ជាតិ
ក្រសួងយុត្តិធម៌ និងយូនីសេហ្វ ចេញផ្សាយសេចក្តីពន្យល់អំពីការស្មុំកូនខ្មែរ ជាលើកដំបូង លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌
× ភ្នំពេញ៖ ក្រសួងយុត្តិធម៌ និងមូលនិធិកុមារអង្គការសហប្រជាជាតិ (UNICEF) បានផ្សព្វផ្សាយ សេចក្តីពន្យល់អំពីការស្មុំកូនក្នុងប្រទេស លើកដំបូង នៅថ្ងៃទី១៩ ខែតុលា ឆ្នាំ ២០១៦នេះ។
ក្រសួងយុត្តិធម៌ ក្រោមជំនួយថវិកាពីយូនីសេហ្វចងក្រងសេចក្តីពន្យល់នេះឡើង ក្នុងគោលបំណងជួយចៅក្រម ព្រះអាជ្ញា មន្ត្រីអនុវត្តច្បាប់ និងសាធារណជនទូទៅ ឲ្យយល់ពីខ្លឹមសារច្បាប់ និងនីតិវិធីនៃការស្មុំកូនក្នុងប្រទេស ពិសេសគឺ ការពង្រឹងការងារតុលាការពាក់ព័ន្ធការស្មុំកូន។
លោកស្រី ដេបូរ៉ា កូមីនី ប្រធានអង្គការយូនីសេហ្វប្រចាំប្រទេសកម្ពុជា បានថ្លែងក្នុងពិធីបើកសិក្ខាសាលាផ្សព្វផ្សាយសេចក្តីពន្យល់អំពីស្មុំកូនក្នុងប្រទេសកម្ពុជា រយៈពេល៣ថ្ងៃ គឺថ្ងៃទី១៩ ដល់ថ្ងៃទី ២១ ខែតុលាឆ្នាំ២០១៦ ពីសារៈសំខាន់នៃសេចក្តីពន្យល់អំពីការស្មុំកូន។
តំណាងអង្គការយូនីសេហ្វរូបនេះ បានថ្លែងជំរុញមន្ត្រីរដ្ឋាភិបាល តំណាងតុលាការនិងអយ្យការគ្រប់ជាន់ថ្នាក់ជាង ៣០០នាក់មកពី ២៥រាជធានី ឲ្យពង្រឹងប្រព័ន្ធការពារសិទ្ធិកុមារថែមទៀត ដើម្បីពួកគេទទួលបានគ្រួសារប្រកបដោយក្តី ស្រលាញ់។
«យើងសង្ឃឹមថា សេចក្តីពន្យល់នេះអាចជួយធានាថា កុមារនឹងទទួលការការពារ និងដាក់ឲ្យរស់នៅជាមួយគ្រួសារដែលមានលទ្ធភាពថែទាំ និងបំពេញនូវសេចក្តីត្រូវការរបស់ ពួកគេ»។ លោកស្រី ដេបូរ៉ា កូមីនី ថ្លែងសង្កត់ធ្ងន់ទៅកាន់ភាគីពាក់ព័ន្ធ ក្នុងពិធីចេញផ្សាយសៀវភៅពន្យល់នីតិវិធីស្មុំកូនក្នុងប្រទេសដែលមានចំនួន ៥ ជំពូក ស្មើនឹង ១៥៧ទំព័រ ក្នុងសណ្ឋាគារ Intercontinental។
ក្រសួងយុត្តិធម៌ និងអ្នកជំនាញការច្បាប់ បានចំណាយពេលជាង ២ឆ្នាំ ពិភាក្សាចងក្រងសេចក្តីពន្យល់អំពីការស្មុំកូនក្នុងប្រទេសដែលជាជំនួយស្មារតីជាមូលដ្ឋានដល់អ្នកអនុវត្តច្បាប់នេះ ស្របតាមបទបញ្ញត្តិជាតិ និងអន្តរជាតិនានា។
ឱកាសនោះដែរ រដ្ឋមន្ត្រីក្រសួងយុត្តិធម៌លោក អង្គ វង្សវឌ្ឍនា បានសង្កត់ធ្ងន់បន្ថែមពីសារៈសំខាន់នៃសេចក្តីពន្យល់នេះ ដោយលោកបានអះអាងថា ការបកស្រាយពីពាក្យបច្ចេកទេសច្បាប់ រួមទាំងការលើកឧទាហរណ៍ពន្យល់ពីនីតិវិធីស្មុំកូនក្នុងប្រទេស បានពន្យល់យ៉ាងក្បោះក្បាយ។
«វាជាការល្អក្នុងការលើកកម្ពស់សិទ្ធិកុមារ ដើម្បីផ្សព្វផ្សាយសេចក្តីពន្យល់និងការណែនាំដល់អ្នកធ្វើការពាក់ព័ន្ធក្នុងដំណើរការអនុវត្តស្មុំកូនក្នុងប្រទេសកម្ពុជា ជៀសវាងការស្មុំកូនធ្វើអាជីវកម្មខុសច្បាប់»។ រដ្ឋមន្ត្រីក្រសួងយុត្តិធម៌ បង្ហាញពីការយកចិត្តទុកលើកកម្ពស់សិទ្ធិកុមារ តាមរយៈការពង្រឹងច្បាប់ មុនពេលលោកសរសើរអ្នកជំនាញការច្បាប់ជាតិ និងអន្តរជាតិដែលខិតខំតាក់ តែងសេចក្តីពន្យល់នេះ។
លើសពីនេះ រដ្ឋមន្ត្រីក្រសួងយុត្តិធម៌ដែលរងការរិៈគន់បញ្ហាយុត្តិធម៌រូបនេះ បានបន្តថ្លែងស្នើ ភាគីពាក់ព័ន្ធ ជួយពិភាក្សាតាក់តែងសេចក្តីព្រាងច្បាប់ពាក់ព័ន្ធនឹងការការពារសិទ្ធិកុមារ ផ្សេងទៀត ដូចជា ច្បាប់ពពោះជំនួយ ផងដែរ៕
Tag:
អង្គ វង្ស វឌ្ឍានា
Debora Comini
UNICEF
© រក្សាសិទ្ធិដោយ thmeythmey.com