ដើម្បីពង្រឹងសមត្ថភាព បច្ចេកទេសចៅក្រម-អាជ្ញាកណ្តាលព្រមទាំងកីឡាករកីឡាការិនី សម្រាប់ត្រៀមការប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ក្រសួងអប់រំ យុវជន និងកីឡា សហការជាមួយគណៈកម្មាធិការជាតិអូឡាំពិកកម្ពុជា(NOCC) រៀបចំការប្រកួតកីឡាជាតិលើកទី១នាថ្ងៃទី២៥ ខែតុលា ដល់ថ្ងៃទី៥ ខែវិច្ឆិកា។ សម្រាប់ព្រឹត្តិការណ៍នេះ គណកម្មការរៀបចំការប្រកួតនឹងដាក់កីឡា១៥ប្រភេទឲ្យចូលរួម។
គណកម្មការរៀបចំការប្រកួតកាលពីពេលថ្មីៗ បានសម្រេចដាក់កីឡាចំនួន១៥ប្រភេទឲ្យចូលរួមប្រកួតប្រជែងក្នុងព្រឹត្តិការណ៍កីឡាជាតិលើកទី១ ដែលរៀបចំដោយក្រសួងអប់រំ យុវជន និងកីឡា សហការជាមួយគណៈកម្មាធិការជាតិអូឡាំពិកកម្ពុជា(NOCC)។ ការប្រកួតនេះធ្វើឡើងនៅរាជធានីភ្នំពេញរយៈពេល២២ថ្ងៃ ចាប់ពីថ្ងៃទី២៥ ខែតុលា ដល់ថ្ងៃទី៥ ខែវិច្ឆិកា។
កីឡាទាំង១៥ប្រភេទដែលគណកម្មការសម្រេចដាក់ឲ្យចូលរួមប្រកួតប្រជែងក្នុងព្រឹត្តិការណ៍នេះរួមមាន ចំបាប់, ល្បុក្កតោ, អត្តពលកម្ម, ហែលទឹក, វាយសី, វាយកូនឃ្លីលើតុ, វាយកូនបាល់, បាល់បោះ, បាល់ទាត់, បាលទះ, ប្រដាល់, តេក្វាន់ដូ WTF, កាយសម្ព័ន្ធ, ប៉េតង់ និងសូរិនហ្សិកាំប៉ូ។
នេះជាលើកទី១ហើយសម្រាប់កម្ពុជាដែលរៀបចំការប្រកួតព្រឹត្តិការណ៍កីឡាមានកម្រិតបច្ចេកទេស និងស្តង់ដាដូចទៅនឹងការប្រកួតស៊ីហ្គេមបែបនេះ។ ការរៀបចំនេះក្នុងគោលបំណង ដើម្បីដកស្រង់បទពិសោធន៍ បច្ចេកទេស ក៏ដូចជាពង្រឹងសមត្ថភាព បច្ចេកទេសអត្តពលិក ចៅក្រម និងអាជ្ញាកណ្តាល សម្រាប់ត្រៀមប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ម្យ៉ាងទៀត ដើម្បីឲ្យស្របតាមផែនការមេស៊ីហ្គេមដែលរាជរដ្ឋាភិបាលបានកំណត់នាពេលកន្លងមក។ ការប្រកួតនេះនឹងធ្វើឡើងជាបន្តបន្ទាប់រៀងរាល់២ឆ្នាំម្តងចំនួន៣ដងទៀតរហូតដល់ការប្រកួតស៊ីហ្គេមលើកទី៣២ដែលកម្ពុជាធ្វើជាម្ចាស់ផ្ទះបានចាប់ផ្តើម៕