កីឡាជាតិ
ជាតិ
សម្ដេច ហ៊ុន សែន៖ «នៅកម្ពុជាគ្មានអ្នកណាយកចិត្តទុកដាក់លើកីឡាប្រដាល់ជាងខ្ញុំទេ»
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន អះអាងថា នៅកម្ពុជាគ្មានអ្នកណាម្នាក់ ដែលយកចិត្តទុកចិត្តដាក់លើវិស័យកីឡាប្រដាល់ជាងសម្ដេចនោះទេ។ ការអះអាងរបស់សម្ដេច ហ៊ុន សែន បែបនេះ ឆ្លើយតបនឹងម្ចាស់គណនីហ្វេសប៊ុកម្នាក់ឈ្មោះ Ret Boreak ដែលបានចូលអត្ថាធិប្បាយ (Comment) ក្នុងហ្វេសប៊ុកសម្ដេចថា «ខ្ញុំអ្នកប្រដាល់ក្បាច់គុនខ្មែរ អន់ចិត្តខ្លាំងណាស់! សម្ដេចលម្អៀងខ្លាំងណាស់...»។
ម្ចាស់គណនីហ្វេសប៊ុកម្នាក់ឈ្មោះ Ret Boreak ដែលអះអាងថាខ្លួនជាអ្នកប្រដាល់រូបនេះបានសរសេរអត្ថាធិប្បាយថា «រាល់ពេលដែលក្រុមបាល់ទាត់ទទួលបានជ័យជំនះ គឺសម្ដេចតែងតែឧប្ថម្ភដល់ក្រុមកីឡាករ និង គ្រូបង្វឹកមិនដែលខាន ចំណែកប្រដាល់វិញ វាយប្រកួតឡើងបែកមុខបែកមាត់ និងពេលទទួលបានជំនះ ខ្ញុំមិនសូវឃើញសម្ដេច ឧបត្ថម្ភទេ។ មើលទៅសម្ដេច គឺយកចិត្តទុកដាក់ទៅលើវិស័យបាល់ទាត់ជាង»។
ភ្លាមៗក្រោយពីឃើញComment របស់ម្ចាស់គណនីហ្វេសប៊ុកខាងលើនេះ សម្ដេច ហ៊ុន សែន បានចោទជាសំណួរទៅម្ចាស់គណនីហ្វេសប៊ុកនេះវិញថា តើអ្វីទៅជាពាក្យថាលំអៀង? មុននឹងសម្ដេចបានសរសេរឆ្លើយតបវិញយ៉ាងដូច្នេះថា៖ នៅកម្ពុជានេះអត់មានអ្នកណាយកចិត្តទុកដាក់លើកីឡាប្រដាល់ជាងខ្ញុំទៀតទេ។ ដែលមុនមានការឧបត្ថម្ភពីក្រុមហ៊ុននិងទូរទស្សន៏ពេលប្រកួតជាមួយបរទេសម្តងៗទទួលបាន១,០០០$ម្នាក់ទោះចាញ់ក្តីឈ្នះក្តី។ មកដល់ពេលនេះមួយចំនួនត្រូវរបួសដោយការប្រកួតភាគច្រើនបានទទួលការឧបត្ថម្ភដោយមិនប្រកាសពីខ្ញុំនិងគ្រួសារមិនមែនរាប់សិបឬរាប់រយដុល្លាទេគឺរាប់ពាន់ដុល្លាឯណោះក្នុងម្នាក់ៗ»។
មូលហេតុដែលម្ចាស់គណនីហ្វេសប៊ុកម្នាក់ឈ្មោះ Ret Boreak ចូល Comment ហ្វេសប៊ុកសម្ដេចថា លំអៀងនេះ ដោយសាររូបគេឃើញសារសម្ដេច ហ៊ុន សែន សន្យាផ្ដល់ប្រាក់រង្វាន់លើកទឹកចិត្ត៥ម៉ឺនដុល្លារ(៥០,០០០$) ទៅដល់ក្រុមកីឡាករបាល់ទាត់កម្ពុជា ក្នុងករណីក្រុមជម្រើសជាតិកម្ពុជា អាចយកឈ្នះ២ប្រកួតទៀតលើក្រុមព្រុយណេ និងទីម័ខាងកើត នាកាលប្រកួតខាងមុខ៕
© រក្សាសិទ្ធិដោយ thmeythmey.com