អន្តរជាតិ
នយោបាយអន្តរជាតិ
ប្រធានាធិបតីហ្វីលីពីន ចង់បបួលនាយករដ្ឋមន្ត្រីម៉ាឡេស៊ីសហការគ្នាកម្ចាត់ក្រុមឧទ្ទាម Abu Sayyaf ប្រធានាធិបតីហ្វីលីពីន ចាប់ដៃជាមួយនឹងនាយករដ្ឋមន្ត្រីម៉ាឡេស៊ី នាកិច្ចប្រជុំអាស៊ាននៅឡាវ (ប្រភពរូបភាព៖ The Star Online)
×
ប្រធានាធិបតីហ្វីលីពីន លោក រ៉ូឌ្រីហ្គូ ឌើទើតេ បានអះអាងថា លោក ចង់សហការជាមួយនឹងនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ ដើម្បីប្រតិបត្តិការកម្ចាត់ក្រុមឧទ្ទាម Abu Sayyaf ដែលបាននិងកំពុងតែបង្ករឿងអសន្តិសុខតាមដែនសមុទ្រដែលជាព្រំដែនរវាងប្រទេសទាំងពីរនោះ។
នាសន្និសីទកាលពីថ្ងៃទី១ ខែវិច្ឆិកា លោក រ៉ូឌ្រីហ្គូ ឌើទើតេ បានប្រាប់អ្នកសារព័ត៌មានថា លោក នឹងជជែកពី«ភាពដុនដាបទៅៗនៃសន្តិភាព និងសណ្តាប់»នៅព្រំដែនសមុទ្រជាមួយនឹងនាយករដ្ឋមន្ត្រីម៉ាឡេស៊ី ដែលអាចឈានទៅដល់លទ្ធភាពនៃការសហការគ្នារវាងយោធា និងប្រតិបត្តិការរបស់ប៉ូលិសដើម្បីប្រឆាំងនឹងក្រុមឧទ្ទាមប្រដាប់អាវុធ Abu Sayyaf នាពេលដែលលោកបំពេញទស្សនកិច្ចទៅប្រទេសម៉ាឡេស៊ីនាសប្តាហ៍ក្រោយនេះ។
លោកប្រធានាធិបតីរូបនោះ បានសង្កត់ធ្ងន់ ថា «លោក ពិតជាមានការអាម៉ាស់លើរាល់ការវាយប្រហារនានារបស់ក្រុមឧទ្ទាម Abu Sayyaf ដ្បិតក្រុមទាំងនោះ មានមូលដ្ឋាននៅកោះ Jolo នៅភាគខាងត្បូងនៃប្រទេសហ្វីលីពីននោះ»។ លោក ក៏បានបន្ថែមដែរថា «វា គឺជាដ៏ចាំបាច់សម្រាប់ម៉ាឡេស៊ី ហ្វីលីពីន និងឥណ្ឌូនេស៊ី ដើម្បីជជែកអំពីបញ្ហាក្រុមឧទ្ទាមឲ្យបានម៉ឺងម៉ាត់ដើម្បីបញ្ឈប់សកម្មភាពរបស់ក្រុមនោះ ដ្បិត បើបណ្តោយនោះ នឹងត្រូវប៉ះពាល់ដល់សកម្មភាពពាណិជ្ជកម្មកាន់តែខ្លាំង»។
