កីឡាជាតិ
ប្រាក់ មុន្នីឧត្តម មិនធ្លាប់ស្រមៃសោះថា ខ្លួនមានវាសនារត់កាន់ភ្លើងគប់ក្នុងព្រឹត្តិការណ៍កីឡាដ៏ធំ
×
កីឡាករ ប្រាក់ មុន្នីឧត្តម ខ្សែប្រយុទ្ធដ៏ឆ្នើមរបស់ព្រះខ័នរាជស្វាយរៀងមានការភ្ញាក់ផ្អើលនៅពេលថ្នាក់ដឹកនាំកីឡាកម្ពុជាប្រគល់តួនាទីជាអ្នករត់ភ្លើងគប់ក្នុងថ្ងៃបើកការប្រកួតកីឡាជាតិលើកទី១ ដែលមិនធ្លាប់គិតទុកនាពេលកន្លងមក។ ឧត្តម ត្រូវរត់ភ្លើងគប់ជាកីឡាករឆ្នើម និងអតីតកីឡាករជើងចាស់ជាច្រើនរូបទៀតនាថ្ងៃទី២៨ ខែតុលា នៅពហុកីឡដ្ឋានជាតិ ខណៈកីឡាការិនី ស៊ន សៀវម៉ី ជាអ្នកដុតភ្លើងគប់បើកការប្រកួតខាងលើនេះ។
ខ្សែប្រយុទ្ធរបស់ព្រះខ័នរាជស្វាយរៀង ប្រាក់ មុន្នីឧត្តម បានសម្តែងការភ្ញាក់ផ្អើលនៅពេលបានឃើញឈ្មោះរបស់ខ្លួនជាលើកដំបូងនៅក្នុងបញ្ជីអ្នករត់ភ្លើងគប់ជាមួយអតីតកីឡាករជើងចាស់ប្រចាំទស្សវត្សរ៍៦០, ៧០ និង៨០ ព្រមទាំងជាមួយកីឡាឆ្នើមៗនាពេលបច្ចុប្បន្ន ក្នុងថ្ងៃបើកការប្រកួតកីឡាជាតិលើកទី១នាយប់ថ្ងៃទី២៨ ខែតុលានេះ។
ក្នុងបទសម្ភាសជាមួយសារព័ត៌មានថ្មីៗក្នុងថ្ងៃរត់ភ្លើងគប់សាកល្បងកាលពីយប់ថ្ងៃទី២៦ ខែតុលា កីឡាករ ប្រាក់ មុន្នីឧត្តម បានរៀបរាប់យ៉ាងដូច្នេះថា៖«ដំបូងនៅពេលខ្ញុំឃើញឈ្មោះជាអ្នកកាន់ភ្លើងគប់រត់ គឺខ្ញុំរំភើបមែនទែនស្ទើរអត់ចង់ជឿថាខ្លួនឯងបានមកកាន់អញ្ចឹងបង អត់នឹកស្មានដល់»។
ទោះបីជា ឧត្តម មិនធ្លាប់នឹកស្រមៃដល់ការកាន់ភ្លើងគប់រត់ក្នុងបើកការប្រកួតកីឡាជាតិនេះក៏ដោយ ប៉ុន្តែតាមរយៈការទស្សនាកម្មវិធីបើកព្រឹត្តិការណ៍ធំៗលំដាប់អន្តរជាតិ បានធ្វើឲ្យកីឡាកររូបនេះនឹករំពឹងថា នៅថ្ងៃណាមួយរូបគេនឹងបានចូលរួមព្រឹត្តិការណ៍ទាំងអស់នេះ។
ជាមួយគ្នានេះ កីឡាករ ប្រាក់ មុន្នីឧត្តម យល់ឃើញថា ការប្រកួតកីឡាជាតិជាព្រឹត្តិការណ៍មួយដ៏ល្អ ដើម្បីជួយជំរុញវិស័យកីឡាកម្ពុជាមានការរីកចម្រើន ជាពិសេសធ្វើឲ្យកីឡាករទទួលបានបទពិសោធន៍ដើម្បីអភិវឌ្ឍន៍សមត្ថភាព និងបច្ចេកទេសរបស់កីឡាករ។ ម្យ៉ាងវិញទៀត គេធ្វើឲ្យកីឡាករកីឡាការិនីជំនាន់ក្រោយបានស្គាល់ពីអតីតកីឡាជើងចាស់ឆ្នើមកាលពីជំនាន់មុន៕
Tag:
កីឡាជាតិលើកទី១
ប្រាក់ មុន្នីឧត្តម
© រក្សាសិទ្ធិដោយ thmeythmey.com