ប៉េតង់៖ តាកែវឈ្នះមេដាយមាស៦ ដោយមានការរួមចំណែកដ៏ធំពី ទិត្យម៉ាណែត និងសុរ៉ាឃីម

កីឡាជាតិ

ជាតិ

ប៉េតង់៖ តាកែវឈ្នះមេដាយមាស៦ ដោយមានការរួមចំណែកដ៏ធំពី ទិត្យម៉ាណែត និងសុរ៉ាឃីម

02, Nov 2016 , 5:44 pm

រូបភាព

ដោយ:

កីឡាករ មួង ទិត្យម៉ាណែត និងកីឡាការិនី ស៊ាង សុរ៉ាឃីម បានក្លាយជាកម្លាំងដ៏សំខាន់សម្រាប់ខេត្តតាកែវនាការប្រកួតកីឡាប៉េតង់ក្នុងព្រឹត្តិការណ៍កីឡាជាតិលើកទី១នៅពហុកីឡដ្ឋានជាតិ ពីថ្ងៃទី២៧ ខែតុលា ដល់ថ្ងៃទី១ ខែវិច្ឆិកា។ តាកែវបានមេដាយមាសសរុបចំនួន៦ ខណៈទិត្យម៉ាណែត និង សុរ៉ាឃីម រកបានម្នាក់ចំនួន២ ក្នុងនោះមេដាយមាស១ បានពីការរួមគ្នារបស់ពួកគេលើវិញ្ញាសាចម្រុះបុរស-នារី។

ខេត្តតាកែវទទួលបានមេដាយមាសសរុបចំនួន៦ ច្រើនជាងក្នុងចំណោមខេត្ត-រាជធានី និងក្រសួងទាំង៩។ ក្នុងនោះកីឡាករ មួង ទិត្យម៉ាណែត និងកីឡាការិនី ស្រ៊ាង សុរ៉ាឃីម ដណ្តើមបានម្នាក់១លើប្រភេទវិញ្ញាសាវាយយកពិន្ទុ និង១ទៀត ពួកគេរួមគ្នាដណ្តើមបានលើប្រភេទវិញ្ញាសាចម្រុះ។

ក្រោយពីធ្វើការប្រកួតអស់រយៈពេលមួយសប្តាហ៍នៅទីលានប្រកួតប៉េតង់ក្នុងពហុកីឡដ្ឋានជាតិ ការប្រកួតកីឡាជាតិលើកទី១លើប្រភេទកីឡាប៉េតង់បានបញ្ចប់ការប្រកួតជាស្ថាពរកាលពីថ្ងៃទី១ ខែវិច្ឆិកា ដោយខេត្តតាកែវទទួលបានមេដាយមាស៦ និងសំរឹទ្ធ២ ពោលគឺមានចំនួនច្រើនជាងគេក្នុងចំណោមខេត្ត-រាជធានី និងក្រសួងទាំង៩ដែលបានចូលរួម។

ក្រសួងមហាផ្ទៃស្ថិតនៅចំណាត់ថ្នាក់លេខ២ ដោយទទួលបានមេដាយមាស៤ ប្រាក់១ និងសំរឹទ្ធ៤ ហើយខេត្តកណ្តាលស្ថិតនៅលេខរៀងបន្ទាប់ ដោយឈ្នះមេដាយមាស១, ប្រាក់៣ និងសំរឹទ្ធ២។

មេដាយមាសទាំង៦របស់ខេត្តតាកែវនេះ រកបានដោយកីឡាករ មួង ទិត្យម៉ាណែត និងកីឡាការិនី ស្រ៊ាង សុរ៉ាឃីម លើវិញ្ញាសាវាយយកពិន្ទុឯក្កតជនបុរស-នារីម្នាក់១, កីឡាករ កឹម ចាន់វាសនា លើវិញ្ញាសា១នាក់ទល់១នាក់បុរសចំនួន១, កីឡាករ មួង ទិត្យម៉ាណែត និង ស្រ៊ាង សុរ៉ាឃីម លើវិញ្ញាសាចម្រុះបុរស១នាក់នារី១នាក់ចំនួន១ និងវិញ្ញាសា៣នាក់ទល់៣នាក់បុរស-នារីចំនួន២។

គួរបញ្ជាក់ថា ក្រៅពីខេត្តទាំង៣ខាងលើនេះមិនមានខេត្តណាមួយទទួលមានមេដាយមាសនោះឡើយ ក្នុងនោះក្រសួងការពារជាតិទទួលបានមេដាយប្រាក់៦ និងសំរឹទ្ធ៣ ខណៈខេត្តព្រៃវែងទទួលបានមេដាយប្រាក់តែមួយប៉ុណ្ណោះ ឬឯខេត្ត-រាជធានីចំនួន៤ផ្សេងទៀតមិនទទួលបានមេដាយពីការប្រកួតកីឡាជាតិលើកទី១នោះឡើយ៕