NOCC បង្ហាញសមាសភាពកីឡាករទាំង៩នាក់ដែលរត់ភ្លើងគប់ក្នុងថ្ងៃបើកការប្រកួតកីឡាជាតិ

កីឡាជាតិ

NOCC បង្ហាញសមាសភាពកីឡាករទាំង៩នាក់ដែលរត់ភ្លើងគប់ក្នុងថ្ងៃបើកការប្រកួតកីឡាជាតិ

19, Oct 2016 , 8:19 am

រូបភាព

លោក វ៉ាត់ ចំរើន អគ្គលេខាធិការ NOCC

ដោយ:

ការប្រកួតកីឡាជាតិលើកទី១ដែលជាការប្រកួតមួយមានកម្រិតបច្ចេកទេសខ្ពស់ដូចការប្រកួតស៊ីហ្គេមនឹងប្រព្រឹត្តទៅចាប់ពីថ្ងៃទី២៥ ខែតុលា ដល់ថ្ងៃទី៥ ខែវិច្ឆិកា នៅក្នុងរាជធានីភ្នំពេញ។ ប៉ុន្តែកម្មវិធីបើកការប្រកួតដែលថ្នាក់ដឹកនាំកីឡាកម្ពុជាអះអាងថា នឹងធ្វើឲ្យដូចការបើកការប្រកួតកីឡាអូឡាំពិកនឹងប្រព្រឹត្តទៅនៅថ្ងៃទី២៨ ខែតុលា។ គណៈកម្មាធិការជាតិអូឡាំពិកកម្ពុជា(NOCC) កាលពីថ្ងៃទី១៨ ខែតុលា បានបង្ហាញពីសមាសភាពកីឡាករ និងអតីតកីឡាករឆ្នើមទាំង៩នាក់ដែលរត់ភ្លើងគប់ក្នុងថ្ងៃបើកការប្រកួតកីឡាជាតិលើកទី១។

គណៈកម្មាធិការជាតិអូឡាំពិកកម្ពុជា(NOCC)កាលពីថ្ងៃទី១៨ ខែតុលា បានបង្ហាញឈ្មោះសមាសភាពកីឡាករ និងអតីតកីឡាករជើងចាស់ដ៏ឆ្នើមក្នុងសម័យបច្ចុប្បន្ន និងទស្សវត្សរ៍៦០, ៧០ និង៨០ទាំង៩នាក់ ដែលជាអ្នករត់ភ្លើងគប់ក្នុងថ្ងៃបើកការប្រកួតកីឡាជាតិលើកទី១ នៅពហុកីឡដ្ឋានជាតិ នាថ្ងៃទី២៨ ខែតុលា ខាងមុខ។

បើយោងតាមទំព័រហ្វេសប៊ុករបស់គណៈកម្មាធិការ NOCC កីឡាករ និងអតីតកីឡាករឆ្នើមទាំង៩រូបរួមមាន លោក កែវ ថុន, លោក អៀត គឹមហេង, លោក ប៉ែន ផាត, លោក សោម សារ៉ន(តាម៉ាំង), លោក តូ រឹទ្ធីយ៉ា, កីឡាការិនី កែ ឡេង, កីឡាការិនី ស៊ន សៀវម៉ី, កីឡាករ ចាន់ វឌ្ឍនាកា និងកីឡាករ ប្រាក់ មុនីឧត្តម។

បើយោងតាមលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ការជ្រើសរើសអតីតកីឡាករ និងកីឡាករឆ្នើមនាពេលបច្ចុប្បន្នរត់ភ្លើងគប់ក្នុងថ្ងៃបើកការប្រកួតកីឡាជាតិលើកទី១នេះ។ លោកបានបញ្ជាក់ថា គឺដើម្បីបង្ហាញអតីតកីឡាករដ៏ល្បីល្បាញប្រចាំទស្សវត្សរ៍៦០, ៧០ និង៨០ និងកីឡាករឆ្នើមបច្ចុប្បន្ន ឲ្យកីឡាករកីឡាការិនីជំនាន់ក្រោយក៏ដូចជាមហាជនទាំងអស់បានស្គាល់។ ម្យ៉ាងទៀត ដើម្បីផ្តល់ឱកាស ក៏ដូចជាលើកទឹកចិត្តដល់កីឡាទាំងនេះឲ្យបានចូលរួមក្នុងថ្ងៃដ៏អស្ចារ្យដែលមិនធ្លាប់មាននៅកម្ពុជា។

