គ្រូបង្វឹកទីម័រខាងកើត៖«ការចាញ់ព្រុយណេមិនមែនខ្ញុំជាអ្នកចាញ់នោះទេគឺកីឡាករចាញ់ខ្លួនឯង»

កីឡាជាតិ

គ្រូបង្វឹកទីម័រខាងកើត៖«ការចាញ់ព្រុយណេមិនមែនខ្ញុំជាអ្នកចាញ់នោះទេគឺកីឡាករចាញ់ខ្លួនឯង»

16, Oct 2016 , 4:30 pm

រូបភាព

ដោយ:

ក្រុមជម្រើសជាតិទីម័រខាងកើតបានចាញ់ក្រុមជម្រើសជាតិព្រុយណេ ២-១ នាការប្រកួតបើកឆាកនៃវគ្គជម្រុះពានរង្វាន់ AFF Suzuki Cup 2016 នៅពហុកីឡដ្ឋានជាតិកាលពីម្សិលមិញ។ លទ្ធផលចាញ់ព្រុយណេនេះ គ្រូបង្វឹកក្រុមជម្រើសជាតិទីម័រខាងកើតយល់ថា លោកមិនមែនជាអ្នកចាញ់នោះទេ ពោលគឺកីឡាករជាអ្នកចាញ់ខ្លួនឯង។

លោក Fernando Rogério de Alcântara គ្រូបង្វឹកក្រុមទីម័រខាងកើតហាក់ដូចជាមិនចង់ទទួលស្គាល់ពីកំហុសរបស់ខ្លួនក្នុងការដឹកនាំកូនក្រុមនោះឡើយ ដោយលោកបានចាត់ទុកការចាញ់ក្រុមជម្រើសជាតិព្រុយណេ ២-១ ក្នុងថ្ងៃបើឆាកនៃវគ្គជម្រុះពានរង្វាន់ AFF Suzuki Cup 2016 កាលពីម្សិលមិញថា កីឡាករជាអ្នកចាញ់ខ្លួនឯង។

ក្នុងសន្និសីទសារព័ត៌មានក្រោយចប់ការប្រកួតកាលពីម្សិលមិញគ្រូបង្វឹករូបនេះបញ្ជាក់ដូច្នេះថា៖«ខ្ញុំគិតថា ការចាញ់ព្រុយណេ ២-១ មិនមែនខ្ញុំជាអ្នកចាញ់នោះ គឺកីឡាករជាអ្នកចាញ់ខ្លួនឯង ព្រោះខ្ញុំគិតថា វាជាការប្រកួតមួយដ៏ងាយស្រួល ប៉ុន្តែពួកគាត់ធ្វើមិនបានល្អ»។

យ៉ាងណាក៏ដោយ គ្រូបង្វឹកក្រុមទីម័រខាងកើតរូបនេះមានការសោកស្តាយ និងខកចិត្តយ៉ាងខ្លាំងចំពោះការចាញ់ព្រុយណេក្នុងថ្ងៃបើកឆាកនេះ។ ហើយលោកទទួលស្គាល់ថា កូនក្រុមរបស់លោកធ្វើបានល្អក្នុងតង់ទី២ ប៉ុន្តែមានធ្វេសប្រហែសខ្លាំងក្នុងតង់ទី១ដែលធ្វើឲ្យព្រុយណេអាចទម្លុះសំណាញ់ទីរហូតដល់២គ្រាប់។ ទោះបីក្រុមលោកមិនអាចទទួលបានជ័យជម្នះលើព្រុយណេក៏ដោយ ប៉ុន្តែលោកបានចាត់ទុកការប្រកួតនេះជាការដកស្រង់បទពិសោធន៍មួយដ៏ល្អ ដើម្បីត្រៀមជួបម្ចាស់ផ្ទះកម្ពុជានាការប្រកួតបន្ទាប់។

គួរបញ្ជាក់ថា ជ័យជម្នះ ២-១ របស់ព្រុយណេលើក្រុមទីម័រខាងកើតនេះបានធ្វើឲ្យក្រុមនេះទទួលបាន៣ពិន្ទ ស្មើជាមួយក្រុមម្ចាស់ផ្ទះកម្ពុជាដែលយកឈ្នះក្រុមឡាវក្នុងលទ្ធផល ២-១ ក្នុងវគ្គជម្រុះ AFF Suzuki Cup 2016 ក្នុងថ្ងៃបើកឆាកដំបូងដូចគ្នាកាលពីម្សិលមិញ៕