ខណៈនិយាយពីគម្រោងសហការជាមួយម៉ាឡេស៊ី លោក ឌើទើតេ ក៏បានបង្ហើបពីដំណើរទស្សនកិច្ចរបស់លោកទៅកាន់ឥណ្ឌូនេស៊ីកាលពីខែមុនផងដែរ។ លោក បានឲ្យដឹងថា លោក និងប្រធានាធិបតីឥណ្ឌូនេស៊ីលោក ចូកូ វីដូដូ បានជជែកពីលទ្ធភាពនៃយុទ្ធសាស្ត្រសន្តិសុខរួមគ្នា ដោយលោក បញ្ជាក់ថា ប្រធានាធិបតីឥឥណ្ឌូនេស៊ី ក៏និយាយ «យល់ព្រមលើរឿងគ្រប់បែបយ៉ាង»ផងដែរ។ តែលោក មិនបញ្ជាក់ពីផែនការលម្អិតនៃការចាត់វិធានសន្តិសុខជាមួយនឹងឥណ្ឌូនេស៊ីនឹងអនុវត្តតាមជំហានណាឡើយ។
សូមជម្រាបផងដែរថា ក្រុម Abu Sayyaf គឺជាក្រុមឧទ្ទាមដ៏មានឥទ្ធិពលនៅក្នុងតំបន់អាស៊ីអាគ្នេយ៍ដែលជាបណ្តាញរបស់ក្រុមអាល់កៃដា(Al-Quaeda)។ ក្រុមនេះ ក៏ធ្លាប់ប្រកាសគាំទ្រក្រុមឥស្លាមជ្រុលនិយមដែលកំពុងតែបន្តសកម្មភាពប្រយុទ្ធនៅមជ្ឈិមបូព៌ាមផងដែរ។ មូលដ្ឋានសំខាន់ និង ក៏ជាកន្លែងលាក់ខ្លួនរបស់ក្រុម នេះ គឺស្ថិតនៅកោះ Jolo ដែលស្ថិតនៅភាគខាងត្បូងនៃប្រទេសហ្វីលីពីន។ រយៈពេលពេល៤ទសវត្សរ៍ មកហើយដែលក្រុមឧទា្ទមនេះ បានប្រឆាំង និង ទាមទារយកតំបន់គ្រប់គ្រងស្វ័យភាពពីរដ្ឋាភិបាលហ្វីលីពីន។
តាមពិតទៅ គោលដៅសំខាន់របស់ក្រុមឧទ្ទាម Abu Sayyaf មិនខុសពីឧទ្ទាមផ្សេងទៀតនោះទេ ពោលគឺអ្វីដែលពួកគេចង់បាន នោះគឺស្វ័យភាពក្នុងការគ្រប់គ្រង់តំបន់ដោយខ្លួនឯង។
ដោយសារតែការច្រានចោលពីរដ្ឋាភិបាលហ្វីលីពីន ក្រុមនេះ បានបង្កើតចលនាប្រឆាំងរដ្ឋាភិបាល៤ទសវត្សរ៍មកហើយ។ កន្លងមក សកម្មភាពដែលពួកគេ បានធ្វើដើម្បីជាការដាក់សម្ពាធ ប្រឆាំងរដ្ឋាភិបាលមានដូចជា ការបំផ្ទុះគ្រាប់បែក អត្តឃាត ការចាប់រំលោភក្មេង និង សកម្មភាពភេរវកម្មផ្សេងទៀត។ សម្រាប់ប្រភពសេដ្ឋកិច្ចរបស់ពួកគេភាគច្រើន គឺបានមកពីការចាប់ជំរិត ដែលភាគច្រើននៃចំណាប់ខ្មាំង គឺជាភ្ញៀវបរទេសហើយពួកគេភាគច្រើន ជាអ្នកប្រកាន់សាសនាគ្រឹស្ត។ ចុងក្រោយនេះ ពួកគេ បានធ្វើសកម្មភាពជាញឹកញាប់ក្នុងការជាប់ជំរិត និងប្លន់នៅតាមព្រំដែនសមុទ្រហ្វីលីពីន-ឥណ្ឌូនេស៊ី និងសមុទ្រហ្វីលីពីន-ម៉ាឡេស៊ី៕
Tag:
Abu Sayyaf
ហ្វីលីពីន
ម៉ាឡេស៊ី
អាស៊ាន
© រក្សាសិទ្ធិដោយ thmeythmey.com