ពីនេះ ពីនោះ
រវាងពាក្យ«បៀវត្សរ៍» និង«បៀវត្ស»មួយណាទើបជាពាក្យដែលត្រឹមត្រូវតាមវចនានុក្រម?
× ភ្នំពេញ៖ ក្នុងពេលបច្ចុប្បន្ននេះ ពាក្យ «បៀវត្សរ៍» និង«បៀវត្ស» អ្នកសរសេរនៅមិនទាន់ច្បាស់ថា ពាក្យមួយណាទើបត្រឹមត្រូវ។ តាមវចនានុក្រមខ្មែររបស់សម្ដេចព្រះសង្ឃរាជ ជួន ណាត តើពាក្យទាំងពីរមួយណាទើបត្រឹមត្រូវ?
តាមការពិតពាក្យថា«បៀវត្សរ៍» និង«បៀវត្ស»គឺអាចសរសេរបានដូចគ្នា និងត្រឹមត្រូវដូចគ្នា។ មូលហេតុគឺ នៅពេលដែលអ្នកជំនាញធ្វើខេមរយានកម្មលើភាសាខ្មែរ បានយកវចនានុក្រមខ្មែរពុទ្ធសាសនបណ្ឌិត្យបោះពុម្ពលើកទី៥(១៩៦៧-៦៨) ធ្វើជាគោល ហើយកាលនោះបានជ្រើសយកពាក្យងាយៗមួយចំនួន ដែលអាចសរសេរបានពីរយ៉ាងមកប្រើ និងសរសេរ។ ហេតុនេះរវាងពាក្យទាំងពីរនេះសរសេរមួយណាក៏មិនខុសដែរ។
ពាក្យ«បៀវត្សរ៍» និង«បៀវត្ស»មានថ្នាក់ពាក្យនាម មានន័យថា គឺជាប្រាក់ដែលព្រះរាជាទ្រង់ប្រោសព្រះរាជទានក្នុងមួយឆ្នាំម្ដង។
ការប្រើប្រាស់ពាក្យ «បៀវត្សរ៍» និង«បៀវត្ស» គឺដំបូងឡើយផ្ដើមចេញពីពាក្យថា «បៀ» ដែលមានថ្នាក់ពាក្យជានាម មានន័យថា ជាឈ្មោះខ្យងសមុទ្រពួកមួយ មានតូចមានធំ សំបកក្រាស់រឹងរលោង ទ្រង់ទ្រាយជមក្រឡូម ខាងពោះច្រហមានរបាក់ជាជួរទាំងពីរខាង សណ្ឋានជាធ្មេញ។ ក្នុងសម័យបុរាណ រាជ្យពីព្រេងនាយ មានអនុញ្ញាតឲ្យប្រើបៀចាយជាតម្លៃលក់ទំនិញជាជំនួសប្រាក់ ព្រោះហេតុនោះទើបមានពាក្យហៅថា បៀលៀង, បៀវត្ស ជាប់មកដល់សព្វថ្ងៃនេះ៕
ដកស្រង់ពីសៀវភៅវចនានុក្រមខ្មែររបស់សម្ដេចព្រះសង្ឃរាជ ជួន ណាត
© រក្សាសិទ្ធិដោយ thmeythmey.com