កីឡាជាតិ
លោក Lee ប្រាប់មូលហេតុដែលមិនសូវដាក់ ចាន់ វឌ្ឍនាកា និង ឃួន ឡាបូរ៉ាវី លេងជម្រើស១១នាក់ដំបូង
×![]()
ភ្នំពេញ៖ ក្រោយពីមានចម្ងល់ជាច្រើន ចោទជាសំណួរថា មូលហេតុអ្វីបានជារាល់ការប្រកួតទាំងមិត្តភាពអន្តរជាតិ ទាំងការប្រកួតជម្រុះពានរង្វាន់រយៈពេលចុងក្រោយនេះ គ្រូបង្វឹកក្រុមជម្រើសជាតិកម្ពុជាមិនសូវដាក់កីឡាករខ្សែប្រយុទ្ធ ឃួន ឡាបូរ៉ាវី និងខ្សែប្រយុទ្ធវ័យក្មេង ចាន់ វឌ្ឍនាកា លេងជម្រើស១១នាក់ដំបូង។ ចម្ងល់នេះត្រូវបានលោក Lee Tea Hoon បកស្រាយថា មូលហេតុ ចាន់ វឌ្ឍនាកា ជាប់ជម្រើសទី២នោះ ដោយសារតែលក្ខខណ្ឌកម្លាំងខ្សែប្រយុទ្ធរូបនេះ នៅមិនទាន់ល្អគ្រាប់គ្រាន់ ខណៈដែល ឃួន ឡាបូរ៉ាវី ធ្លាក់ចុះទម្រង់លេង ដោយសាររាងកាយធាត់ជាងមុន។
ថ្លែងក្នុងសន្និសីទកាសែតក្រោយពីប្រកួតយកឈ្នះក្រុមឡាវ២ទល់១ ក្នុងវគ្គជម្រុះ AFF SUZUKI CUP កាលម្សិលមិញនោះ លោក Lee Tea Hoon បានបញ្ជាក់ថា ក្នុងការប្រកួតកីឡាករ ចាន់ វឌ្ឍនាកា មានកម្រិតលេងល្អ ប៉ុន្តែលក្ខខណ្ឌកម្លាំងរបស់ខ្សែប្រយុទ្ធវ័យក្មេងរូបនេះ មិនទាន់ល្អគ្រាប់គ្រាន់ឡើយ ។ ដូច្នេះការដាក់កីឡាករ ចាន់ វឌ្ឍនាកា លេងនៅជម្រើសទីពីរនេះ សម្រាប់លោក Lee ក៏ជាតាក់ទិច ដើម្បីបង្កើនស្ថានភាពគ្រោះថ្នាក់ ដល់គូប្រកួតផងដែរ។
គ្រូបង្វឹកកម្ពុជារូបនេះ បានបញ្ជាក់ដូច្នេះថា៖«មនុស្សជាច្រើនតែងតែចង់ដឹងហេតុផលថា ហេតុអ្វី ចាន់ វឌ្ឍនាកា (លេង១១) មិនអាចលេងជម្រើស១១នាក់ដំបូងបាន។ ឥឡូវនេះលក្ខខណ្ឌកម្លាំងរបស់ វឌ្ឍនាកា មិនទាន់ល្អគ្រាប់គ្រាន់ក្នុងការប្រកួត ។ តែបើនិយាយពីកម្រិតលេងរបស់ វឌ្ឍនាកា អាចលេង៩០នាទីពេញបាន ដូច្នេះរូបគេត្រូវការបង្កើនកម្លាំងលេងបន្ថែមទៀត។ ប៉ុន្តែសម្រាប់បច្ចេកទេសលេង នៅពេលដែលយើងមិនអាចស៊ុតបញ្ចូលទីគូប្រកួតបាន ខ្ញុំនឹងផ្លាស់ប្ដូរ វឌ្ឍនាកា ចូលដើម្បីបង្កើនស្ថានភាពគ្រោះថ្នាក់ដល់គូប្រកួតបន្ថែមទៀត ដូចលេងជាមួយឡាវនេះ »។
