កីឡាជាតិ
×![]()
គ្រូបង្វឹកក្រុមជម្រើសជាតិព្រុយណេក្រោយពីទទួលជ័យជម្នះ ២-១ លើក្រុមទីម័រខាងកើតកាលពីថ្ងៃសៅរ៍សប្តាហ៍មុនបានចាត់ទុកក្រុមជម្រើសជាតិកម្ពុជាជាក្រុមខ្លាំងជាងគេក្នុងចំណោម៤ក្រុមនៅក្នុងវគ្គជម្រុះពានរង្វាន់ AFF Suzuki Cup 2016។ ប៉ុន្តែលោកនឹងព្យាយាមឲ្យអស់ពីសមត្ថភាពនៅពេលជួបជាមួយក្រុមម្ចាស់ផ្ទះកម្ពុជានៅវេលាម៉ោង៦ និង៣០នាទី ថ្ងៃអង្គារនេះ ។
ទោះបីក្រុមជម្រើសជាតិព្រុយណេមិនទាន់ជួបម្ចាស់ផ្ទះកម្ពុជាក្នុងជម្រុះពានរង្វាន់ AFF Suzuki Cup 2016 នេះក៏ដោយ ប៉ុន្តែតាមរយៈការទស្សនាការប្រកួតរបស់កម្ពុជាជាមួយឡាវ បានធ្វើឲ្យគ្រូបង្វឹកក្រុមព្រុយណេអាចវាយតម្លៃថា កម្ពុជាជាក្រុមខ្លាំងជាងគេក្នុងចំណោមក្រុមទាំង៤(កម្ពុជា, ព្រុយណេ, ឡាវ និងទីម័រខាងកើត)នៃវគ្គជម្រុះនេះ។
ក្នុងសន្និសីទសារព័ត៌មានក្រោយក្រុមព្រុយណេយកឈ្នះលើក្រុមទីម័រខាងកើត ២-១ លោក Mike Wong Mun Heng បានបញ្ជាក់ដូច្នេះថា៖«សម្រាប់ការប្រកួតក្នុងវគ្គជម្រុះនេះ ខ្ញុំគិតថា ក្រុមកម្ពុជាជាក្រុមមួយដែលមានសមត្ថភាពខ្លាំងជាងគេ ព្រោះកាលពីប៉ុន្មានខែមុនក្នុងជំនួបមិត្តភាពអន្តរជាតិកម្ពុជាបានយកឈ្នះយ៉ាងដំណំលើក្រុមជម្រើសជាតិព្រុយណេ»។
លោកបានបន្តទៀតថា៖«ខ្ញុំសង្កេតឃើញថា ពីរឆ្នាំចុងក្រោយនេះក្រុមកម្ពុជាមានការរីកចម្រើនយ៉ាងខ្លាំង ហើយខ្ញុំរំពឹងថា ក្រុមជម្រើសជាតិព្រុយណេ នឹងរីកចម្រើនដូចកម្ពុជាដែរ ប៉ុន្តែពីមួយដំណាក់កាលទៅមួយដំណាក់កាល។ ខ្ញុំគិតថា ការប្រកួតទាំង៣ប្រកួតសុទ្ធសឹងជាការប្រកួតដែលមានលក្ខណៈប្រកួតពប្រជែងខ្ពស់ ហើយខ្ញុំរំពឹងថា កូនក្រុមរបស់ខ្ញុំនឹងប្រឹងឲ្យអស់ពីសមត្ថភាពក្នុងជំនួបជាមួយកម្ពុជា»។
គួរបញ្ជាក់ថា ក្រុមជម្រើសជាតិព្រុយណេមាន៣ពិន្ទុនៅក្នុងដៃបន្ទាប់ពីយកឈ្នះក្រុមទីម័រខាងកើត ២-១ ខណៈកម្ពុជាក៏មាន៣ពិន្ទុផងដែរបន្ទាប់ពីយកឈ្នះក្រុមឡាវ ២-១ ក្នុងថ្ងៃបើកឆាកនៃវគ្គជម្រុះពានរង្វាន់ AFF Suzuki Cup 2016 ដូចគ្នាកាលពីសប្តាហ៍មុន៕
Tag:
បាល់ទាត់
AFF Suzuki Cup 2016
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 ថ្ងៃ
