ជាតិ
នយោបាយជាតិ
សង្គ្រោះជាតិ ទៅជួបមន្ត្រីសាលាក្រុង ពិភាក្សារឿងទីតាំងបូជាសព លោក ប៉ែន សុវណ្ណ លោក យ៉ែម បុញ្ញឫទ្ធិ នៅក្នុងពិធីបុណ្យសព លោក ប៉ែន សុវណ្ណ
× លោក យ៉ែម បុញ្ញឫទ្ធិ មន្ត្រីជាន់ខ្ពស់គណបក្សសង្គ្រោះជាតិ បានបញ្ជាក់ប្រាប់សារព័ត៌មានថ្មីៗ នៅថ្ងៃនេះថា គណបក្សបានចាត់បញ្ជូន លោក ឡុង រី តំណាងរាស្ត្រគណៈសង្គ្រោះជាតិ និងជាតំណាងគណៈកម្មការរៀបចំបុណ្យសព ឲ្យទៅជួបជាមួយអាជ្ញាក្រុងភ្នំពេញដោយផ្ទាល់ ដើម្បីពិភាក្សាពីទីតាំងបូជាសព លោក ប៉ែន សុវណ្ណ។
បើតាម លោក យ៉ែម បុញ្ញឫទ្ធិ លោក ឡុង រី នឹងដឹកនាំមន្ត្រីមួយចំនួនទៅសាលាក្រុង នៅម៉ោង១០ ព្រឹកថ្ងៃទី៣ ខែវិច្ឆិកានេះ។
សូមបញ្ជាក់ថា ក្រោយមរណភាពរបស់លោក ប៉ែន សុវណ្ណ រដ្ឋសភា បានបញ្ជូនលិខិតទៅកាន់សាលារាជធានីភ្នំពេញ ដើម្បីសុំបូជាសព លោក ប៉ែន សុវណ្ណ នៅមុខវត្តបទុមវត្តី។
លោក យ៉ែម បុញ្ញឫទ្ធិ បញ្ជាក់ថា ប្រសិនបើទទួលបានចម្លើយអវិជ្ជមាន គណបក្សសង្គ្រោះជាតិ នឹងពិចារណាបន្តទៀតថាតើត្រូវជ្រើសរើសយកកន្លែងណា។ មន្ត្រីជាន់ខ្ពស់គណបក្សសង្គ្រោះជាតិបន្តទៀត គណបក្សក៏មិនទាន់ពិចារណាទីតាំងណាផ្សេងក្រៅពីមុខវត្តបទុមវត្តីនៅឡើយ ដោយរង់ចាំលទ្ធផលនៃការពិភាក្សានេះសិន។
លោក ប៉ែន សុវណ្ណ អ្នកតំណាងរាស្ត្រគណបក្សសង្គ្រោះជាតិ មណ្ឌលខេត្តកំពង់ស្ពឺ និងជាអតីតនាយករដ្ឋមន្ត្រី បានទទួលមរណភាព យប់ថ្ងៃទី២៩ ខែតុលា នៅគេហដ្ឋានរបស់ខ្លួនក្នុងខេត្តតាកែវ៕
Tag:
ប៉ែន សុវណ្ណ
យ៉ែម បុញ្ញឫទ្ធិ
ឡុង រី
© រក្សាសិទ្ធិដោយ thmeythmey.com