្រឹត្តទៅនៅថ្ងៃទី២៨ ខែតុលា៕
Tag:
កីឡាជាតិលើកទី១
ជា ប៊ុនហេង
ក្រសួងមហាផ្ទៃ
© រក្សាសិទ្ធិដោយ thmeythmey.com