ជាតិ
នយោបាយជាតិ
តុលាការកំពូលតម្កល់សេចក្តីសម្រេចមិនឲ្យលោក មាជ សុវណ្ណារ៉ា ទៅក្រៅប្រទេស រូបភាពពីហ្វេសប៊ុកលោក មាជ សុវណ្ណារ៉ា
×
តុលាការកំពូលបានតម្កល់ សេចក្តីសម្រេចរបស់តុលាការសាលាដំបូង ដែលសម្រេចមិនឲ្យលោក មាជ សុវណ្ណារ៉ា មន្ត្រីជាន់ខ្ពស់នៃគណបក្សសង្គ្រោះជាតិ ចេញទៅក្រៅប្រទេស។ សេចក្តីសម្រេចនេះ ធ្វើឡើងនៅព្រឹកថ្ងៃទី២៦ តុលានេះ ដោយអវត្តមាន លោក មាជ សុវណ្ណារ៉ា។
លោក ជូង ជូងី មេធាវីការពារក្តីលោក មាជ សុវណ្ណារ៉ា ដែលបានចូលស្តាប់ការសម្រេចរបស់តុលាការកំពូល ចាត់ទុកថាការសម្រេចនេះ ជារឿងមិនសមហេតុផល ដែលរារាំងមិនឲ្យមនុស្សដែលគ្មានទោស ទៅ ជួបប្រពន្ធកូន និងព្យាបាលនៅក្រៅប្រទេសនោះ។ លោក បញ្ជាក់ដូច្នេះថា៖«អត់មានភាពចាំបាច់ ដែលត្រូវហាមមិនឲ្យមនុស្សគ្មានទោស មិនឲ្យទៅក្រៅប្រទេសទេ។ លោក មាជ សុវណ្ណរ៉ា ក៏មានសញ្ជាតិអាមេរិក ហើយប្រពន្ធកូនគាត់នៅទីនោះ។ ការហាមគេមិនឲ្យទៅជួបប្រពន្ធកូន ដូចជាអមនុស្សធម៌ពេក»។
កន្លងមកលោក មាជ សុវណ្ណារ៉ា តែងតែលើកឡើងថា ករណីរបស់លោក គឺជារឿងនយោបាយ ទាល់តែមានការដោះស្រាយតាមផ្លូវនយោបាយ ទើបអាចទៅរួច។
សូមបញ្ជាក់ថា លោក មាជ សុវណ្ណារ៉ា រួមទាំងសកម្មជនបក្សប្រឆាំងជាង១០នាក់ទៀត ត្រូវបានសាលាដំបូងរាជធានីភ្នំពេញ កាត់ទោសឲ្យជាប់ពន្ធគារ ពី៧ឆ្នាំ ទៅ២០ឆ្នាំ។ តុលាការ បានចោទពួកគេថា បានចូលរួម និងដឹកនាំធ្វើកុបកម្មប្រឆាំងអាជ្ញាធរសាធារណៈ នៅក្បែរទីលានប្រជាធិបតេយ្យ កាលពីខែកក្កដា ឆ្នាំ២០១៤៕
Tag:
មាជ សុវណ្ណារ៉ា
ជូង ជូងី
© រក្សាសិទ្ធិដោយ thmeythmey.com