កីឡាជាតិ
AFF SUZUKI CUP ៖ គ្រូបង្វឹកឡាវ ថា ព្រុយណេ និងទីម័រខាងកើត មិនអាចរារាំងកម្ពុជាបានទេ
× ភ្នំពេញ៖ គ្រូបង្វឹកក្រុមជម្រើសជាតិឡាវ មើលឃើញថា ក្រុមព្រុយណេ និងទីម័រខាងកើត នៅមានទម្រង់លេងខ្សោយជាងក្រុមកម្ពុជា និងឡាវ។ លោកជឿជាក់ថា កម្ពុជានឹងឆ្លងផុតវគ្គជម្រុះនេះ ព្រោះព្រុយណេ និងទីម័រខាងកើតមិនអាចរារាំងកម្ពុជាបាននោះទេ។
លទ្ធផលចាញ់ក្រុមជម្រើសជាតិកម្ពុជា២ទល់១ ធ្វើឲ្យគ្រូបង្វឹកក្រុមជម្រើសជាតិឡាវលោក Valakone Phomphady ហាក់មិនអស់ចិត្តឡើយ។ លោក Valakone Phomphady មើលឃើញថា កូនក្រុមលោកមានទម្រង់លេងយ៉ាងល្អជាមួយក្រុមកម្ពុជា ប៉ុន្តែដោយសារតែខ្វះការប្រមូលអារម្មណ៍លេងនៅ១០នាទីចុងក្រោយនៃការប្រកួតនោះ ទើបធ្វើឲ្យកម្ពុជាអាចទទួលបាន៣ពិន្ទុក្នុងដៃ។
ក្រោយចាញ់កម្ពុជានេះលោក Valakone ជឿជាក់ថា កម្ពុជានឹងឆ្លងផុតវគ្គជម្រុះនេះ ព្រោះព្រុយណេ និងទីម័រខាងកើតមិនអាចរារាំងកម្ពុជាបាននោះទេ។ ថ្លែងក្នុងសន្និសីទកាសែតកាលពីម្សិលមិញ គ្រូបង្វឹកជម្រើសជាតិឡាវរូបនេះ បានបញ្ជាក់ដូច្នេះថា៖«ខ្ញុំសង្ឃឹមថាក្រុមកម្ពុជា នឹងឈានទៅដល់ជុំចុងក្រោយ។ ពីព្រោះការប្រកួតរវាងកម្ពុជា និងឡាវ គឺជាប្រកួតដ៏រំជើបរំជួល និងចាប់អារម្មណ៍ដែលវាសំខាន់ បើសិនជាក្រុមណាមួយឈ្នះនោះ គឺមានឱកាសឡើងខ្ពស់ ព្រោះខ្ញុំគិតថា ទីម័រខាងកើត និងព្រុយណេ នៅមានកម្រិតខ្សោយជាងកម្ពុជា និងឡាវ»។
ក្រុមកីឡាបាល់ទាត់ជម្រើសជាតិកម្ពុជា បានបើកឆាកប្រកួតជម្រុះ AFF Suzuki Cup ជាមួយនឹងជ័យជម្នះ ២-១ លើក្រុមឡាវ នាល្ងាចថ្ងៃទី១៥ ខែតុលា នេះ នៅពហុកីឡដ្ឋានជាតិ បន្ទាប់ពីព្រុយណេ យកឈ្នះទីម័រខាងកើតក្នុងលទ្ធផល ២-១ ដូចគ្នា។ ក្រុមដែលមានពិន្ទុរខ្ពស់ជាងគេ នឹងឡើងទៅកាន់វគ្គបន្តនៃពានរង្វាន់នេះ ដោយត្រូវជួបជាមួយក្រុមមីយ៉ាន់ម៉ា ម៉ាឡេស៊ី និងវៀតណាម៕
© រក្សាសិទ្ធិដោយ thmeythmey.com