ជាតិ
នយោបាយជាតិ
មេបក្សប្រឆាំងចូលស្រុកវិញ អាចបង្កើនប្រជាប្រិយភាព ឬបង្កចលាចល? ឯកឧត្តម សម រង្ស៊ី នាអំឡុងការឃោសនាបោះឆ្នោតអណត្តិទី៥។ រូបថត ThmeyThmey
× ភ្នំពេញ៖ ក្រុមអ្នកដាមតានស្ថានការណ៍នយោយបាយ មិនស្វាគមន៍ចំពោះវិធានការរបស់រដ្ឋាភិបាលឡើយ ដែលទប់ស្កាត់ឯកឧត្តម សម រង្ស៊ី មិនឲ្យវិលមកកម្ពុជាវិញ។ ពួកគេ សន្និដ្ឋានថា ទង្វើរបស់រដ្ឋាភិបាលបែបនេះ ហាក់ដូចជាភ័យខ្លាយចំពោះដៃគូនយោបាយរបស់ខ្លួន។ ប៉ុន្តែ ភាគីបក្សកាន់អំណាច បំភ្លឺថា ការចាត់វិធានការខាងលើ មិនមែនដោយសារតែរដ្ឋាភិបាល ព្រួយបារម្ភពីប្រជាប្រិយភាពរបស់ឯកឧត្តម សម រង្ស៊ីនោះទេ តែដោយសារ ខ្លាចមេបក្សប្រឆាំងរូបនេះ បង្កចលាចល ពេលវិលមកកម្ពុជាវិញ។
លោក សូ ចន្ថា អ្នកវិភាគនយោបាយ មិនសូវពេញចិត្តចំពោះចំណាត់ការរបស់រដ្ឋាភិបាល ប៉ុន្មានទេ ដែលបិទផ្លូវមិនឲ្យឯកឧត្តម សម រង្ស៊ី ត្រឡប់មកកម្ពុជាវិញ។ លោក សូ ចន្ថា យល់ឃើញថា រដ្ឋាភិបាល ក៏ដូចជាបក្សកាន់អំណាច ទំនងជាភ័យព្រួយចំពោះប្រជាប្រិយភាពរបស់ឯកឧត្តម សម រង្ស៊ី ទើបព្យាយាមទប់ស្កាត់មេបក្សប្រឆាំងរូបនេះ មិនឲ្យចូលស្រុក។ លោក បញ្ជាក់ដូច្នេះថា៖«ការធ្វើបែបនេះ ឆ្លុះបញ្ចាំងថា រដ្ឋាភិបាល និងបក្សកាន់អំណាចខ្លាចប្រជាប្រិយភាពរបស់លោក សម រង្ស៊ី ក្នុងឆាកនយោបាយ»។
ថ្លែងប្រាប់សារព័ត៌មានថ្មីៗ លោក សូ ចន្ថា បានលើកទិដ្ឋភាពនយោបាយ កាលពីឆ្នាំ២០១៣ មកធ្វើជាទឡ្ហីករណ៍។ លោករម្លឹកថា កាលពីឆ្នាំ២០១៣ ប្រជាជនយ៉ាងច្រើន បាននាំគ្នាទៅទទួលនិងហែហម ឯកឧត្តម សម រង្ស៊ី ពេលវិលមកកម្ពុជាវិញ។ លោក សន្និដា្ននថា ទំនងជាព្រួយបារម្ភបែបនេះហើយ ទើបបក្សកាន់អំណាច ព្យាយាម ផាត់ឯកឧត្តម សម រង្ស៊ី ចេញពីសង្វៀននយោបាយកម្ពុជា។
អ្នកវិភាគរូបនេះ អះអាងថា ការធ្វើដូច្នេះ គឺជាការរំលោភរដ្ឋធម្មនុញ្ញ ដែលបានចែងពីសិទ្ធិសេរីភាពរបស់ពលរដ្ឋគ្រប់រូប ក្នុងការដើរហើរ។
មាត្រា៤០ នៃរដ្ឋធម្មនុញ្ញបានសរសេរថា៖«ប្រជាពលរដ្ឋខ្មែរ អាចចេញទៅតាំងទីលំនៅ នៅប្រទេសក្រៅ ឬ វិលត្រឡប់មកវិញបាន»។
លោក សូ ចន្ថា ពន្យល់ថា រដ្ឋាភិបាល អាចទប់ស្កាត់បុគ្គលណាម្នាក់ លុះត្រាតែបុគ្គលនោះ ជាឧក្រិដ្ឋជន ដែលអាចបង្កផលប៉ះពាល់ដល់សន្តិសុខសង្គម។ ប៉ុន្តែ ឯកឧត្តម សម រង្ស៊ី គឺជាអ្នកនយោបាយ ហើយក៏ជាប្រធានបក្សប្រឆាំង ដែលត្រូវចូលរួមប្រកួតប្រជែងក្នុងការបោះឆ្នោត។ ដូច្នេះការហាមឃាត់ឯកឧត្តម សម រង្ស៊ី បែបនេះ មិនបានឆ្លុះបញ្ចាំងពីវិធានការផ្លូវច្បាប់នោះទេ។
លោក សូ ចន្ថា បន្ថែមទៀតថា បក្សកាន់អំណាច មិនគួររុញដៃគូរបស់ខ្លួន ឲ្យចេញពីការប្រកួតនោះទេ ព្រោះវា មិនត្រឹមត្រូវតាមគោលការណ៍ប្រជាធិបតេយ្យ។ លោក ចាត់ទុកទង្វើរបស់រដ្ឋាភិបាលថា មិនស្មើភាពគ្នា ក្នុងការប្រកួតប្រជែងលើឆាកនយោបាយ។
