អន្តរជាតិ
នយោបាយអន្តរជាតិ
លោក Duterte បញ្ឈឺអាមេរិក ដោយងាកទៅទិញកាំភ្លើងរុស្សីវិញ
× ក្រសួងការបរទេសអាមេរិក នៅថ្ងៃទី៣១ ខែតុលា បានផ្អាកការលក់កាំភ្លើងជាងពីរម៉ឺនដើមទៅឲ្យហ្វីលីពីន ក្រោមហេតុផលបារម្ភពីការប្រើប្រាស់កាំភ្លើងដែលបំពានសិទ្ធិមនុស្សនៅក្នុងយុទ្ធនាការបង្ក្រាបគ្រឿងញៀន។ ប៉ុន្តែប្រធានាធិបតីហ្វីលីពីន Rodrigo Duterte មិនបានអើពើនឹងការផ្អាកនេះឡើយ ហើយថែមទាំងនិយាយបញ្ឈឺអាមេរិកថា ហ្វីលីពីនអាចទិញកាំភ្លើងពីរុស្សីជំនួសវិញ។
ប្រធានាធិបតីហ្វីលីពីន Rodrigo Duterte បានប្រាប់អ្នកសារព័ត៌មាននៅថ្ងៃទី១ ខែវិច្ឆិកា ថា ហ្វីលីពីន មិនចាំបាច់ទិញកាំភ្លើងពីអាមេរិកឡើយ ហើយអាចទិញកាំភ្លើងពីរុស្សីវិញក៏បានដែរ។ លោក Duterte និយាយដូច្នេះ បន្ទាប់ពីរដ្ឋបាលក្រុងវ៉ាស៊ីនតោនសម្រេចចិត្តឈប់លក់កាំភ្លើង២៦០០០ដើមទៅឲ្យក្រុងម៉ានីល ដោយសារតែការព្រួយបារម្ភលើបញ្ហាសិទ្ធិមនុស្ស។
សារព័ត៌មាន Manila Bulletin ផ្សាយថា លោក Duterte ដែលបានទៅផ្នូរឪពុកម្ដាយលោកនៅក្នុងទីក្រុង Davao ក៏បានបង្ហាញជំហរងាកទៅរុស្សី ដែលបានសន្យាជួយហ្វីលីពីនគ្រប់យ៉ាងនោះ។ ប្រធានាធិបតីហ្វីលីពីនបានលើកឡើងពាក្យសម្ដីរបស់មន្ត្រីរុស្សីដែលចង់ភ្ជាប់ទំនាក់ទំនងរវាងប្រទេសទាំងពីរឲ្យកាន់តែជិតស្និទ្ធ។ លោក Duterte និយាយថា៖ «មានចាំអ្វីដែលអ្នកការទូតរុស្សីនិយាយទេ? មករុស្សីមក! យើងមានអ្វីគ្រប់យ៉ាងដែលអ្នកត្រូវការ»។
ព្រមគ្នានឹងការលើកឡើងរបស់ប្រធានាធិបតី Duterte មេប៉ូលិសជាតិហ្វីលីពីន លោកឧត្តមសេនីយ៍ Ronald dela Rosa ក៏ពិចារណាដើម្បីឲ្យក្រសូងការបរទេសរកមើលទីផ្សារផ្សេងពីអាមេរិកដែរ។ លោកឧត្តមសេនីយ៍រូបនេះបញ្ជាក់ថា ការផ្អាកលក់កាំភ្លើងរបស់អាមេរិក ធ្វើឲ្យមន្ត្រីប៉ូលិសពិបាកបំពេញការងារយ៉ាងខ្លាំង។ ដូច្នេះគេទំនងជាស្វែងរកទីផ្សារប្រទេសដទៃ ដើម្បីទិញកាំភ្លើងជំនួសកាំភ្លើងអាមេរិក។
នារយៈពេលចុងក្រោយនេះ ប្រធានាធិបតីហ្វីលីពីន បានបង្ហាញជំហរងាកចេញពីអាមេរិក និងឈោងដៃចាប់មហាអំណាចរុស្សី និងចិន ដែលជាគូប្រជែងរបស់អាមេរិកលើឆាកអន្តរជាតិ។ ការងាកចេញពីសម្ព័ន្ធមិត្តចាស់ និងបោះដៃទៅមហាអំណាចផ្សេង ជាអ្វីដែលលោក Duterte ចាត់ទុកជានេះជាគោលនយោបាយឯករាជ្យថ្មីរបស់លោក ដែលមិនចង់ពឹងផ្អែកខ្លាំងលើប្រទេសណាមួយឡើយ។
លោក Duterte ទើបតែបញ្ចប់ទស្សនកិច្ចនៅក្រុងតូក្យូដែលជាសម្ព័ន្អមិត្តចាក់ទឹកមិនលិចរបស់ក្រុងវ៉ាស៊ីនតោន និងក្រុងប៉េកាំង។ នៅក្នុងទស្សនកិច្ចទាំងពីរលើកនេះ ហ្វីលីពីនបានទទួលផលប្រយោជន៍សេដ្ឋកិច្ចយ៉ាងច្រើនជាពិសេសប្រាក់កម្ចីជាច្រើនពាន់លានដុល្លារ។ ដោយឡែកកាលពីកិច្ចប្រជុំអាស៊ាន លោក Duterte ក៏បានជួបជាមួយនាយករដ្ឋមន្ត្រីរុស្សី ឌីមីទ្រី ម៉េដវ៉េដេវ ផងដែរ។ នាយករដ្ឋមន្ត្រីរុស្សីប្រាប់មេដឹកនាំហ្វីលីពីនថា រុស្សីត្រៀមខ្លួនរួចរាល់ហើយដើម្បីជួយហ្វីលីពីន៕
Tag:
ហ្វីលីពីន
អាមេរិក
រុស្សី
Rodrigo Duterte
© រក្សាសិទ្ធិដោយ thmeythmey.com