អន្តរជាតិ
វៀតណាមចាប់អ្នកសរសេរប្លុកប្រឆាំងរដ្ឋាភិបាលដាក់គុក
× ប៉ូលិសវៀតណាមសម្រេចចាប់ខ្លួនអ្នកសរសេរប្លុកមួយរូបដ៏ល្បី ដោយសារតែជននោះបានចែកចាយព័ត៌មានប្រឆាំងរដ្ឋាភិបាលវៀតណាមក៏ដូចជាបក្សកម្មុយនីស្តវៀតណាម។ ការចាប់ខ្លួនអ្នកសរសេរប្លុកនេះធ្វើឡើងស្របពេលដែលរដ្ឋាភិបាលក្រុងហាណូយបន្តបង្ក្រាបរាល់អ្នករិះគន់និងប្រឆាំងរដ្ឋាភិបាល។
អ្នកសរសេរប្លុកដ៏ល្បីឈ្មោះរបស់វៀតណាមលោក Ho Van Hai ត្រូវបានអាជ្ញាធរវៀតណាមចាប់ខ្លួននៅក្នុងទីក្រុងហូជីមិញ ដោយលោករងការចោទប្រកាន់ថា បានចែកចាយព័ត៌មានដែលប្រឆាំងរដ្ឋាភិបាលតាមប្រព័ន្ធអ៊ីនធឺណិត។
យោងតាមសេចក្តីប្រកាសព័ត៌មានរបស់ប៉ូលិស ប៉ូលិសក្រុងហូជីមិញ ដែលស្រង់សម្តីដោយទីភ្នាក់ងារព័ត៌មាន Reuters លោក Ho Van Hai មានវ័យ ៥២ ឆ្នាំ ហើយលោកត្រវបាន ចាប់ខ្លួន ដោយសារព័ត៌មាននិងឯកសារដែលលោកបានចែកចាយសុទ្ធតែប៉ះពាល់ដល់រដ្ឋាភិបាលវៀតណាម។
សេចក្តីថ្លែងការណ៍ដដែលបានអះអាងថា ប៉ូលិសនឹងបន្តស៊ើបអង្កេតករណីនេះ ហើយយោងតាមច្បាប់រដ្ឋអាមេរិកលោក Ho Van Hai ពិតជាបានរំលោភច្បាប់ពិតមែន។ មកដល់ពេលនេះគេមិនអាចចូលទៅកាន់ទំព័រហ្វេសប៊ុក និងប្លុកផ្ទាល់ខ្លួនរបស់លោក Ho Van Hai ឡើយ។
ការចាប់ខ្លួនអ្នកសរសេរប្លុកវៀតណាមនេះកើតឡើងស្របពេលដែល រដ្ឋាភិបាលក្រុងហាណូយបន្តយុទ្ធនាការបង្ក្រាបរាល់អ្នកដែលមាននិន្នាការប្រឆាំងរដ្ឋាភិបាលនិងបក្សកុម្មុយនីស្តផងដែរ។
ទោះបីជារដ្ឋាភិបាលបន្តកែទម្រង់សេដ្ឋកិច្ច និងបើកទូលាយសង្គមវៀតណាមជាទូទៅដោយបើកសិទ្ធិឲ្យអ្នកស្រឡាញ់ភេទដូចគ្នាក្តី បក្សកុម្មុយនីស្តវៀតណាម នៅបន្តរឹតត្បិតសិទ្ធិសេរីភាពសារព័ត៌មាននិងបន្តបង្ក្រាបអ្នករិះគន់រដ្ឋាភិបាលឥតមានញញើតសោះ។
ដូចកាលពីខែមុន ប៉ូលិសវៀតណាមបានឃុំខ្លួនអ្នកសរសេរប្លុកម្នាក់ទៀតគឺ Nguyen Ngoc Nhu Quynh ដោយអាជ្ញាធរចោទថា ជនម្នាក់នេះប្រើប្រាស់ប្រព័ន្ធឃោសនាប្រឆាំងរដ្ឋាភិបាល។ ប៉ុន្តែរដ្ឋាភិបាលអាមេរិក សហភាពអឺរ៉ុប និងអង់គ្លេសបានអំពាវនាវឲ្យរដ្ឋាភិបាលវៀតណាមដោះលែងជននេះ៕
© រក្សាសិទ្ធិដោយ thmeythmey.com