ចំណែកឯ លោក មាស នី ដែលជាអ្នកវិភាគមួយរូបដែលនោះ ក៏មិនគាំទ្រដូចគ្នា នៅពេលរដ្ឋាភិបាល ចាត់វិធាការចំពោះមេបក្សប្រឆាំងបែបនេះ។ លោក អះអាងថា បំណងរបស់បក្សកាន់អំណាច ដែលមិនចង់ឲ្យឯកឧត្តម សម រង្ស៊ី មានវត្តមាននៅប្រទេសកម្ពុជា គឺជាជម្រើសចុងក្រោយរបស់រដ្ឋាភិបាល។
លោក មាស នី មើលឃើញថា វា អាចប៉ះពាល់ដល់ប្រជាប្រិយភាពរបស់រដ្ឋាភិបាល ប្រសិនបើ ឯកឧត្តម សម រង្ស៊ី ចូលមកកម្ពុជា ដោយគ្មានការចាប់ចង ហើយមានសេរីភាពក្នុងឆាកនយោបាយ។ លោក និយាយផ្ទុយមកវិញថា ប្រសិនបើ រដ្ឋាភិបាល ចាប់ឯកឧត្តម សម រង្ស៊ី ដាក់ពន្ធនាគារ ពេលមកដល់កម្ពុជា ក៏រឹងតែបង្កភាពធ្ងន់ធ្ងរដល់ស្ថានការណ៍នយោបាយ ថែមទៀត។ អ្នកវិភាគរូបនេះ សង្កត់ធ្ងន់ៗថា៖«បើផ្តល់សេរីភាពឲ្យគាត់ (ឯកឧត្តម សម រង្ស៊ី) ចូលស្រុកក៏មិនកើត ហើយបើចាប់គាត់ដាក់គុក ក៏មិនបាន»។ អ៊ីចឹង មានតែមិនឲ្យគាត់ចូលស្រុកតែម្តង»។
រាល់ការលើកឡើងទាំងអម្បាលម៉ានរបស់អ្នកវិភាគខាងលើ ត្រូវបាន លោក សុខ ឥសាន អ្នកនាំពាក្យរបស់គណបក្សប្រជាជនកម្ពុជា ចាត់ទុកថា ជាសិទ្ធិសេរីភាព ក្នុងការបញ្ចេញមតិរបស់បុគ្គលម្នាក់ៗ។ លោកអះអាងថា គោលបំណងពិតប្រាកដរបស់រដ្ឋាភិបាល មិនដូចអ្វីដែល ក្រុមអ្នកវិភាគ បានលើកឡើងនោះទេ។
លោក សុខ ឥសាន ពន្យល់ថា ការហាមប្រាមមិនឲ្យឯកឧត្តម សម រង្ស៊ី ចូលប្រទេសកម្ពុជាវិញ គឺដោយសារតែរដ្ឋាភិបាល យល់ថាមេបក្សប្រឆាំងរូបនេះ មានចេតនាមិនល្អ ដែលអាចនឹងបង្កភាពវឹកវរដល់សន្តិសុខរបស់ប្រទេសជាតិ និងប៉ះពាល់ដល់ស្ថេរភាពនយោបាយ។ លោកបញ្ជាក់ដូច្នេះថា៖«គេ (ឯកឧត្តម សម រង្ស៊ី) មិនមែនស្នេហាជាតិទេ។ គេ ចង់បានតែអំណាចប៉ុណ្ណោះ។ យើង មិនអាចបណ្តែតបណ្តោយ ឲ្យបុគ្គលមួយនាក់ ឬពីរនាក់ មកអុកឡុកស្ថានការណ៍ប្រទេសជាតិទេ។ ការពារ ប្រសើរជាងព្យាបាល»។
លោក សុខ ឥសាន បានលើកឡើងទៀតថា រដ្ឋាភិបាល ជាអ្នកទទួលខុសត្រូវចំពោះពលរដ្ឋ និងប្រទេសជាតិទាំងមូល ដូច្នេះមិនអាចអនុញ្ញាតឲ្យជនទុច្ចរិតណាម្នាក់ មកបង្កចលាចល និងបំផ្លាញសុខសន្តិភាពបានឡើយ។
សូមបញ្ជាក់ថា កាលពីថ្ងៃទី១២ ខែតុលា ឆ្នាំ២០១៦ រដ្ឋាភិបាល បានចេញលិខិតមួយ ដើម្បីហាមឃាត់ឯកឧត្តម សម រង្ស៊ី មិនឲ្យវិលមកកម្ពុជាវិញ។ លិខិតខាងលើ ត្រូវបាន ឯកឧត្តម សម យកទៅបង្ហោះលើទំព័រហ្វេសប៊ុករបស់ខ្លួន កាលពីថ្ងៃទី២១ ខែតុលា ឆ្នាំ២០១៦។ លិខិតនេះ បានសរសេរថា៖«គ្រប់ក្រុមហ៊ុនអាកាសចរទាំងអស់ ដែលធ្វើប្រតិបត្តិការហោះហើរមកកម្ពុជា មិនត្រូវអនុញ្ញាតឲ្យបុគ្គលនេះ (ឯកឧត្តម សម រង្ស៊ី) ឡើងយន្តហោះមកកម្ពុជាទេ ហើយត្រូវផ្តល់របាយការណ៍ទៀងទាត់ក្នុងករណីបុគ្គលនេះ ទិញសំបុត្រយន្តហោះ ធ្វើដំណើរមកកម្ពុជា»៕
Tag:
CPP
CNRP
សម រង្ស៊ី
អ្នកវិភាគ
សុខ ឥសាន
© រក្សាសិទ្ធិដោយ thmeythmey.com