អគ្គលេខាធិការនៃគណៈកម្មាធិការជាតិអូឡាំពិកកម្ពុជារូបនេះបានបន្តទៀតថា ក្រៅពីកម្មវិធីបើកដ៏អស្ចារ្យក៏មានការសម្តែងសិល្បៈនិងផ្ទាំងទស្សនីយភាពដើម្បីអបអរជាច្រើនទៀតផងដែរ។ ក្នុងនោះមានការសម្តែងក្បាច់គុនបូរាណខ្មែររបស់កងយុទ្ធពលខេមរភូមិន្ទ ការសម្តែងសិល្បៈតន្ត្រីក្រោមវត្តមានតារាចម្រៀងល្បីៗប្រចាំកម្ពុជាដូចជាលោក ព្រាប សុវត្ថិ, ខេមរៈ សិរីមន្ត, ឱក សុគន្ធកញ្ញា និងតារាចម្រៀងជាច្រើនរូបទៀត។ លើសពីនេះមានការបាញ់កាំជ្រួចដ៏អស្ចារ្យ និងប្លែកដែលរៀបចំដោយអ្នកជំនាញបរទេស។

នៅក្នុងថ្ងៃបើកកម្មវិធីប្រកួតនោះដែរដោយទទួលបានការចូលរួមក្រោមវត្តមានរបស់សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ លើសពីនេះសម្តេចក៏ជាអ្នកប្រគល់ភ្លើងគប់ដល់កីឡាករ និងអតីតកីឡាករជើងចាស់ ដើម្បីរត់បើកការប្រកួតកីឡាជាតិលើកទី១នាឱកាសនោះផងដែរ។

ដើម្បីជួយគាំទ្រវិស័យកីឡាកម្ពុជា ក៏ដូចជាអបអរក្នុងថ្ងៃបើក និងបិទកម្មវិធីការប្រកួតកីឡាជាតិលើកទី១ ថ្នាក់ដឺកនាំកីឡាបានអំពាវនាវដល់បងប្អូនប្រជាពល សិស្ស និស្សិតទាំងអស់ចូលរួមឲ្យបានច្រើនកុះករក្នុងកម្មវិធីបើកសេរីមួយនេះ។ លើសពីនេះថ្នាក់ដឹកនាំកីឡានៅបន្តផ្សព្វផ្សាយស្វែងរកអតីតកីឡាករជើងចាស់ល្បីៗ ដើម្បីចូលរួមកម្មវិធីដ៏អស្ចារ្យមួយនេះ ហើយលោកបានបញ្ជាក់ថា ប្រសិនបើអតីតកីឡាជើងចាស់ទាំងនោះបានដឹងសូមមកទំនាក់ទំនងនៅទីស្នាក់ការ NOCC។

គួរបញ្ជាក់ថា ការប្រកួតកីឡាជាតិលើកទី១នឹងចាប់ផ្តើមពីថ្ងៃទី២៥ ខែតុលា ដល់ថ្ងៃទី៥ ខែវិច្ឆិកា នៅក្នុងរាជាធានីភ្នំពេញ។ ចំណែកកម្មវិធីបើកប្រកួតធ្វើឡើងនៅល្ងាចថ្ងៃទី២៨ ខែតុលា នៅក្នុងពហុកីឡដ្ឋានជាតិ។ ការប្រកួតកីឡាជាតិលើកទី១មានអត្តពលិក និងគណប្រតិភូដែលមកពីរាជធានីខេត្តទាំង២៥ ព្រមទាំងក្រសួងការពារជាតិ និងក្រសួងមហាផ្ទៃចំនួន២,៧០០នាក់ចូលរួម។ អត្តពលិកទាំងនេះប្រកួតប្រជែងក្នុង១៨៩វិញ្ញាសាលើ១៥ប្រភេទកីឡា ក្រោមការរៀបចំរបស់គណៈកម្មការចំនួន៥៤៨នាក់៕