ពីនេះ ពីនោះ
មហាជន៖ ធ្វើការកន្លែងខ្លាញ់អត់លុយគេថាល្ងង់ ដល់ពេលមានលុយគេថាមន្ត្រីអាក្រក់
× ភ្នំពេញ៖ ពាក្យថា«ឯង/គាត់/ វា ល្ងង់ណាស់ធ្វើការកន្លែងខ្លាញ់ ហើយមិនចេះរកលុយ»និងពាក្យ«មកពីវា/គាត់ ពុករលួយទើបមានលុយច្រើន បើពឹងតែប្រាក់ខែ វាគ្មានប៉ុន្មានទេ»។ ពាក្យទាំងនេះ ជឿជាក់ថា សាធារណជន ធ្លាប់និយាយ ធ្លាប់អាន ធ្លាប់ឮស្ទើរតែគ្រប់ៗគ្នា។ បន្ថែមពីនេះ ពាក្យពីឃ្លានេះ ជួនកាលនិយាយចេញពីមាត់ មនុស្សតែម្នាក់ ថែមទៀតផង ដែលធ្វើឲ្យយើងមិនយល់ថា ហេតុអ្វីបានមនសិការរបស់បុគ្គលទាំងនោះផ្លាស់ប្ដូរបែបនេះ?
មន្ត្រីមួយចំនួន បានធ្វើការនៅតាមមន្ទីរ ក្រសួង មួយចំនួនយូរឆ្នាំហើយ ប៉ុន្តែស្ថានភាពសេដ្ឋកិច្ចគ្រួសារ នៅតែមានជីវភាពមធ្យម មិនមានបានដូចមន្ត្រីមួយចំនួន។ មូលហេតុគឺ ព្រោះតែស្រឡាញ់ មាគ៌ាស្មោះត្រង់ សុចរិតភាព មិនពុករលួយ មិនកេងប្រវ័ញ្ចលើប្រជាជន និងស្ថាប័នរបស់ខ្លួន។ ប៉ុន្តែព្រោះតែមាគ៌ាត្រឹមត្រូវនេះហើយ ធ្វើឲ្យមន្ត្រីទាំងនោះ ត្រូវទទួលបានការវាយតម្លៃពីមហាជនថាជាមនុស្សល្ងង់ ព្រោះបានធ្វើការជាមន្ត្រីនៅកន្លែងខ្លាញ់ មានច្រកអាចរកលុយបានហើយ ប៉ុន្តែបែរជាមិនចេះរកលុយ។ ពេលខ្លះរហូតដល់មានពាក្យថា «ជួយជាតិស្អី ជួយក្រពះខ្លួនឯងសិនទៅ»។ រហូតអ្នកខ្លះ និយាយថា «បើគាត់/ ឯង/ វា ឆ្លាត់ចេះរកលុយហើយ»។
ផ្ទុយមកវិញ បើមន្ត្រីផ្សេង ធ្វើការនៅកន្លែងមន្ទីរ ក្រសួង ស្ថាប័ន ខ្លាញ់ដូចគ្នា ប៉ុន្តែមានជីវភាពធូធារ មានទ្រព្យសម្បត្តិច្រើន មានសម្ភារទំនើបប្រើ មានរថយន្តល្អៗជិះ មន្ត្រីនោះត្រូវបានសាធារណជនដដែល វាយតម្លៃថា ជាមនុស្សបំផ្លាញជាតិ ជនក្បត់ជាតិ តាមរយៈអំពើពុករលួយ។
ជារួមមក ការគិតរបស់សាធារណជនមួយចំនួន ពិតជាពិបាកយល់ ថាពួកគេចង់បានអ្វីឲ្យពិតប្រាកដ? ព្រោះពេលខ្លះមន្ត្រីស្មោះត្រង់ ខិតខំធ្វើការមិនហ៊ានបំភ័ន្ត ធ្វើការតាមសមត្ថភាព ស៊ីប្រាក់ខែដែលរដ្ឋបានកំណត់ បែរជាត្រូវមហាជនសើចចំអរ ថាគ្មានចំណេះ មិនឆ្លាត មិនចេះរកលុយ។ ម្យ៉ាងទៀតរហូតដល់មានការមើលងាយទៅលើស្ថានភាពសេដ្ឋកិច្ចរបស់មន្ត្រីនោះទៀត។ ប៉ុន្តែបើមន្ត្រី ដែលធ្វើការមានបាន មានទ្រព្យសម្បត្តិ មានរបស់ប្រើប្រាស់ល្អ ក៏ត្រូវបានមហាជនវាយតម្លៃថា ជាមន្ត្រីអាក្រក់ មន្ត្រីមិនល្អ។
និយាយទៅមក បែរជាមន្ត្រីត្រឹមត្រូវ ល្អ ក៏ត្រូវបានគេមើលងាយ និងវាយតម្លៃមិនល្អ។ ចំណែកមន្ត្រីខិលខួច ក៏ត្រូវបានគេវាយតម្លៃថាមិនល្អដូចគ្នា។ បើបែបនេះ តើចង់ឲ្យមន្ត្រីទាំងនោះធ្វើបែបណាទើបសាធារណជនមួយចំនួននោះ គោរព និងឲ្យតម្លៃ ដោយស្មោះ?
© រក្សាសិទ្ធិដោយ thmeythmey.com