ចិន មិនដែលយកទំនាក់ទំនងការទូតជាមួយនឹងអ្នកជិតខាងខ្លួនដើម្បីប្រឆាំងនឹងរដ្ឋណាមួយផ្សេងទៀតឡើយ

អន្តរជាតិ

ចិន មិនដែលយកទំនាក់ទំនងការទូតជាមួយនឹងអ្នកជិតខាងខ្លួនដើម្បីប្រឆាំងនឹងរដ្ឋណាមួយផ្សេងទៀតឡើយ

03, Nov 2016 , 4:33 pm

រូបភាព

ដោយ:

ដំណើរទស្សនកិច្ចរបស់នាយករដ្ឋមន្ត្រីម៉ាឡេស៊ីទៅកាន់ចិន ដែលសម្រេចបានទាំងកិច្ចព្រមព្រៀងការពារជាតិក្នុងកម្រិតស៊ីជម្រៅផងដែរនោះ ត្រូវបណ្តាញសារព័ត៌មានមួយចំនួនលាបពណ៌ថាដើម្បីប្រឆាំងនឹងអាមេរិក។ តែក្រុងប៉េកាំង បានច្រានចោល និងបញ្ជាក់ថា កិច្ចសហប្រតិបត្តិការរបស់ខ្លួន និងអ្នកជិតខាង មិនដែលដាក់គោលដៅប្រឆាំងនឹងអ្នកទីបីណាឡើយ។

អ្នកនាំពាក្យក្រសួងការបរទេសចិន លោកស្រី Hua Chunying នៅថ្ងៃទី០២ ខែវិច្ឆិកា បានថ្លែងក្នុងសន្និសីទសារព័ត៌មានថា មេដឹកនាំចិន និងម៉ាឡេស៊ី បានព្រមព្រៀងគ្នាជាឯកច្ឆន្ទក្នុងការធ្វើឲ្យកាន់តែជម្រៅនៃសេចក្តីទុកចិត្តនយោបាយ លើកកម្ពស់កិច្ចសហប្រតិបត្តិការឲ្យកាន់តែពិតប្រាកដ និងពង្រីកចំណងប្រជាជន និងប្រជាជន។ លោកស្រី ក៏អះអាងដែរថា កិច្ចសហប្រតិបត្តិការរួមនេះ នឹងបម្រើផលប្រយោជន៍ប្រទេសទាំងពីរ និងការអភិវឌ្ឍ និងសន្តិភាពក្នុងតំបន់ផងដែរ។

«ចិន គិតបែបណាចំពោះប្រព័ន្ធផ្សព្វផ្សាយដូចជា Reuters, AFP, Wall Street Journal និង New York Times ដែលចាត់ទុកកិច្ចព្រមព្រៀងម៉ាឡេស៊ី និងចិន គឺជាចលនាមួយដើម្បីប្រឆាំងឥទ្ធិពលអាមេរិកនៅក្នុងតំបន់?» លោកស្រីអ្នកនាំពាក្យ បានឆ្លើយថា ចិន មិនដែលយកទំនាក់ទំនងការទូតធម្មតារបស់ខ្លួនជាមួយនឹងដៃគូដើម្បីប្រឆាំងភាគីទីបីឡើយ។

អ្នកនាំពាក្យរូបនោះ ក៏បានបញ្ជាក់ដែរថា គោលនយោបាយ និងចក្ខុវិស័យរបស់ចិនសម្រាប់កិច្ចការការទូតជាមួយនឹងអ្នកជិតខាង ឈរលើគោលការណ៍ «ភាពជាអ្នកជិតខាងល្អ, កិច្ចសហប្រតិបត្តិការ, ស្មោះត្រង់, ផលប្រយោជន៍រួម និងការរួមបញ្ចូលគ្នា»។

សូមជម្រាបផងដែរថា នាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ (Najib Razak) បាននិងកំពុងតែបំពេញទស្សនកិច្ចផ្លូវរដ្ឋនៅប្រទេសចិនរយៈពេលមួយសប្តាហ៍ដែលចាប់ផ្តើមពីថ្ងៃទី៣១ ខែតុលាមក តបតាមការអញ្ជើញរបស់លោកនាយករដ្ឋមន្ត្រីចិន លី ឃឺឈាង (Li Keqiang)។

យោងតាមសារព័ត៌មានរដ្ឋចិន Xinhua នៅថ្ងៃទី០១ ខែវិច្ឆិកាកន្លងទៅ ភាគីទាំងពីរ បានចុះកិច្ចព្រមព្រៀងជាច្រើនវិស័យរួមមាន ហេដ្ឋារចនាសម្ព័ន្ធ ថាមពល ការពារជាតិ និងការអភិវឌ្ឍរួមលើនាវាទ័ពជើងទឹកម៉ាឡេស៊ី។ កិច្ចព្រមព្រៀងនេះ ធ្វើឡើងក្រោយពីប្រមុខរដ្ឋាភិបាលទាំងពីរពោលគឺ លោកនាយករដ្ឋមន្ត្រី ណាជីប រ៉ាហ្សាក់ និងលោកនាយករដ្ឋមន្ត្រីចិន លី ឃឺឈាង បានបញ្ចប់កិច្ចប្រជុំរួមគ្នានោះ។

តាមពិតទៅហេតុផលមួយដែលបណ្តាញសារព័ត៌មានធំៗ រិះគន់ពីទស្សនកិច្ចនេះ ក៏ព្រោះតែ លោកនាយករដ្ឋមន្ត្រីណាជីប ឆ្លៀតវាយប្រហារប្រទេសលោកខាងលិចខណៈដែលលោក កំពុងតែនៅក្នុងដំណើរទស្សនកិច្ចនៅចិននោះ។ លោក បានថ្លែងយ៉ាងដូច្នេះថា «ប្រទេសលោកខាងលិចរួមទាំងម្ចាស់អាណានិគមផង គួរឈប់លូកលាន់កិច្ចការផ្ទៃក្នុងប្រទេសដទៃ។ វាមិនមែនជារឿងសមហេតុផលឡើយដែលពួកគេត្រូវបង្រៀនប្រទេសដទៃដែលពួកគេធ្លាប់កេងប្រវ័ញ្ចពីអតីតកាលឲ្យធ្វើអ្វីមួយដែលជាកិច្ចការផ្ទៃក្នុងរបស់គេនោះ»។ ម្ចាស់អាណានិគមរបស់ម៉ាឡេស៊ី គឺអង់គ្លេស៕