ងាកមកនិយាយពីខ្សែប្រយុទ្ធមួយរូបទៀត គឺកីឡាករ ឃួន ឡាបូរ៉ាវី វិញលោក Lee សម្លឹងមើលឃើញថា កីឡាកររូបនេះ ហាក់ដូចជាមានទម្រង់លេងធ្លាក់ចុះបន្តិច ដោយសារ បូឡាវី មានរូបរាងកាយធាត់ជាងមុន។ «ជាការពិតណាស់ ឡាបូរ៉ាវី (លេខ៩) ពិតជាមានរាងកាយធាត់បន្តិច។ ប៉ុន្តែគាត់(លេង៩) ត្រូវព្យាយាមសម្រកទម្ងន់ បើមិនដូច្នេះទេ គាត់មិនអាចលេងក្នុងកម្រិតអាំងតង់ស៊ីតេខ្ពស់បាននោះទេ»។ នេះជាការបញ្ជាក់របស់គ្រូបង្វឹកក្រុមជម្រើសជាតិកម្ពុជា ដែលបានអះអាងថា មូលហេតុដែលលោក ផ្លាស់ប្តូរទម្រង់កីឡាករជម្រើស១១នាក់ដំបូងនេះ គឺដើម្បីបង្វែរទម្រង់លេង និងកុំឲ្យគូប្រកួតដឹងពីចំណុចខ្សោយក្នុងការការពារ និងវាយសម្រុកគូប្រកួតរបស់ក្រុមកម្ពុជា។
ការលើកឡើងលោក Lee Tea Hoon ដូចជាអ្វីដែលគ្រូបង្វឹកក្រុមជម្រើសជាតិឡាវ មើលឃើញពីចំណុចខ្វះខាតរបស់ខ្សែប្រយុទ្ធកម្ពុជាទាំងពីររូបនេះដែរ។ លោក Valakone Phomphady មើលឃើញថា មូលហេតុដែលក្រុមឡាវចាញ់កម្ពុជា ២ទល់១នេះ មិនមែនមកពីអសមត្ថភាពរារាំងខ្សែប្រយុទ្ធកម្ពុជានោះទេ ពោលគឺដោយសារតែឡាវខ្វះការប្រមូលអារម្មណ៍លេង ធ្វេសប្រហែសនៅក្នុងការប្រកួត១០នាទីចុងក្រោយដោយខ្លួនឯង។ សម្រាប់លោក Valakone Phomphady សម្លឹងឃើញថា ខ្សែប្រយុទ្ធកម្ពុជា កីឡាករ ចាន់ វឌ្ឍនាកា មានកម្រិតលេងល្អ ប៉ុន្តែកម្លាំងលេង ៩០នាទីពេញនោះ មិនទាន់ល្អគ្រាប់គ្រាន់ឡើយ ។ ចំណែកកីឡាករ ឃួន ឡាបូរ៉ាវី មានរាងកាយធាត់ ដែលទម្រង់លេងមិនអាចស្ទុះបានល្អនោះទេ។«ខ្ញុំគិតថា កីឡាករកម្ពុជាលេខ១១ (ចាន់ វឌ្ឍនាកា) កម្លាំងរបស់គាត់ មិនអាចលេងជម្រើសដំបូង៩០នាទីបាន។ ចំណែកលេខ៩(ឃួន ឡាបូរ៉ាវី ) វិញ ខ្ញុំគិតថា មានរូបរាងកាយធំបន្តិច ។ មូលហេតុនេះហើយទើបគ្រូបង្វឹកកម្ពុជាដាក់កីឡាករណា ដែលមានកម្លាំងកាយ សម្បទាគ្រប់គ្រាន់ ហើយលឿន ដែលអាចធ្វើការវាយសម្រុកក្រុមយើងបាន»។ នេះជាតាក់ទិករបស់គ្រូបង្វឹកក្រុមជម្រើសជាតិកម្ពុជា ដែលត្រូវបានគ្រូបង្វឹកក្រុមជម្រើសជាតិឡាវ ដឹងពីយុទ្ធសាស្ត្រលើកមកឆ្លើយតបសំណួរអ្នកសារព័ត៌មានកាលពីម្សិលមិញ៕
Tag:
បាល់ទាត់
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 ថ្ងៃ
