កីឡាជាតិ
ជាតិ
កីឡាជាតិ៖ ក្រសួងមហាផ្ទៃឈ្នះមេដាយមាសទាំង៤វិញ្ញាសា នាការប្រកួតបើកឆាកហែលទឹក កីឡាការិនី ហែម ថុន វិទិនី បង្ហាញមេដាយមាសដែលខ្លួនឈ្នះក្នុងព្រឹត្តិការណ៍កីឡាជាតិលើកទី១។ រូបថត ហ្វេសប៊ុក វិទិនី
× ក្រសួងមហាផ្ទៃកំពុងនាំមុខគេលើតារាងនៃប្រភេទកីឡាហែលទឹកក្នុងព្រឹត្តិការណ៍ប្រកួតកីឡាជាតិលើកទី១ (The 1st National Games) ដែលប្រព្រឹត្តទៅនៅមជ្ឈមណ្ឌលហែលទឹកតេជោសែន ខេត្តកំពង់ចាម កាលពីថ្ងៃទី២៩ ខែតុលា ឆ្នាំ២០១៦។
យោងតាមលទ្ធផលដែលផ្សាយដោយអគ្គនាយកដ្ឋានកីឡា នៃក្រសួងអប់រំ យុវជន និងកីឡា កីឡាករ-ការិនីហែលទឹកនៃក្រសួងមហាផ្ទៃ ទទួលបានមេដាយមាសទាំង៤នាការប្រកួតបើកឆាក។
លើវិញ្ញាសាហែលរបៀបផ្ញារបុរសចម្ងាយ៥០ម៉ែត្រ កីឡាករ ធឿន ចាន់ថុល បានមេដាយមាស ដោយនាំមុខកីឡាករខេត្តកំពង់ចាមទាំងពីររូប គឺកីឡាករ ពេជ ស៊ីថូ និង រុន សួស្តី ដែលទទួលបានមេដាយប្រាក់ និងសំរឹទ្ធ។
សម្រាប់វិញ្ញាសាហែលរបៀបកង្កែបបុរសចម្ងាយ១០០ម៉ែត្រ កីឡាករ ហែល ថុនពន្លឺ បានមេដាយមាស ខណៈមិត្តរូមក្លិបក្រសួងមហាផ្ទៃ នាង ពេជ្រ ពិសិដ្ឋ បានមេដាយប្រាក់ ហើយចេង សុផា ពីរាជធានីភ្នំពេញ បានមេដាយសំរឹទ្ធ។
កីឡាការិនីក្រសួងមហាផ្ទៃ ប៊ុន រក្សា បានមេដាយមាសលើវិញ្ញាសាហែលរបៀបផ្ញារនារីចម្ងាយ៥០០ម៉ែត្រ ដោយនាំមុខកីឡាការិនី ឆោម ស្រីវលក្ខណ៍ ពីរាជធានីភ្នំពេញ និងកីឡាការិនី សាន បុប្ឆា នៅខេត្តកំពង់ចាម។
ចំពោះវិញ្ញាសាហែលរបៀបសេរីនារីចម្ងាយ១០០ម៉ែត្រ កីឡាការិនី ហែម ថុនវិទិនី ដែលតំណាងឲ្យក្រសួងមហាផ្ទៃផងដែរនោះ បានមេដាយមាស។ នេន សុម៉ាលី ពីរាជធានីភ្នំពេញ បានមេដាយប្រាក់ ខណៈ ប៊ុន រក្សា នៃក្រសួងមហាផ្ទៃ បានមេដាយសំរឹទ្ធមួយបន្ថែមទៀត៕
Tag:
កីឡាជាតិលើកទី១
ក្រសួងមហាផ្ទៃ
ហែលទឹក
© រក្សាសិទ្ធិដោយ thmeythmey.com