ក្រុមបាល់ទាត់បុរស-នារីមកពីរាជធានី-ខេត្តចំនួន៣៣ក្រុមបានត្រៀមខ្លួនរួចរាល់ហើយ ដើម្បីចូលរួមប្រកួតដណ្តើមជើងឯកប្រចាំព្រឹត្តិការណ៍កីឡាជាតិលើកទី១ ដែលប្រព្រឹត្តទៅចាប់ពីថ្ងៃទី២៥ ខែតុលា ដល់ថ្ងៃទី៥ ខែវិច្ឆិកា ខាងមុខ។ ការប្រកួតនេះដោយបែងចែកជា៨ពូល ក្នុងនោះនារី៤ពូល និងបុរស៤ពូល តែក្រុមបាល់ទាត់បុរសមានចំនួនតិចជាងក្រុមបាល់ទាត់នារី។
ក្រុមបាល់ទាត់បុរស១៥ក្រុម និងនារី១៨ក្រុមបានរៀបចំ និងបែងចែកពូលប្រកួតរបស់ខ្លួនរួចរាល់ហើយក្នុងព្រឹត្តិការណ៍កីឡាជាតិលើកទី១ ដែលប្រព្រឹត្តទៅនៅរាជធានីភ្នំពេញចាប់ពីថ្ងៃទី២៥ ខែតុលា ដល់ថ្ងៃទី៥ ខែវិច្ឆិកា ដោយក្នុងនោះក្រុមបាល់ទាត់បុរសបែងចែកជា៤ពូល(A, B, C, D) និងនារី៤ពូល(A, B, E, F)ដូចគ្នា។
សម្រាប់ក្រុមបាល់ទាត់បុរសពូលA មាន៤ក្រុម គឺ(ខេត្តក្រចេះ, ត្បូងឃ្មុំ, រាជធានីភ្នំពេញ និងបណ្ឌលគីរី) ឬឯពូលB មាន(ខេត្តរតនគីរី, កំពង់ឆ្នាំង, សៀមរាប និងកំពត)។ ចំណែកពូលC មាន(ខេត្តកំពង់ធំ, បាត់ដំបង និងតាកែវ) ខណៈពូលD (ខេត្តប៉ៃលិន, កំពង់ចាម, ព្រៃវែង និងកំពង់ស្ពឺ)។
ក្រុមបាល់ទាត់នារីពូល A មាន(ខេត្តព្រះវិហារ, ត្បូងឃ្មុំ, សៀមរាប, ប៉ៃលិន និងកំពង់ឆ្នាំង) ឬឯពូលB (បាត់ដំបង, ឧត្តរមានជ័យ, កំពង់ស្ពឺ, ស្វាយរៀង និងកណ្តាល) ខណៈពូលE (កោះកុង, កណ្តាល, ឧត្តរមានជ័យ និងព្រះសីហនុ) និងពូលF (ខេត្តកែប, ក្រសួងមហាផ្ទៃ, ព្រះវិហារ និងក្រសួងការពារជាតិ)។
ជាមួយគ្នានេះ ប្រភេទកីឡាបាល់បោះក៏បានរៀបចំបែងចែកពូលនៃការប្រកួតរបស់ខ្លួនរួចរាល់ផងដែរ ក្នុងផ្នែកបុរសពូលA មានរាជធានីភ្នំពេញ, កំពត, បាត់ដំបង, ក្រសួងមហាផ្ទៃ, កំពង់ចាម និងរតនគីរី ខណៈពូលB មានខេត្តឧត្តរមានជ័យ, ស្វាយរៀង, ត្បូងឃ្មុំ, មណ្ឌលគីរី, សៀមរាប និងកំពង់ស្ពឺ។
ចំណែកផ្នែកនារីដែលមានតែ៦ក្រុមចូលរួមមិនមានការបែងចែកពូលនោះឡើយ ដោយពួកគេធ្វើប្រកួតជម្រុះវិលជុំតែម្តង។ ក្រុមទាំង៦នោះរួមមានខេត្តត្បូងឃ្មុំ, រតនៈគីរី, កំពង់ឆ្នាំង, កណ្តាល, ស្ទឺងត្រែង និងក្រសួងមហាផ្ទៃ។
គួរបញ្ជាក់ថា ការប្រកួតកីឡាជាតិលើកទី១ដែលរៀបចំឡើង ដើម្បីពង្រឹងសមត្ថភាព និងបច្ចេកទេសកីឡាករកីឡាការិនី ព្រមទាំងចៅក្រម អាជ្ញាកណ្តាល សម្រាប់ត្រៀមការប្រកួតស៊ីហ្គេមឆ្នាំ២០២៣ នឹងចាប់ផ្តើមប្រកួតនៅថ្ងៃទី២៥ ខែតុលា ខាងមុខ។ ប៉ុន្តែកម្មវិធីបើកដែលថ្នាក់ដឹកនាំថា នឹងធ្វើតាមលំនាំ Olympic Games និង ASEAN Games នឹងប្រព្រឹត្តទៅនៅថ្ងៃទី២៨ ខែតុលា៕