អន្តរជាតិ
អាមេរិក នឹងបញ្ជូនប្រព័ន្ធមីស៊ីល THAAD ទៅឧបទ្វីបកូរ៉េ ឆ្នាំក្រោយ
× មន្ត្រីយោធាជាន់ខ្ពស់ក្រុងវ៉ាស៊ីនតោន បានបញ្ជាក់ថា ប្រព័ន្ធការពារមីស៊ីល THAAD នឹងត្រូវពង្រាយទៅកាន់ទឹកដីកូរ៉េខាងត្បូងក្នុងរយៈពេលពី ៨ ទៅ ១០ខែខាងមុខ។ អាមេរិកអះអាងថា ខែលការពារមីស៊ីលត្រូវដំឡើងនៅកូរ៉េខាងត្បូងដើម្បីប្រឆាំងកូរ៉េខាងជើង តែវាមានការជំទាស់ពីប្រទេសជិតខាងមានចិន និងរុស្ស៊ីដែរ។
សូមស្ដាប់ព័ត៌មានលម្អិត៖
ប្រព័ន្ធការពារមីស៊ីល THAAD របស់អាមេរិកនឹងត្រូវបញ្ជូនទៅកាន់កូរ៉េខាងត្បូងក្នុងរយៈពេល ៨ ទៅ ១០ ខែខាងមុខនេះ ដើម្បីការពារសុវត្ថិភាពកូរ៉េខាងត្បូង។ ហើយការពង្រាយសព្វាវុធប្រភេទនេះ ក៏កើតឡើងស្របពេលដែលក្រុងព្យុងយ៉ាងបន្តបង្ករឿងដោយបាញ់សាកល្បងមីស៊ីលជាបន្តបន្ទាប់កន្លងមកដែរ។
យោងតាមទីភ្នាក់ងារព័ត៌មានកូរ៉េ Yonhap មេបញ្ជាការកងទ័ពអាមេរិក Vincent Brooks ជាអ្នកបង្ហើបពីកាលបរិច្ឆេទផ្លូវការនៃការពង្រាយប្រព័ន្ធការពារមីស៊ីលនេះទៅកាន់ កូរ៉េខាងត្បូង។ មន្ត្រីជាន់ខ្ពស់រូបនេះបានអះអាងថា ការពង្រាយអាវុធយុទ្ធសាស្ត្រទៅ ឧបទ្វីបកូរ៉េនេះនឹងជួយបង្កើនសមត្ថភាពនិងយុទ្ធសាស្ត្រក្នុងការទប់ទល់ការបង្ករឿងរបស់ក្រុងព្យុងយ៉ាង។
ប្រព័ន្ធមីស៊ីលដែលនឹងត្រូវទៅឈរជើងនៅកូរ៉េខាងត្បូងមានទំហំធំជាងប្រព័ន្ធមីស៊ីលដែលអាមេរិកបញ្ជូនទៅកាន់កោះ Guam ។
យ៉ាងណាក៏ដោយចុះ ខាងភាគីកូរ៉េខាងត្បូង មិនបានបញ្ជាក់ថា វាជាព័ត៌មានពិតឬយ៉ាងណាឡើយ ប៉ុន្តែគេទទួលស្គាល់ថា កូរ៉េខាងត្បូងនិងអាមេរិកបន្តជជែកពិភាក្សាគ្នាលើពេលវេលាក្នុងការពង្រាយអាវុធយុទ្ធសាស្ត្រនេះនៅឡើយ។ ប៉ុន្តែកូរ៉េខាងត្បូងធ្លាប់បង្ហើបថាអាវុធនេះមកដល់កូរ៉េខាងត្បូងយ៉ាងហោចណាស់ក៏ចុងឆ្នាំនេះដែរ។
តាមពិតទៅ អាមេរិក និងកូរ៉េខាងត្បូងបានឯកភាពគ្នាពាក់ព័ន្ធការពង្រាយខែលការពារមីស៊ីលកន្លងមកក្រោមលេសប្រឆាំងក្រុងព្យុងយ៉ាង ប៉ុន្តែរដ្ឋាភិបាលក្រុងប៉េកាំងមិនយល់ស្របឡើយ។ ចិនខឹង ហើយគិតថា ការពង្រាយអាវុធយុទ្ធសាស្ត្រប្រភេទនេះមកកូរ៉េខាងត្បូងដែលនៅមិនឆ្ងាយពីព្រំដែនខ្លួនជាយុទ្ធសាស្ត្ររបស់អាមេរិកក្នុងការហ៊ុមព័ទ្ធខ្លួនតែប៉ុណ្ណោះ។ វាជារឿងសមស្របព្រោះថា ប្រព័ន្ធការពារមីស៊ីលនេះទំនើប និងមានអំណាចខ្លាំង ដោយវាបំពាក់នូវរ៉ាដាដែលអាចមើលឃើញដល់ទឹកដីចិនបានយ៉ាងងាយ។ ហើយមិនត្រឹមតែប៉ុណ្ណោះទេ វាក៏គំរាមកំហែងដល់សន្តិសុខចិនផងដែរ។
យ៉ាងណាមិញ ដោយសារភាពតានតឹងនៅឧបទ្វីបកូរ៉េ និងការបន្តសកម្មភាពបង្ករឿងឥតមានឈប់ឈររបស់ក្រុងព្យុងយ៉ាងនេះ បានបង្កក្តីបារម្ភដល់ប្រជាជនកូរ៉េទូទៅខ្លាំង។ ប្រជាជនមួយភាគធំយល់ថា កូរ៉េខាងត្បូងគួរមានអាវុធនុយក្លេអ៊ែរខ្លួនឯង ឬមិនដូច្នេះទេ អាចសុំឲ្យអាមេរិកដំឡើងក្បាលគ្រាប់នុយក្លេអ៊ែរអាមេរិកឡើងវិញដើម្បីគំរាមកូរ៉េខាងជើងនោះ។
ទាក់ទិនការផលិតអាវុធនុយក្លេអ៊ែរខ្លួនឯងនេះ វាអាចទៅរួចដែរ បើសិនជាលោក ដូណាល់ ត្រាំ ជាប់ឆ្នោតជាប្រធានាធិបតី។ លោកធ្លាប់អះអាងថា គោលនយោបាយរបស់លោក គឺអនុញ្ញាតឲ្យសម្ព័ន្ធមិត្តនៅអាស៊ីដូចជាកូរ៉េនិងជប៉ុនមានអាវុធនុយក្លេអ៊ែរខ្លួនឯង ដើម្បីការពារសុវត្ថិភាព ព្រោះអាមេរិកនឹងអាចកាត់បន្ថយការចំណាយបានច្រើន។
មកដល់ពេលបច្ចុប្បន្ននេះ កូរ៉េខាងត្បូងមិនទាន់មានគម្រោងថា នឹងស្នើសុំឲ្យអាមេរិកបញ្ជូននុយក្លេអ៊ែរមកកូរ៉េខាងត្បូងវិញឡើយ។
សូមរម្លឹកបន្តិចដែរថា មុនចប់សង្គ្រាមត្រជាក់អាមេរិកមានអាវុធនុយក្លេអ៊ែរនៅក្នុងទឹកដីកូរ៉េខាងត្បូង ប៉ុន្តែប្រធានាធិបតី George H.W. Bush បានសម្រេចដកអាវុធនេះចេញនៅក្នុងឆ្នាំ ១៩៩១៕
© រក្សាសិទ្ធិដោយ thmeythmey.com