ពីនេះ ពីនោះ
ពាក្យ«ហ្វឹកហ្វឺន» និង«វ៉ឹកវ៉ឺន»មួយណាទើបជាពាក្យដែលត្រឹមត្រូវតាមវចនានុក្រម?
× ភ្នំពេញ៖ ក្នុងពេលបច្ចុប្បន្ននេះ ពាក្យ«ហ្វឹកហ្វឺន» និង«វ៉ឹកវ៉ឺន» អ្នកសរសេរនៅមិនទាន់ច្បាស់ថា ពាក្យមួយណាទើបត្រឹមត្រូវ។ តែទោះយ៉ាងណា ពាក្យ«ហ្វឹកហ្វឺន»ត្រូវបានគេសរសេរច្រើន ប៉ុន្តែមិនសូវឃើញមានអ្នកសរសេរពាក្យ«វ៉ឹកវ៉ឺន»ឡើយ។ តាមវចនានុក្រមខ្មែររបស់សម្ដេចព្រះសង្ឃរាជ ជួន ណាត តើពាក្យទាំងពីរមួយណាទើបត្រឹមត្រូវ?
តាមការពិតពាក្យថា«ហ្វឹកហ្វឺន» និង«វ៉ឹកវ៉ឺន» គឺអាចសរសេរបានដូចគ្នា និងត្រឹមត្រូវដូចគ្នា។ មូលហេតុគឺ នៅពេលដែលអ្នកជំនាញធ្វើខេមរយានកម្មលើភាសាខ្មែរ បានយកវចនានុក្រមខ្មែរពុទ្ធសាសនបណ្ឌិត្យបោះពុម្ពលើកទី៥(១៩៦៧-៦៨) ធ្វើជាគោល ហើយកាលនោះបានជ្រើសយកពាក្យងាយៗមួយចំនួន ដែលអាចសរសេរបានពីរយ៉ាងមកប្រើ និងសរសេរ។ ហេតុនេះរវាងពាក្យទាំងពីរនេះសរសេរមួយណាក៏មិនខុសដែរ។
ពាក្យ«ហ្វឹកហ្វឺន» និង«វ៉ឹកវ៉ឺន» មានថ្នាក់ពាក្យកិរិយាសព្ទ មានន័យថា ហ្វឹករឿយៗ។ ដោយឡែកពាក្យ «ហ្វឹក»មានន័យថា ហាត់, ហាត់ឲ្យថ្នឹក, បង្វឹកៈ ហ្វឹកខ្លួន, ហ្វឹកហាត់។
ដកស្រង់ពីសៀវភៅវចនានុក្រមខ្មែររបស់សម្ដេចព្រះសង្ឃរាជ ជួន ណាត
© រក្សាសិទ្ធិដោយ thmeythmey.com